Amamas Long Wok Yu Inap Mekim Insait Long Kongrigesen

“God i bin putim olgeta hap wan wan i stap long bodi, olsem em yet i laikim.” ​—1 KO. 12:18.

1, 2. (a) Wanem samting i soim olsem olgeta wan wan insait long kongrigesen i gat wok ol i ken amamas long en? (b) Bai yumi skelim wanem ol askim long dispela stadi?

KIRAP long taim bilong lain Israel bilong bipo, kongrigesen i stap olsem rot bilong Jehova long stiaim na givim kaikai bilong spirit long lain bilong em. Olsem, bihain long ol Israel i bin daunim taun Ai, Josua i “ritim olgeta tok Moses i bin raitim long buk bilong lo. Em i ritim tok bilong God bai i mekim gut long ol sapos ol i bihainim tru tok bilong God, na tu em i ritim tok bilong God bai i bagarapim ol sapos ol i sakim tok bilong God. Josua i ritim . . . na olgeta man bilong Israel i harim.”​—Jos. 8:​34, 35.

² Long taim bilong ol aposel, aposel Pol i tokim elda Kristen Timoti olsem kongrigesen Kristen em “lain bilong God” na “strongpela pos i karim tok tru.” (1 Ti. 3:15) “Lain bilong God” long nau em ol bratasista Kristen tru i stap long olgeta hap bilong graun. Long sapta 12 bilong namba wan pas Pol i raitim long ol Korin, em i tok kongrigesen i olsem bodi bilong man. Em i tok maski olgeta wan wan insait long kongrigesen i gat narapela narapela wok, olgeta i bikpela samting. Pol i tok: “God i bin putim olgeta hap wan wan i stap long bodi, olsem em yet i laikim.” Em i tok tu olsem “ol hap bodi yumi save ting ol i nogut liklik, yumi save bilasim ol moa.” (1 Ko. 12:​18, 23) Olsem na wok em wanpela stretpela man insait long lain bilong God i mekim i no gutpela moa o nogut moa, winim wok bilong narapela gutpela Kristen, nogat. Wok bilong em i narapela kain tasol. Orait olsem wanem yumi inap save long wok yumi inap mekim insait long kongrigesen bilong God na amamas tru long en? Wanem ol samting inap mekim sampela samting long wok yumi mekim insait long kongrigesen? Na olsem wanem yumi ken ‘mekim olgeta wok i kamap gut, na bai olgeta manmeri i lukim’?​—1 Ti. 4:15.

Amamas Long Wok Yumi Inap Mekim

3. Wanem wanpela rot bilong save long wok yumi inap mekim insait long kongrigesen na soim olsem yumi amamas long en?

³ Wanpela rot bilong save long wok yumi inap mekim insait long kongrigesen na soim olsem yumi amamas long en, em olsem: Yumi mas wok gut wantaim “wokboi i gat gutpela tingting” na Gavening Bodi bilong en. (Ritim Matyu 24:​45-47.) Yumi mas skelim pasin bilong yumi long bihainim tok yumi kisim long lain wokboi. Olsem, inap planti yia, yumi bin kisim tok long ol samting bilong klos na bilas, ol amamas, na pasin bilong yusim Intenet. Olsem wanem? Yumi save bihainim dispela gutpela tok bambai yumi ken stap gut long ol samting bilong spirit? Na olsem wanem long tok yumi bin kisim long mekim oltaim famili lotu? Yumi pilim tru dispela tok na makim wanpela apinun bilong mekim famili lotu? Sapos yumi singel, yumi makim taim bilong mekim stadi bilong yumi yet long Baibel? Jehova bai blesim yumi wan wan na em bai blesim tu famili olgeta sapos yumi bihainim tok bilong lain wokboi.

4. Yumi mas tingim wanem ol samting taim yumi wokim ol disisen long ol samting bilong yumi yet?

⁴ Sampela inap tok olsem ol amamas yumi kisim na klos na bilas bilong yumi em samting bilong yumi yet long makim. Tasol Kristen husat i amamas long wok em inap mekim insait long kongrigesen, ol laik bilong em yet tasol i no ken stiaim em taim em i wokim ol disisen. Em i bikpela samting long em i mas tingim laik bilong Jehova, em dispela laik i kamap ples klia long Tok bilong em, Baibel. Tok bilong en i mas i stap olsem ‘lam bilong helpim yumi long wokabaut stret, na olsem lait bilong soim rot long yumi.’ (Sng. 119:105) Na tu, yumi bihainim savetingting taim yumi tingim olsem ol disisen yumi mekim long ol samting bilong yumi yet, dispela i mekim wanem long wok autim tok bilong yumi na long ol narapela man, insait na ausait long kongrigesen.​—Ritim 2 Korin 6:​3, 4.

5. Bilong wanem yumi mas sakim dispela tingting olsem yumi no laik bai narapela i bosim yumi?

⁵ Olsem win yumi save pulim, “dispela strongpela spirit” i stap long olgeta hap na “i wok yet insait long bel bilong ol man i save sakim tok bilong God.” (Ef. 2:2) Dispela spirit inap mekim na yumi ting oganaisesen bilong Jehova i no gat wok long stiaim yumi. Yumi no laik bihainim pasin bilong Diotrefes, husat i no ‘harim tok bilong aposel Jon.’ (3 Jo. 9, 10) Yumi mas sakim kain tingting olsem yumi no laik bai narapela i bosim yumi. Long pasin na tok yumi mekim, yumi no ken tru sakim tok bilong lain em Jehova i yusim long nau bilong givim tok. Nogat tru. (Nam. 16:​1-3) Yumi mas amamas long yumi ken wok gut wantaim lain wokboi. Na yumi mas wok strong long bihainim tok na daun long ol brata i go pas long mekim wok insait long kongrigesen bilong yumi.​—Ritim Hibru 13:​7, 17.

6. Bilong wanem yumi mas skelim sindaun bilong yumi yet?

⁶ Narapela rot bilong soim olsem yumi amamas long wok yumi inap mekim insait long kongrigesen, em olsem: Yumi skelim gut sindaun bilong yumi yet na mekim olgeta samting yumi inap mekim bilong ‘amamas tru long dispela wok yumi mekim’ na givim biknem long Jehova. (Ro. 11:13) Sampela inap mekim wok painia oltaim. Sampela i mekim wok misineri, wok wasman raun, na insait long famili Betel i stap long olgeta hap bilong graun. Planti brata na sista i helpim wok bilong sanapim ol Haus Kingdom. Planti insait long lain bilong Jehova ol i wok strong tru long lukautim famili bilong ol long ol samting bilong spirit na givim bel long autim tok long olgeta wan wan wik. (Ritim Kolosi 3:​23, 24.) Yumi ken bilip tru olsem taim yumi amamas long givim yumi yet long wok bilong God na givim bel olgeta, long olgeta taim bai i gat wok yumi ken mekim.

Ol Samting Inap Helpim o Pasim Yumi Long Mekim Wok

7. Stori long olsem wanem sindaun bilong yumi inap mekim sampela samting long wok yumi mekim insait long kongrigesen.

⁷ Em i bikpela samting long skelim sindaun bilong yumi, long wanem, dispela inap mekim sampela samting long wok yumi inap mekim insait long kongrigesen. Olsem: Wok em brata i mekim insait long kongrigesen, dispela i narapela long wok em sista inap mekim. Ol kain samting olsem krismas na helt bilong yumi i mekim sampela samting long wok yumi inap mekim insait long wok bilong Jehova. Sindaun 20:29 i tok: “Ol yangpela man i gat strong, na dispela i mekim ol manmeri i amamas long ol. Tasol ol lapun i gat waitpela gras, na ol manmeri i save tingting long dispela na givim biknem long ol.” Ol yangpela insait long kongrigesen ol i gat strong, olsem na ating ol inap mekim ol wok we man i mas yusim bikpela strong. Tasol ol lapun ol i gat gutpela tingting na save, olsem na dispela inap helpim tru kongrigesen. Yumi mas tingim tu olsem marimari bilong God i mekim na yumi inap wok insait long oganaisesen bilong Jehova.​—Ap. 14:26; Ro. 12:​6-8.

8. Olsem wanem laik bilong yumi i mekim sampela samting long wok yumi inap mekim insait long kongrigesen?

⁸ Tok piksa bilong tupela susa i kamapim klia olsem i gat narapela samting tu i stiaim wok yumi inap mekim insait long kongrigesen. Tupela wantaim i grediuet long haiskul. Sindaun bilong tupela i wankain. Papamama bilong tupela i bin wok strong long kirapim tupela long mekim wok painia bihain long ol i grediuet long skul. Taim ol i grediuet pinis, wanpela i kirap mekim wok painia, na narapela i kirap mekim wok mani fultaim. Wanem samting i mekim na ol i no makim wankain rot? Em laik bilong ol. Wan wan i makim samting em yet i laik mekim. Klostu olgeta bilong yumi i save mekim wankain samting, a? Yumi mas tingim tru samting yumi laik mekim long wok bilong God. Olsem wanem? Yumi inap mekim bikpela wok moa bilong God, maski sapos yumi mas senisim sampela samting long sindaun bilong yumi bilong mekim olsem?​—2 Ko. 9:7.

9, 10. Yumi mas mekim wanem sapos yumi no gat laik long mekim bikpela wok moa bilong Jehova?

⁹ Olsem wanem sapos yumi no gat laik long mekim bikpela wok bilong Jehova na yumi laik mekim liklik wok tasol? Long pas Pol i raitim long ol Filipai, em i tok: “God i save wok insait long bel bilong yupela. Em yet i kirapim laik bilong yupela bilong mekim ol pasin em i laikim, na em i givim yupela strong bilong mekim ol dispela pasin.” Yes, Jehova inap wok insait long bel bilong yumi na stiaim laik bilong yumi.​—Fl. 2:13; 4:13.

¹⁰ Olsem na yumi mas askim Jehova long kirapim yumi long kisim laik long mekim wok bilong em. King Devit bilong Israel bilong bipo i bin mekim olsem. Em i beten: “God, yu mas skulim mi long gutpela pasin bilong yu, na soim mi long rot bilong yu. Lainim mi long bihainim tok tru bilong yu, long wanem, yu save kisim bek mi. Long olgeta de mi save wet long yu i helpim mi.” (Sng. 25:​4, 5) Yumi ken mekim wankain, yumi ken beten askim Jehova long kirapim yumi long kisim laik long mekim ol samting em i laikim. Taim yumi tingim pasin bilong God Jehova na Pikinini bilong em long tingim tru samting yumi mekim long wok bilong ol, dispela i kirapim bel bilong yumi long amamas tru long tupela. (Mt. 26:​6-10; Lu. 21:​1-4) Taim yumi amamas long tupela, dispela inap mekim na yumi askim Jehova long kirapim yumi long kisim laik long mekim bikpela wok moa bilong em. Pasin bilong profet Aisaia i stap olsem gutpela piksa yumi mas bihainim. Taim em i harim Jehova i tok: “Bai yumi salim husat? Husat bai i bringim tok bilong mi i go?” Dispela profet i tok: “Yu salim mi.”​—Ais. 6:8.

Mekim Sampela Wok Moa

11. (a) I gat wanem as na ol brata i mas wok strong moa long winim ol mak bilong mekim wok insait long oganaisesen? (b) Olsem wanem brata inap winim mak bilong mekim ol wok?

¹¹ Inap 289,678 manmeri i kisim baptais long sevis yia bilong 2008, olsem na ol brata i mas wok strong moa long i go pas long mekim wok. Ol brata i mas mekim wanem? Ol i mas wok strong long winim ol mak em Baibel i kamapim bilong mekim wok kongrigesen sevan na wok elda. (1 Ti. 3:​1-10, 12, 13; Ta. 1:​5-9) Olsem wanem brata i ken wok strong long winim ol dispela mak? Em i mas givim bel long autim tok, givim bel long mekim ol wok bilong kongrigesen, wok strong long mekim ol bekim bilong em long ol miting Kristen i kamap gutpela moa, na tingim tru ol wanbilip. Dispela i soim olsem em i amamas long wok em inap mekim insait long kongrigesen.

12. Olsem wanem ol yangpela inap soim olsem ol i givim bel long tok i tru?

¹² Ol yangpela brata, na moa yet ol brata em krismas bilong ol i namel long 13 na 19, i ken mekim wanem bilong winim ol mak insait long kongrigesen? Ol i ken wok strong long kisim “olkain gutpela save na tingting” long rot bilong kisim save long Baibel. (Kl. 1:9) Sapos ol i givim bel long stadi long Baibel na bekim tok long ol miting bilong kongrigesen, dispela bai helpim ol long mekim olsem. Narapela rot bilong ol yangpela brata long winim ol mak, em ol i mas wok strong bambai ol inap i go insait long “bikpela dua” we ol i ken mekim kain kain wok insait long fultaim sevis. (1 Ko. 16:​9, NW) Taim ol yangpela i insait long fultaim sevis, dispela i mekim na ol i stap belgut na ol i kisim planti blesing.​—Ritim Saveman 12:1.

13, 14. Long wanem ol rot ol sista i ken soim olsem ol i amamas long wok ol inap mekim insait long kongrigesen?

¹³ Ol sista tu i ken soim olsem ol i amamas long ol i insait long wok bilong truim tok bilong Song 68:11. Dispela ves i tok: “Bikpela i givim tok long ol manmeri bilong en, na planti meri i go autim dispela tok.” Wanpela gutpela rot tru we ol sista i ken kamapim amamas bilong ol long wok ol inap mekim insait long kongrigesen, em wok bilong kamapim ol disaipel. (Mt. 28:​19, 20) Olsem na long rot bilong givim bel long autim tok na daunim sampela laik bilong ol yet bilong ol i ken mekim dispela wok, ol sista i kamapim klia olsem ol i tingim tru wok ol inap mekim insait long kongrigesen.

¹⁴ Taim Pol i raitim pas i go long Taitus, em i tok: ‘Ol lapun meri i mas wokabaut long pasin God i laikim. Ol i mas skulim ol arapela long mekim gutpela pasin, na ol yangpela meri bai i save gut long pasin bilong laikim tru ol man bilong ol na ol pikinini bilong ol. Na ol yangpela meri bai i bosim gut tingting bilong ol yet, na ol bai i stap klin tru long ai bilong God. Na ol bai i save long pasin bilong lukautim gut haus bilong ol, na long mekim gutpela pasin long ol man na ol pikinini bilong ol, na long aninit long ol man bilong ol. Na sapos ol i mekim ol dispela pasin, orait ol man bai i no inap tok nogut long tok bilong God.’ (Ta. 2:​3-5) Ol strongpela sista inap kamapim planti gutpela samting insait long kongrigesen! Taim ol i rispektim ol brata i go pas long mekim wok na ol i wokim gutpela disisen long ol klos na bilas ol i pasim, na long ol samting bilong amamas, ol i stap gutpela piksa long ol arapela na ol i soim olsem ol i tingim tru wok ol inap mekim insait long kongrigesen.

15. Ol singel sista i ken mekim wanem bilong karim hevi bilong i stap wanpis?

¹⁵ Ating sampela taim i hatwok long singel sista long save long wok em inap mekim insait long kongrigesen. Wanpela sista husat i bin pilim olsem, em i tok: “Sampela taim mipela ol singel i pilim olsem mipela i stap wanpis tru.” Taim ol i askim em long olsem wanem em inap karim hevi bilong dispela, em i tok: “Pasin bilong beten na stadi i helpim mi long tingim gen wok mi inap mekim. Mi skelim ol tok i kamapim tingting em Jehova i gat long mi. Na mi tingim ol narapela insait long kongrigesen na mi traim long helpim ol. Dispela i helpim mi na mi no tingting long mi yet tasol.” Long Song 32:​8, Jehova i tokim Devit: “Bai mi skulim yu na lainim yu.” Yes, Jehova i save tingim olgeta wan wan wokboi bilong em, ol singel sista tu, na em bai helpim ol long save long wok ol inap mekim insait long kongrigesen.

Holimpas Wok Yu Inap Mekim!

16, 17. (a) Taim yumi bihainim singaut bilong Jehova long insait long oganaisesen bilong em, bilong wanem dispela em i nambawan gutpela disisen yumi bin mekim? (b) Olsem wanem yumi ken holimpas wok yumi inap mekim insait long oganaisesen bilong Jehova?

¹⁶ Long gutpela pasin Jehova i bin bringim olgeta wan wan wokboi bilong em i kam klostu long em. Jisas i tok: “I no gat wanpela man inap i kam long mi long laik bilong em yet. Nogat. Papa i mas kirapim tingting bilong en na bringim em i kam long mi.” (Jo. 6:44) Namel long planti bilion manmeri i stap long graun, Jehova i bin singautim yumi i kam insait long kongrigesen bilong em long nau. Yumi bihainim dispela singaut na dispela em i nambawan gutpela disisen yumi bin mekim. Dispela i mekim na laip bilong yumi i gat as tru bilong en. Na yumi stap belgut na amamas tru, long wanem, yumi gat wok yumi inap mekim insait long kongrigesen!

¹⁷ Man bilong raitim song i tok: “Bikpela, mi laikim tru haus bilong yu.” Na em i tok tu olsem: “Mi save sanap strong. I no gat wanpela samting i ken bagarapim mi. Bai mi litimapim nem bilong yu, God, namel long ol manmeri i bung bilong lotu.” (Sng. 26:​8, 12) Dispela God tru i bin stretim rot na yumi olgeta wan wan i gat wok yumi inap mekim insait long oganaisesen bilong em. Taim yumi bihainim tok i kam long oganaisesen bilong God na bisi long mekim wok bilong em, yumi ken holimpas gutpela wok yumi inap mekim insait long oganaisesen bilong Jehova.

Yu Inap Tingim?

• Bilong wanem yumi ken ting olsem olgeta Kristen i gat wok ol inap mekim insait long kongrigesen?

• Olsem wanem yumi soim olsem yumi amamas long wok yumi inap mekim insait long oganaisesen bilong God?

• Wanem ol samting inap mekim sampela samting long wok yumi inap mekim insait long kongrigesen?

• Olsem wanem ol yangpela Kristen na ol lain i bikpela pinis ol i ken soim olsem ol i amamas long wok ol inap mekim insait long oganaisesen bilong God?

[Ol Piksa long pes 16]

Olsem wanem ol brata i ken winim mak bilong mekim wok insait long kongrigesen?

[Piksa long pes 17]

Olsem wanem ol sista i ken soim olsem ol i amamas long wok ol inap mekim insait long kongrigesen?