Yu Save Long Dispela?
Husat dispela “kepten bilong ol man i save was long tempel”? Wanem wok bilong em?
Wanpela bilong ol bikman bilong lotu Juda em ol i bin arestim aposel Pol na Jon taim ol i autim tok, em “kepten bilong ol man i save was long tempel.” (Aposel 4:1-3) Baibel i no kolim sampela samting long ol wok bilong kepten bilong tempel, tasol sampela saveman bilong raitim stori long ol samting bilong bipo ol i kisim sampela save long wok bilong dispela man.
I luk olsem long taim Jisas i stap long graun, man i holim dispela wok, em pris husat i holim wok olsem namba tu bilong hetpris. Kepten bilong tempel i save lukautim ol wok i kamap insait na ausait long banis i raunim tempel long Jerusalem. Em i lukautim pasin bilong lotu insait long tempel na em i lukautim tu lain i mekim wok olsem polis bilong tempel. Ol narapela kepten i wok aninit long em ol i lukautim ol wokman em ol i save opim na pasim ol geit bilong tempel long moning na long nait. Ol i mas was gut bambai wanpela man i no ken i go long ol hap we i tambu, na ol i save wok sekiuriti long lukautim bokis mani bilong tempel.
Ol pris na Livai husat i save wok long tempel, ol i tilim ol i go long 24 lain, na insait long wanpela wik wan wan lain i save senis senis long mekim wok, olsem na insait long wanpela yia wan wan lain i mekim dispela wok tupela taim. Ol wan wan lain i gat kepten bilong ol yet.—1 Stori 24:1-18.
Ol dispela kepten bilong tempel ol i gat bikpela namba. Baibel i stori long ol wantaim ol bikpris em ol i pasim tok long kilim i dai Jisas, na tu, ol i kisim ol wokman i wok aninit long ol bilong arestim Jisas.—Luk 22:4, 52.
Matyu 3:4 i tok olsem Jon Bilong Baptais i kaikai “ol grasopa wantaim hani bilong bus.” Yu ting grasopa em wanpela kaikai bilong ol man long dispela taim bipo?
Sampela man i no ting Jon i kaikai ol binatang, ol i tok Matyu i kolim dispela tok bilong makim ol pikinini bilong diwai lokas, o ol prut bilong bus, o wanpela kain pis. Tasol tok Grik em Matyu i yusim i makim wanpela lain grasopa, em long nau ol i kolim Acrididae. Grasopa bilong Israel em dispela grasopa bilong ples wesan nating (Schistocerca gregaria), em ol i save kam olsem bikpela lain tru na bagarapim ol samting.—Joel 1:4, 7; Nahum 3:15.
Grasopa em i nambawan kaikai tru bilong ol man bilong bipo, olsem ol Asiria na ol Itiopia, na long nau tu sampela lain Bedouin na ol Juda bilong Yemen, ol i save kaikai yet grasopa. Long Israel, ol i tingim grasopa olsem kaikai bilong ol rabisman. Taim ol i rausim pinis het, na ol lek, na bel long insait, ol i save kaikaim nupela yet, o ol i smokim long paia, o draim long san na ol i kaikaim. Sampela taim ol i save putim sol long en na putim insait long wara viniga o hani. Saveman Henri Daniel-Rops i tok swit bilong en i kain olsem swit bilong kindam.
Jon i autim tok long pes drai nating, olsem na ating grasopa em samting em inap long kisim. (Mak 1:4) Grasopa i gat 75 pesen protin, olsem na taim grasopa i miks wantaim hani, em i kamapim kaikai i gat ol gutpela marasin bilong strongim bodi.
[Piksa long pes 28]
Ol wokboi bilong Asiria i karim ol grasopa na pomigranet
[Kredit Lain]
From the book Discoveries Among the Ruins of Nineveh and Babylon (1853)