Bihainim Pasin Bilong Jisas​—Skulim Ol Man Wantaim Pasin Laikim

“Bipo i no gat wanpela man i mekim toktok olsem dispela man i mekim.”​​—JO. 7:​46.

1. Ol man i ting olsem wanem long pasin bilong Jisas long skulim ol man?

TINGIM bikpela amamas bilong ol man taim ol i harim Jisas i skulim ol! Long Baibel yumi ritim stori long ol man husat i bungim Jisas na ol i pilim olsem wanem long dispela. Olsem: Gutnius Luk i Raitim i stori long ol man long ples bilong Jisas “ol i tingting planti long ol gutpela tok em i autim.” Matyu i tok ol man husat i harim tok Jisas i bin autim long maunten “ol i kirap nogut tru long skul bilong en.” Na Jon i tok ol plisman em ol i bin go bilong holimpas Jisas ol i kam bek nating, na i tok: “Bipo i no gat wanpela man i mekim toktok olsem dispela man i mekim.”​—Lu. 4:22; Mt. 7:28; Jo. 7:46.

2. Jisas i gat wanem pasin bilong skulim ol man?

² Tok bilong ol plisman i tru olgeta. Jisas em i nambawan gutpela Tisa i bin stap long graun. Taim em i skulim ol man, em i mekim ol tok i klia na i no hatwok long kisim. Em i mekim gutpela wok long ol tok piksa na ol askim. Em i save tingim ol man em i skulim na mekim ol tok i stret long ol, maski ol i man i gat namba o ol i man nating. Tok i tru em i skulim ol long en i isi long kisim, tasol ol dispela tok i gat bikpela mining. Tasol dispela samting tasol i no mekim na Jisas i gutpela Tisa, nogat, i gat sampela samting moa.

Nambawan Gutpela Pasin​—Pasin Laikim

3. Long pasin bilong skulim ol man, olsem wanem Jisas i narapela kain long ol hetman bilong lotu long taim bilong em?

³ Namel long ol saveman bilong lo na ol Farisi i gat ol man i gat bikpela save na ol i gat save long skulim ol man. Wanem samting i mekim na pasin bilong Jisas long skulim ol man i narapela kain long ol? Ol hetman bilong lotu long dispela taim i no laikim ol man nating, nogat. Ol i nolaik tru long ol, na i tingim ol i olsem man “God i tok pinis long ol bai i bagarap.” (Jo. 7:49) Tasol Jisas i sori tru long ol man, long wanem, “ol i stap nogut tru, olsem ol sipsip i no gat wasman.” (Mt. 9:36) Em i mekim gut tru long ol na i pilim hevi bilong ol. Narapela pasin bilong ol hetman bilong lotu, em ol i no laikim tru God. (Jo. 5:42) Tasol Jisas i laikim tru Papa bilong em na i amamas tru long bihainim laik bilong em. Ol hetman bilong lotu i paulim tok bilong God bilong helpim ol yet, tasol Jisas i laikim tru “tok bilong God”​—em i skulim ol man long dispela tok, kamapim insait bilong en, sambai long en, na bihainim ol stiatok bilong en. (Lu. 11:28) Tru tumas, Krais i gat pasin laikim na dispela i bosim ol samting em i skulim ol man long en, pasin em i mekim long ol, na pasin bilong em long skulim ol man.

4, 5. (a) Bilong wanem em i bikpela samting long skulim ol man wantaim pasin laikim? (b) Long pasin bilong skulim ol man, bilong wanem save na gutpela pasin bilong skulim man i bikpela samting?

⁴ Olsem wanem long yumi? Yumi save bihainim Krais, olsem na yumi laik bihainim pasin bilong em long wok autim tok na long wokabaut bilong yumi. (1 Pi. 2:21) Yumi laik givim save bilong Baibel long ol man, tasol i no dispela tasol, nogat, yumi laik kamapim tu ol pasin bilong Jehova, na moa yet pasin laikim. Maski yumi gat bikpela save o liklik save tasol, o yumi save gut long skulim ol man o i no tumas, sapos yumi kamapim pasin laikim dispela bai helpim yumi long putim tok i go daun long bel bilong ol man yumi autim tok long ol. Bilong mekim gut wok bilong kamapim disaipel, yumi mas bihainim pasin bilong Jisas na skulim ol man long pasin laikim.

⁵ Tru, bilong i stap olsem gutpela tisa, yumi mas i gat save long ol samting yumi laik skulim ol man long en, na yumi mas save gut long pasin bilong givim dispela save long ol man. Jisas i bin helpim ol disaipel bilong em long save long dispela tupela samting, na Jehova i helpim yumi long mekim olsem long nau long rot bilong oganaisesen bilong em. (Ritim Aisaia 54:13; Luk 12:42.) Tasol yumi no ken yusim tingting tasol bilong skulim ol man, bel bilong yumi tu i mas insait long en. Taim save, gutpela pasin bilong skulim ol man, na pasin laikim i wok wantaim, ol gutpela samting bai kamap. Olsem na long wanem rot yumi ken kamapim pasin laikim taim yumi skulim ol man? Olsem wanem Jisas na ol disaipel bilong em i bin mekim olsem? Orait nau yumi ken skelim ol dispela askim.

Yumi Mas Laikim Tru Jehova

6. Taim yumi stori long ol narapela long wanpela man yumi save laikim tru, yumi save toktok olsem wanem?

⁶ Yumi save amamas long toktok long ol samting yumi laikim, na taim yumi mekim olsem, ol man i ken lukim bikpela amamas bilong yumi na lukim olsem yumi pilim tru dispela samting. Dispela em i tru moa yet taim yumi toktok long wanpela man yumi laikim tru. Yumi save amamas long tokim ol narapela long ol samting yumi save long dispela man. Yumi litimapim nem bilong em, givim ona, na sambai long em. Yumi mekim olsem, long wanem, yumi laik ol narapela i laikim dispela man na pasin bilong em, olsem yumi save laikim.

7. Jisas i laikim tru God na dispela i kirapim em long mekim wanem?

⁷ Paslain long yumi ken kirapim narapela long laikim tru Jehova, yumi yet i mas save na laikim tru Jehova. Dispela i olsem, long wanem, pasin laikim i mas i stap olsem as bilong lotu i tru. (Mt. 22:​36-38) Jisas i stap olsem gutpela piksa tru long mekim olsem. Em i laikim tru Jehova long bel, tingting, na strong olgeta bilong em. Em i bin stap inap planti bilion yia long heven wantaim Papa bilong em, olsem na em i save gut long Jehova. Wanem samting i kamap long dispela? Jisas i tok: “Mi laikim tru Papa.” (Jo. 14:31) Dispela pasin laikim i kamap ples klia long olgeta samting Jisas i toktok long en na i mekim. Long olgeta taim dispela i bin kirapim em long mekim ol samting God i laikim. (Jo. 8:29) Dispela i bin kirapim em long tokaut long asua bilong ol hetman bilong lotu, em ol i giaman na tok ol i wokman bilong God. Na tu, dispela i kirapim em long autim tok bilong Jehova na helpim ol narapela long save na laikim tru God.

8. Pasin bilong laikim tru God i bin kirapim ol disaipel bilong Jisas long mekim wanem?

⁸ Olsem Jisas, ol disaipel long taim bilong em i bin laikim tru Jehova, na dispela pasin laikim i kirapim ol long givim bel tru long autim gutnius na i no pret. Ol i bin autim tok long olgeta hap bilong Jerusalem, maski ol strongpela hetman bilong lotu i bin birua long ol. Ol disaipel i no inap pasim maus, ol i mas autim tok long olgeta samting ol i bin lukim na harim. (Ap. 4:20; 5:28) Ol i save olsem Jehova i stap wantaim ol na em bai blesim wok bilong ol​—na tru tumas, Jehova i bin mekim olsem! Inap olsem 30 yia bihain long Jisas i dai pinis, aposel Pol i tok ol i bin autim gutnius “long olgeta manmeri i stap long graun.”​—Kl. 1:​23.

9. Olsem wanem yumi ken strongim pasin bilong yumi long laikim tru God?

⁹ Sapos yumi laik i stap olsem gutpela tisa, yumi tu i mas wok long strongim pasin bilong yumi long laikim tru God. Olsem wanem yumi inap mekim olsem? Yumi mas toktok planti taim wantaim God long rot bilong beten. Yumi inap strongim tu pasin bilong yumi long laikim tru God long rot bilong stadi long Baibel, ritim ol buk na nius bilong Baibel, na go oltaim long ol miting Kristen. Taim yumi kisim sampela save moa long God, bai yumi laikim em tru. Orait nau, taim yumi kamapim long ol tok na pasin bilong yumi olsem yumi laikim tru God, ol narapela bai lukim dispela na ating ol tu i laik i go klostu long Jehova.​​—Ritim Song 104:​33, 34.

Yumi Mas Laikim Tru Ol Tok Yumi Skulim Ol Man Long En

10. Wanem wanpela mak bilong gutpela tisa?

¹⁰ Wanpela mak bilong gutpela tisa em olsem: Em i mas laikim ol tok em i skulim ol man long en. Em i mas bilip olsem ol tok em i skulim ol man long en i tru, i bikpela samting, na inap helpim ol man. Sapos tisa i pilim tru samting em i skulim ol man long en, ol man bai lukim amamas bilong em, na dispela bai mekim bikpela samting long ol man em i skulim. Tasol sapos tisa i no pilim tru ol samting em i skulim ol man long en, olsem wanem em i ken ting ol sumatin bai laikim ol samting ol i harim? Pasin bilong yu olsem tisa bilong Tok Bilong God em i bikpela samting. Jisas i tok: “Taim [sumatin] i skul gut pinis, orait em bai i kamap wankain olsem tisa bilong en.”​​—Lu. 6:​40.

11. Bilong wanem Jisas i laikim tru ol tok em i skulim ol man long en?

¹¹ Jisas i laikim tru ol tok em i skulim ol man long en. Em i save olsem em i gat gutpela samting bilong skulim ol man long en​—em tok i tru long Papa bilong em long heven, na “tok bilong God” na ol tok “i save givim laip i stap gut oltaim oltaim.” (Jo. 3:34; 6:68) Olsem wanpela strongpela lait, ol tok i tru Jisas i skulim ol man long en i kamapim ples klia ol samting i nogut na ol gutpela samting. Ol hetman bilong lotu i bin giamanim ol man i gat pasin daun na Satan i daunim ol, tasol ol tok i tru i helpim ol long wetim gutpela samting i kamap bihain na i strongim ol. (Ap. 10:38) Jisas i laikim tumas tok i tru na dispela i kamap ples klia long ol samting em i skulim ol man long en na ol samting em i mekim.

12. Aposel Pol i ting olsem wanem long gutnius?

¹² Olsem Jisas, ol disaipel bilong em i bin laikim tumas tok i tru bilong Jehova na Krais na ol i ting em i bikpela samting, olsem na ol birua i no inap pasim ol long autim ol dispela tok long ol narapela. Pol i tok long ol wanbilip Kristen long Rom olsem: “Bel bilong mi i kirap long autim gutnius . . . Mi no save sem long autim gutnius, long wanem, strong bilong God i stap long gutnius, em strong bilong kisim bek olgeta man i bilip.” (Ro. 1:​15, 16) Pol i pilim olsem em i wanpela gutpela samting tru long autim tok i tru. Em i tok: “God . . . i marimari long mi na givim dispela wok long mi, em wok bilong autim gutnius long ol arapela lain. Dispela gutnius i tok long olgeta gutpela samting bilong Krais, em yumi ol man i no inap tru long skelim na kaunim.” (Ef. 3:8) Yumi ken tingim bikpela amamas bilong Pol taim em i skulim ol narapela long Jehova na long samting Em i tingting pinis long mekim.

13. I gat wanem ol as long laikim tru gutnius?

¹³ Gutnius i stap long Baibel i helpim yumi long kisim save long Man Bilong Wokim yumi na long pas gut wantaim em. Dispela gutnius i bekim ol bikpela askim long ol samting bilong laip bilong yumi na i gat strong long senisim laip bilong yumi, helpim yumi long wetim gutpela samting i kamap bihain, na strongim yumi long taim bilong hevi. Na tu, em i soim rot long laip i gat as bilong en na i no inap pinis. I no gat narapela save i gutpela moa winim gutnius. Em i wanpela gutpela presen tru God i bin givim long yumi, na i givim bikpela amamas long yumi. Na yumi kisim bikpela amamas moa taim yumi autim long ol narapela.​—Ap. 20:35.

14. Olsem wanem yumi inap strongim pasin bilong yumi long laikim tru ol tok yumi skulim ol man long en?

¹⁴ Yu inap mekim wanem bambai pasin bilong yu long laikim tru gutnius i go bikpela moa? Taim yu ritim Tok Bilong God, sampela taim yu mas malolo na tingim gut ol samting yu ritim. Olsem: Tingim olsem yu raun wantaim Jisas long taim em i autim tok o yu raun wantaim aposel Pol. Piksaim long tingting olsem yu stap pinis long nupela taim, na tingim olsem wanem laip bai i narapela kain. Tingim ol blesing yu bin kisim, long wanem, yu bin bihainim gutnius. Sapos yu mekim pasin bilong yu long laikim tru gutnius i stap strong, ol man yu skulim bai pilim dispela pasin laikim bilong yu. Olsem na i gat as na yumi mas tingim gut long bel ol samting yumi lainim na was gut long ol samting yumi skulim ol man long en.​​—Ritim 1 Timoti 4:​15, 16.

Yumi Mas Laikim Tru Ol Man

15. Bilong wanem tisa i mas laikim tru ol sumatin bilong em?

¹⁵ Gutpela tisa i save helpim ol sumatin long i stap bel isi na bai ol i givim bel long insait long ol samting ol i lainim na amamas long kamapim tingting bilong ol. Gutpela tisa i givim save long ol sumatin, long wanem, em i tingim tru ol sumatin bilong em. Em i tingim save bilong ol na samting ol i sot long en. Taim tisa i gat dispela kain pasin laikim, ol sumatin bai pilim, na tisa bai amamas long skulim ol na ol sumatin bai amamas long kisim save.

16. Long wanem ol rot Jisas i soim ol man olsem em i laikim tru ol?

¹⁶ Jisas i soim dispela kain pasin laikim. Nambawan bikpela samting em i bin mekim bilong kamapim klia olsem em i laikim tru ol man, em i bin givim gutpela laip bilong em bilong kisim bek ol. (Jo. 15:13) Taim Jisas i mekim wok bilong em long graun, em i wok strong tru bilong helpim ol man long ol samting bilong skin na moa yet long ol samting bilong spirit. Em i no wetim ol man i kam long em, nogat, em i wokabaut inap planti handet kilomita bilong autim gutnius long ol. (Mt. 4:​23-25; Lu. 8:1) Em i isi long ol man na i pilim gut tingting bilong ol. Taim i gat wok long stretim ol disaipel bilong em, em i mekim olsem, na em i mekim long pasin laikim. (Mk. 9:​33-37) Em i strongim bel bilong ol long rot bilong tokaut olsem em i bilip tru long ol bai mekim gut wok bilong autim gutnius. I no gat wanpela man i bin stap gutpela tisa tru olsem Jisas. Pasin laikim em i mekim long ol disaipel bilong em i kirapim ol long laikim em na bihainim ol lo bilong em.​​—Ritim Jon 14:15.

17. Olsem wanem ol disaipel bilong Jisas i soim olsem ol i laikim tru ol narapela?

¹⁷ Olsem Jisas, ol disaipel bilong em i bin soim olsem ol i laikim na tingim tru ol man em ol i autim tok long ol. Ol man i mekim nogut long ol na ol inap kisim bagarap, tasol ol i mekim wok bilong helpim ol narapela na autim tok bilong gutnius. Ol i laikim tru ol man husat i bilip long tok ol i autim! Yumi pilim tru tok bilong aposel Pol, em i tok: “Taim mipela i stap wantaim yupela, mipela i stap isi tru olsem ol liklik pikinini. Mipela i bin stap olsem meri i givim susu long ol pikinini bilong en. Mipela i laikim yupela tumas, olsem na mipela i laik givim gutnius bilong God long yupela. Na mipela i redi tu long givim laip bilong mipela bilong helpim yupela, long wanem, yupela i bin kamap pren tru bilong mipela.”​—1 Te. 2:​7, 8.

18, 19. (a) Bilong wanem yumi amamas long lusim ol samting bilong yumi yet bilong mekim wok bilong autim tok? (b) Stori long wanpela ekspiriens i kamapim klia olsem ol man i save lukim pasin laikim yumi save kamapim long ol narapela.

¹⁸ Na i wankain long nau, ol Witnes Bilong Jehova i autim tok long olgeta hap bilong painim ol man em ol i gat laik tru long save long God na mekim wok bilong em. Insait long 17 yia i go pinis, long olgeta yia yumi bin lusim inap olsem wan bilion aua bilong autim tok na kamapim ol disaipel​—na yumi mekim yet dispela wok. Yumi amamas long mekim, maski yumi mas givim taim na strong na mani bilong yumi yet bilong autim tok. Olsem Jisas, yumi save olsem gutpela Papa bilong yumi long heven i gat laik long ol man i mas kisim save i bringim ol i go long laip oltaim. (Jo. 17:3; 1 Ti. 2:​3, 4) Pasin laikim i kirapim yumi long helpim ol man i gat gutpela bel long kisim save na laikim tru Jehova, olsem yumi save mekim.

¹⁹ Ol narapela man i save lukim pasin laikim yumi save kamapim. Olsem: Wanpela painia sista long Amerika i save raitim ol pas bilong mekim gut bel bilong ol man em wanpela long famili bilong ol i bin dai. Wanpela man i bekim tok olsem: “Pastaim mi kirap nogut olsem wanpela meri i raitim pas i go long wanpela man em i no save long em bilong helpim em long karim hevi bilong em. Dispela i givim tingting long mi olsem yu save laikim tru ol narapela na laikim tru God husat i save stiaim ol man long rot bilong laip.”

20. Pasin bilong skulim ol man wantaim pasin laikim i bikpela samting olsem wanem?

²⁰ Wanpela man i bin tok, taim pasin laikim na pasin bilong save gut long mekim wok i wok wantaim, gutpela samting tru i save kamap. Taim yumi skulim ol sumatin bilong yumi, yumi laik helpim ol long save long Jehova na laikim tru Jehova long bel bilong ol. Tru tumas, bilong stap olsem gutpela tisa tru, yumi mas laikim tripela samting​—laikim tru God, laikim tru tok i tru, na laikim tru ol man. Taim yumi wok long kisim dispela kain pasin laikim na kamapim long taim yumi autim tok, yumi kisim amamas long pasin bilong givim ol samting, na tu, yumi belgut long save olsem yumi bihainim pasin bilong Jisas, na Jehova i amamas long yumi.

Bai Yu Bekim Olsem Wanem?

• Taim yumi skulim ol narapela long gutnius, bilong wanem em i bikpela samting long . . .

laikim tru God?

laikim tru ol tok yumi skulim ol man long en?

laikim tru ol man yumi skulim?

[Piksa long pes 15]

Wanem samting i mekim na pasin bilong Jisas long skulim ol man i narapela kain long ol saveman bilong lo na Farisi?

[Piksa long pes 18]

Bilong skulim gut ol man yumi mas i gat save, save long mekim wok, na moa yet pasin laikim