Bihainim Bilip Bilong Ol

Em i Wok Strong Long Daunim Pasin Bilong Pret na Tupela Tingting

PITA i taitim bun tru long pul long nait na em i lukluk i go. Em i lukim wanpela liklik lait i kamap long hap is, na em i ting ating tulait i laik bruk. Ol masol long baksait na sol bilong em i pen, long wanem, em i bin pul inap planti aua. Win i kirapim biksi long raunwara Galili na i sakim nabaut gras bilong em. Biksi i paitim strong poret bilong bot, na wara i wetim Pita. Em i pul yet i go.

Pita na ol poroman bilong em i bin lusim Jisas wanpela i stap long nambis na ol i go. Long san, ol i bin lukim Jisas i kisim sampela bret na pis na i givim kaikai long planti tausen manmeri em ol i hangre. Dispela i mekim na ol manmeri i kirap long painim Jisas bambai ol i ken mekim em i kamap king, tasol em i no laik insait liklik long wok politik. Na tu, em i wok strong long helpim ol disaipel bilong em long ol i no ken kisim kain tingting olsem. Em i salim ol manmeri i go, na em i tokim ol disaipel bilong em long kalap long bot na go long hapsait bilong nambis na em wanpela i go long maunten long beten.​​—Mak 6:​35-​45; Jon 6:​14, 15.

Mun i lait bikpela na i stap namel long skai taim ol disaipel i kalap long bot; isi isi mun i wok long i go daun long hap wes. Tasol ol i pul i go inap sampela kilomita tasol. Ol i taitim bun long pul, na bikpela nois bilong win na biksi i mekim na i hatwok long ol disaipel i toktok wantaim. Maski ol narapela i stap, ating Pita i no toktok, em i wok long tingting i stap.

I gat planti samting em i wok long tingting long en! Em i bin bihainim Jisas bilong Nasaret winim 2-pela yia, na planti samting i bin kamap insait long ol dispela yia. Em i bin lainim planti samting, tasol i gat planti samting moa em i mas lain long en. Em i redi long mekim olsem na long wok strong long daunim pasin bilong holim tupela tingting na pasin bilong pret, na dispela i mekim na em i stap gutpela piksa yumi ken bihainim. Orait nau yumi ken skelim dispela samting.

“Mipela i Lukim Pinis Mesaia”!

Pita i no inap lusim tingting long taim em i bin bungim Jisas bilong Nasaret. Pastaim brata bilong en, Andru, i bin bringim gutpela nius long em olsem: “Mipela i lukim pinis Mesaia.” Laip bilong Pita i stat long senis taim em i harim dispela tok. I stap bilong em bai i no wankain moa olsem bipo.​​—Jon 1:​41.

Pita i sindaun long Kaperneam, em wanpela taun i stap long nambis bilong raunwara Galili. Em na Andru i save wok wantaim Jems na Jon, tupela pikinini man bilong Sebedi, long wok bisinis bilong painim pis. Tambu mama bilong Pita, na brata bilong em, Andru, i stap wantaim Pita na meri bilong em. Bilong lukautim ol wanhaus bilong em, em i mas wok strong na wok hat long painim kain kain rot long kisim pis. Yumi ken piksaim long tingting olsem planti nait em i bin wok hat tru​​—ol man i daunim ol umben bilong ol namel long tupela bot na ol i pulim ol pis i kam antap long bot. Na tu, yumi ken tingim olsem, ol i save lusim planti de long skelim skelim ol pis na salim bilong kisim mani, na stretim na klinim ol umben.

Baibel i tok, bipo Andru em wanpela disaipel bilong Jon Bilong Baptais. Na Pita i bin givim bel long harim brata bilong em i stori long ol tok Jon i bin autim. Wanpela taim, Andru i lukim Jon i poinim han long Jisas bilong Nasaret na i tok: “Lukim. Em i Pikinini Sipsip Bilong God.” Kwiktaim Andru i kamap disaipel bilong Jisas na em i amamas long tokim Pita olsem: Mesaia i kam pinis! (Jon 1:​35-​40) Taim pasin bikhet i bin kamap long Iden, 4,000 yia i go pinis, God Jehova i bin tok promis olsem wanpela man bai i kam long graun na i helpim ol man long wetim gutpela samting bai kamap. (Stat 3:​15) Andru i bin bungim dispela Man Bilong Kisim Bek ol man, em Mesaia yet! Na Pita tu i hariap i go bilong bungim Jisas.

I kam inap long dispela de, nem bilong Pita em Saimon, o Simeon. Tasol Jisas i lukim em na i tok: “ ‘Yu Saimon, pikinini bilong Jon. Bihain bai ol i kolim yu long nem Sifas.’ Dispela nem ‘Sifas’ em i wankain olsem ‘Pita.’ ” (Jon 1:​42) Dispela nem “Sifas” mining bilong en, em “ston.” Tok Jisas i mekim i wanpela tok profet. Em i save olsem bihain Pita bai stap strong olsem wanpela ston na i no surik​​—na em inap tru long stiaim ol disaipel bilong Krais. Yu ting Pita i ting olsem em bai kamap kain man olsem long bihain? I luk olsem em i no tingim em yet olsem. Sampela man long nau, em ol i ritim ol stori bilong Ol Gutnius, ol i ting Pita i no kain man olsem. Sampela i tok em i no save holim wanpela tingting tasol, em i save senisim tingting hariap.

Tru, Pita i gat ol pasin kranki bilong em. Jisas i save long ol dispela pasin kranki. Tasol olsem Papa bilong em, Jehova, oltaim Jisas i lukluk long ol gutpela pasin bilong ol man. Jisas i save olsem Pita i gat planti gutpela pasin, na Jisas i laik helpim Pita long mekim ol dispela pasin i kamap strong moa. Jehova na Pikinini bilong em i save lukim ol gutpela pasin bilong yumi long nau tu. Ating bai yumi hatwok long ting olsem tupela bai painim planti gutpela pasin i stap long yumi. Tasol yumi mas trastim tupela na yumi mas redi long larim tupela i skulim na stretim yumi olsem Pita i bin mekim.​​—1 Jon 3:​19, 20.

“Yu No Ken Pret”

Ating Pita i bin go wantaim Jisas taim em i mekim raun bilong em long autim tok. Na ating em i bin lukim Jisas i wokim namba wan mirakel bilong em long tanim wara i kamap wain long wanpela marit kaikai long Kana. Bikpela samting moa, em i bin harim ol tok Jisas i autim long ol gutpela samting bai kamap long rot bilong Kingdom Bilong God. Tasol maski em i lukim ol dispela narakain samting, em i lusim Jisas na i go bek long wok bisnis bilong painim pis. Sampela mun bihain, Pita i bungim gen Jisas, na long dispela taim Jisas i singautim Pita long bihainim em fultaim, na kirap long dispela taim i stap bilong em i senis.

Long nait olgeta Pita i wok strong long kisim pis, tasol em i no kisim. Ol i bin tromoi ol umben bilong ol planti taim long wara, tasol ol i pulim ol umben nating i kam antap. Ating Pita i mekim wok long save em i gat long kisim pis, na em i bin traim kain kain hap long raunwara. Olsem planti man bilong painim pis, ating em tu i tingting olsem sapos em inap lukluk i go insait long wara na lukim planti pis i bung bung i stap em bai gutpela, o sapos em inap stiaim ol i go insait long ol umben bilong em, em tu bai gutpela. Tasol kain tingting olsem inap mekim em i bel hevi moa yet. Dispela i no olsem wanpela spot em Pita i kisim amamas long en, nogat. Sapos em i no kisim pis, em i no inap lukautim ol wanhaus bilong em. Pita i kam han nating long nambis. Tasol maski i olsem, em i mas klinim yet ol umben. Em i bin mekim olsem i stap taim Jisas i kam bungim em.

Bikpela lain manmeri i bung raunim Jisas, na ol i harim tok bilong em. Ol i paspas long em, olsem na Jisas i kalap long bot bilong Pita na askim em long pul i go longwe liklik long nambis. Ol manmeri long nambis inap harim klia nek bilong Jisas taim em i skulim ol. Ol manmeri long nambis, na Pita tu i putim gut yau na harim tok bilong Jisas. Pita i no les long harim Jisas i stori long Kingdom Bilong God, em as tok bilong ol tok Jisas i autim. Em wanpela gutpela samting tru long helpim Krais long autim dispela tok long olgeta hap long ol gutpela samting bai painim ol manmeri long bihain! Yu ting em gutpela tingting long Pita i lusim wok bilong em bilong helpim Krais long autim dispela tok? Olsem wanem Pita na famili bilong em inap lukautim ol yet long mani na kaikai samting? Ating Pita i tingim gen nait olgeta em i bin wok long painim pis, tasol em i no bin kisim wanpela pis.​​—Luk 5:​1-3.

Taim Jisas i toktok pinis, em i tokim Pita: “Pul i go namel long wara, na tromoi ol umben i go daun bilong kisim pis.” Pita i gat tupela tingting. Em i tok: “Bikman, long nait mipela i wok hat tru i go inap tulait, na mipela i no kisim wanpela pis. Tasol bai mi bihainim tok bilong yu na tromoi ol umben.” Pita i no gat laik long tromoi gen umben i go daun long wara​​—na moa yet long nau, long wanem, i no gat pis! Tasol em i bihainim tok, na ating em i tromoi han long ol wanwok bilong em long namba tu bot long bihainim em.​​—Luk 5:​4, 5.

Pita i pilim olsem umben i hevi nogut tru taim em i stat long pulim ol umben i kam antap. Man! Em i no inap bilipim dispela samting, em i taitim bun tru na pulim strong umben, na i no longtaim, em i lukim planti pis tru ol i kalap kalap insait long umben! Em i tromoi han long ol man long namba tu bot long i kam helpim em. Ol i mekim olsem, tasol ol i luksave olsem wanpela bot tasol i no inap holim olgeta dispela pis. Ol i pulapim tupela bot wantaim long pis, tasol i gat planti pis moa i stap yet​​—hevi bilong pis i mekim na ol bot i stat long sink. Pita i kirap nogut long dispela samting. Em i bin lukim Krais i yusim pawa bilong em long bipo, tasol long nau, em i yusim pawa bilong em long helpim Pita na famili bilong em! Dispela man nau i stap wantaim Pita, em inap stiaim tu ol pis long go insait long ol umben! Pita i pret na em i brukim skru na i tok: “Bikpela, yu lusim mi na yu go. Mi man bilong sin.” Olsem wanem em inap soim olsem em inap tru long poromanim dispela Man husat i gat namba long yusim pawa bilong God long ol kain rot olsem?​​—Luk 5:​6-9.

Long gutpela pasin, Jisas i tok: “Yu no ken pret. Nau yu wok long kisim pis, tasol bihain bai yu wok long kisim ol manmeri i kam long mi.” (Luk 5:​10, 11) Nau i no taim bilong holim tupela tingting o pret. I no gat as long Pita i holim tupela tingting long wok bilong painim pis, na i no gat as long em i pret olsem em i gat ol pasin kranki na em i no inap mekim wok Jisas i singautim em long mekim. Jisas i gat bikpela wok long mekim, em wanpela wok we bai i senisim sindaun bilong olgeta man long bihain. Em i mekim wok bilong dispela God husat bai i “lusim sin bilong olgeta . . . lain.” (Aisaia 55:7) Jehova bai i lukautim ol long ol samting ol i nidim, long ol samting bilong skin na long sait bilong bilip.​​—Matyu 6:​33.

Kwiktaim Pita, Jems na Jon “i pul i go sua, na ol i lusim olgeta samting bilong ol, na ol i bihainim Jisas.” (Luk 5:​11) Pita i bilip long Jisas na long Man husat i salim Jisas i kam. Em nambawan gutpela disisen em inap mekim. Long nau, ol Kristen husat i daunim pasin bilong holim tupela tingting na pret bambai ol inap mekim wok bilong God, ol tu i soim olsem ol i gat bilip olsem bilong Pita. Kain bilip olsem long Jehova i no save lus nating.​​—Song 22:​4, 5.

“Bilong Wanem Yu Gat Tupela Tingting?”

Tupela yia bihain long Pita i bungim Jisas, em i pul long raunwara Galili long nait taim i gat strongpela win, olsem yumi stori pinis long kirap bilong stori. Tru, yumi no save em i wok long tingim wanem ol samting. I gat planti samting em inap tingting long en! Jisas i bin oraitim tambu mama bilong Pita. Jisas i bin mekim Bikpela Tok Long Maunten. Planti taim, long rot bilong wok tisa na mirakel bilong em, em i kamapim klia olsem em i dispela Mesaia, Man Jehova i bin makim. Sampela mun i lus, na Pita inap daunim liklik ol pasin kranki bilong em, olsem pasin bilong pret na holim tupela tingting. Jisas i bin makim Pita long stap olsem wanpela bilong ol 12-pela aposel! Tasol Pita i no daunim olgeta pasin bilong pret na holim tupela tingting, em samting klostu nau bai em i kisim save long en.

Namel long 3 klok moning na taim san i laik kam antap, wantu Pita i stop long pul na em i sindaun stret na i lukluk i go. Wanpela samting i wok long muv! Ating em lait bilong mun i kisim biksi na i meknais? Nogat, dispela samting i sanap stret. Em wanpela man tasol! Na em i wokabaut antap long wara! Taim em i kam klostu, i olsem em i laik abrusim ol na i go. Ol disaipel i pret, ol i ting em wanpela spirit. Dispela man i tok: “Yupela stap strong. Em mi tasol. Yupela i no ken pret.” Em Jisas tasol!​​—Matyu 14:​25-​28.

Pita i bekim tok: “Bikpela, sapos em yu tasol, orait yu tokim mi na mi ken wokabaut antap long wara na mi kam long yu.” Pastaim em i gat strongpela bel. Em i amamas tru long lukim dispela narakain mirakel, na em i laik bai bilip bilong em i ken strong moa. Em yet i laik traim dispela samting. Long gutpela pasin, Jisas i tokim Pita long kam long em. Pita i kalap i go daun long sait bilong bot na sanap antap long wara. Tingim samting Pita i pilim taim em i putim lek long wara na sanap antap long en. Ating em i kirap nogut stret taim em i wokabaut i go long Jisas. Tasol, narapela tingting i kisim em.​​—Matyu 14:29.

Pita i mas putim ai na tingting olgeta i go long Jisas. Jisas i yusim pawa bilong Jehova long mekim Pita i wokabaut antap long wara. Na Jisas i mekim olsem long wanem Pita i bilip long em. Tasol Pita i larim narapela samting i pulim tingting bilong em. Baibel i tok: “Em i lukim win i strong tumas na em i pret.” Pita i lukim biksi i wok long paitim bot, na wara bilong en i flai nabaut, na em i pret. Ating em i tingting olsem bai em i sink long dispela raunwara. Taim Pita i kirap long pret, bilip bilong em i no strong moa. Olsem na man husat i kisim nem olsem Ston, long wanem, em inap sanap strong na i no surik, nau bilip bilong em i no strong moa na em i stat long sink hariap olsem wanpela ston. Pita em wanpela hapman bilong swim, tasol em i no ting dispela bai helpim em. Em i singaut: “Bikpela, helpim mi.” Jisas i tromoi han i go na holim han bilong em na pulim em i kam antap. Orait, taim ol i sanap yet antap long wara, Jisas i skulim Pita long wanpela bikpela samting: “Yu gat liklik bilip tasol. Bilong wanem yu gat tupela tingting?”​​—Matyu 14:​30, 31.

“Bilong wanem yu gat tupela tingting?”​​—dispela tok em i stret tru! Pasin bilong holim tupela tingting inap bagarapim man. Sapos yumi larim dispela pasin i daunim yumi, isi isi em inap daunim na bagarapim bilip bilong yumi. Yumi mas wok strong long daunim dispela pasin! Olsem wanem yumi inap mekim olsem? Yumi inap mekim olsem taim yumi putim tingting olgeta long ol samting i stret. Sapos yumi tingting oltaim long ol samting i save pretim yumi, ol samting i save mekim yumi bel hevi, ol samting i save pulim nabaut tingting bilong yumi na yumi no tingim Jehova na Pikinini bilong em, orait pasin bilong holim tupela tingting bai i kamap strong long yumi. Sapos yumi putim tingting olgeta long Jehova na Pikinini bilong em, long ol samting ol i bin mekim, na ol i wok long mekim, na ol samting ol bai i mekim long ol man husat i laikim ol, orait bai yumi inap daunim ol tingting nogut i laik bagarapim yumi.

Taim Pita i bihainim Jisas i go antap long bot, em i lukim strongpela win na biksi i dai. Raunwara Galili i slip isi stret. Pita wantaim ol arapela disaipel i tok: “Tru tumas, yu Pikinini Bilong God.” (Matyu 14:33) Taim tulait i bruk antap long raunwara, Pita i pilim tru olgeta dispela samting. Em i lain olsem em i no ken larim pasin bilong pret i mekim na em i gat tupela tingting long Jehova na Jisas. Tru tumas, em i mas mekim planti senis bambai em i ken kamap olsem wanpela strongpela Kristen em Jisas i bin tok profet long en. Em i tingting strong long kisim ol dispela pasin, na long kamap strong moa long bilip. Yu tu yu gat wankain laik olsem Pita? Yu bai kisim save olsem sapos yumi bihainim pasin bilong Pita long bilip, dispela bai helpim yumi.

[Piksa long pes 22, 23]

Jisas i save olsem dispela man bilong painim pis, em inap kamap gutpela man

[Piksa long pes 23]

“Bikpela . . . Mi man bilong sin”

[Piksa long pes 24, 25]

“Em i lukim win i strong tumas na em i pret”