Kamapim Klia Olsem Yu Wok Long Kamap Strong Moa
“Oltaim yu mas lukautim gut ol dispela wok bilong yu. Yu mas wok hat long mekim olgeta dispela wok i kamap gut, na bai olgeta manmeri i lukim [“yu wok long kamap strong moa,” NW].”—1 TI. 4:15.
1, 2. Stori long sindaun bilong Timoti taim em i yangpela yet. Wanem senis i bin kamap taim em i gat 20 krismas samting?
TAIM Timoti i mangi yet, em i sindaun long Galesia, em wanpela provins bilong Rom. Insait long ol yia bihain long dai bilong Jisas, planti kongrigesen Kristen i bin kamap long dispela hap. Bihain, yangpela Timoti, mama, na bubu meri bilong em ol i kamap Kristen na mekim wok insait long wanpela bilong ol dispela kongrigesen. (2 Ti. 1:5; 3:14, 15) Taim Timoti i yangpela Kristen em i stap amamas long dispela hap. Tasol wantu, sampela senis i kamap.
2 Ol senis i kirap taim aposel Pol i kam visitim dispela hap long namba tu taim. Ating long dispela taim, Timoti i gat 20 krismas samting. Taim Pol i raun, ating long Listra, em i tingim tok ol brata bilong ol kongrigesen long dispela hap i mekim, em ol i tok olsem “Timoti i gutpela man.” (Ap. 16:2) Yangpela Timoti i kamap strong moa na i gat tingting bilong man i bikpela pinis. Bihain, holi spirit i stiaim Pol na ol elda, na ol i putim han antap long het bilong Timoti. Ol i makim em bilong mekim bikpela wok insait long kongrigesen.—1 Ti. 4:14; 2 Ti. 1:6.
3. Timoti i bin kisim wanem narakain gutpela wok?
3 Timoti i kisim narapela kain singaut—long kamap man bilong raun wantaim aposel Pol! (Ap. 16:3) Pilim tingting bilong Timoti, ating em i bin kirap nogut na amamas tru! Inap planti yia, Timoti bai raun wantaim Pol na sampela taim wantaim sampela narapela, na mekim ol wok ol aposel na ol hetman i tokim em long mekim. Pol na Timoti i mekim wok wasman raun em dispela wok i strongim tru ol brata long ol samting bilong spirit. (Ritim Aposel 16:4, 5.) Olsem na planti Kristen i save olsem Timoti em i strongpela brata. Taim aposel Pol i bin wok wantaim Timoti inap 10-pela yia samting, em i tokim ol Filipai: “I no gat narapela man i stap wantaim mi em i wankain olsem Timoti. Em i save wanbel wantaim mi na oltaim em i save tingting long painim rot bilong helpim yupela. . . . Yupela i save long gutpela pasin bilong Timoti. Yupela i save, em i bin helpim mi long wok bilong gutnius, olsem pikinini i save helpim papa.”—Fl. 2:20-22.
4. (a) Timoti i bin kisim wanem bikpela wok? (b) Tok bilong Pol long 1 Timoti 4:15 i kirapim yumi long mekim wanem ol askim?
4 Long taim Pol i bin raitim pas long ol Filipai, em i givim wanpela bikpela wok tru long Timoti—em wok bilong makim ol elda na kongrigesen sevan. (1 Ti. 3:1; 5:22) Tru tumas, Timoti i bin kamap wanpela wasman Kristen em ol narapela inap bilip long em. Tasol long dispela wankain pas, Pol i tokim Timoti long kamapim klia long olgeta man olsem em i “wok long kamap strong moa.” (1 Ti. 4:15, NW) Tasol Timoti i bin kamapim klia pinis olsem em i strong long ol samting bilong spirit. Olsem na wanem mining bilong dispela tok bilong Pol, na olsem wanem dispela tok i ken helpim yumi?
Kamapim Klia Ol Gutpela Pasin Kristen
5, 6. Wanem samting i laik bagarapim kongrigesen Efesus long ol samting bilong spirit? Olsem wanem Timoti inap lukautim kongrigesen na kongrigesen bai stap klin?
5 Orait nau yumi skelim ol ves i stap klostu long 1 Timoti 4:15. (Ritim 1 Timoti 4:11-16.) Paslain long Pol i raitim ol dispela tok, em i bin go long Masedonia, tasol em i bin askim Timoti long stap long Efesus. Bilong wanem? Long wanem, sampela long dispela taun i wok long brukim lain insait long kongrigesen long rot bilong kamapim ol bilip giaman. Timoti i mas lukautim kongrigesen na bai em i stap klin long ol samting bilong spirit. Olsem wanem em bai mekim dispela wok? Wanpela rot em olsem: Em i stap gutpela piksa long ol narapela i ken bihainim.
6 Pol i tokim Timoti: “Yu mas mekim ol gutpela pasin tasol, bai ol Kristen i ken lukim pasin bilong yu na bihainim. Yu mas mekim gutpela pasin long tok bilong yu na long wokabaut bilong yu na long pasin bilong laikim tru ol arapela na long pasin bilong bilip na long pasin bilong i stap klin tru.” Na Pol i tok moa: “Yu mas wok hat long mekim olgeta dispela wok i kamap gut, na bai olgeta manmeri i lukim [“yu wok long kamap strong moa,” NW].” (1 Ti. 4:12, 15) Taim Pol i tokim Timoti long kamap strong, em i no toktok long bikpela namba Timoti inap kisim, nogat, em i toktok long ol gutpela pasin Kristen bilong Timoti. Olgeta Kristen i mas i gat laik long mekim ol pasin Kristen bilong ol i kamap strong moa.
7. Olgeta insait long kongrigesen i mas mekim wanem?
7 Olsem long taim bilong Timoti, long nau tu i gat narapela narapela wok insait long kongrigesen. Sampela i mekim wok elda o kongrigesen sevan. Sampela narapela i insait long wok painia. Na sampela i mekim wok wasman raun, wok long Betel, o mekim wok misineri. Ol elda i save insait long narapela narapela wok bilong skulim ol man, olsem long ol kibung. Tasol olgeta Kristen—ol man, ol meri, na ol yangpela—inap wok long kamap strong moa long ol samting bilong spirit. (Mt. 5:16) Na olsem Timoti, ol Kristen husat i gat bikpela wok insait long oganaisesen, ol narapela i mas lukim olsem ol tu i wok strong long kamapim ol gutpela pasin Kristen.
Stap Gutpela Piksa Long Pasin Bilong Toktok
8. Toktok bilong yumi inap mekim wanem long wok lotu bilong yumi?
8 Wanpela samting we Timoti i mas stap gutpela piksa, em pasin bilong em long toktok. Olsem wanem yumi inap kamapim klia olsem pasin bilong yumi long toktok i wok long kamap gutpela moa? Tok yumi mekim i kamapim klia yumi wanem kain man. Jisas i tok: “Man em i save autim kain tingting i pulap long bel bilong en.” (Mt. 12:34) Jems, brata bilong Jisas, em tu i luksave long ol samting em toktok bilong yumi inap mekim long wok lotu bilong yumi. Em i tok: “Sapos wanpela man i ting olsem, ‘Mi gutpela Kristen na mi save lotu tru long God,’ tasol em i no bosim gut maus bilong en, orait em i save giamanim em yet. Olsem na bilip bilong en na lotu bilong en em i samting nating tasol.”—Jem. 1:26.
9. Long wanem ol rot yumi mas stap gutpela piksa long pasin bilong toktok?
9 Toktok bilong yumi inap kamapim klia long ol narapela insait long kongrigesen olsem yumi wok long kamap strong moa long ol samting bilong spirit o olsem wanem. Olsem na yumi no ken mekim tok i no gutpela, o toktok planti, o mekim tok i bagarapim bel bilong narapela, nogat, ol strongpela Kristen i laik mekim tok i strongim ol narapela na i mekim gut bel bilong ol. (Snd. 12:18; Ef. 4:29; 1 Ti. 6:3-5, 20) Pasin bilong yumi long redi long tokim ol narapela man long stretpela pasin yumi laik bihainim na mekim ol tok bilong sambai long ol lo bilong God, dispela inap kamapim klia pasin bilong yumi long givim bel tru long God. (Ro. 1:15, 16) Ol man i gat gutpela bel ol bai luksave long pasin bilong yumi long toktok na ol inap long bihainim dispela pasin bilong yumi.—Fl. 4:8, 9.
Stap Gutpela Piksa Long Wokabaut na Pasin i Klin
10. Bilong wanem bilip i no gat pasin giaman long en i bikpela samting bilong yumi ken kamap strong moa?
10 Bilong stap gutpela piksa, Kristen i mas mekim ol tok i strongim narapela, na em i mas mekim sampela samting moa. Sapos man i mekim ol tok i stret, tasol em i no mekim pasin i stret, dispela bai makim olsem em i man bilong tupela maus. Pol i save long dispela kain pasin giaman bilong ol Farisi na ol samting nogut dispela i kamapim. Em i givim tok lukaut long Timoti long em i no ken mekim kain pasin giaman olsem. (1 Ti. 1:5; 4:1, 2) Tasol Timoti i no man bilong tupela maus. Long namba tu pas Pol i raitim long Timoti, em i tok: “Mi tingim dispela bilip i stap long yu na i no gat pasin giaman long en.” (2 Ti. 1:5, NW) Tasol Timoti i mas kamapim klia long ol narapela olsem em i wanpela gutpela Kristen. Em i mas stap gutpela piksa long wokabaut bilong em.
11. Pol i tok wanem long Timoti long mani kago?
11 Long tupela pas Pol i raitim long Timoti, em i toktok long ol narapela narapela pasin Timoti i mas bihainim long wokabaut bilong em. Olsem, Timoti i mas abrusim pasin bilong bungim planti mani kago. Pol i tok: “Pasin bilong laikim tumas mani em i as bilong olgeta pasin nogut. Sampela man ol i bin laikim tumas mani, na dispela pasin i pulim ol na ol i lusim bilip pinis, na ol i karim bikpela hevi moa.” (1 Ti. 6:10) Pasin bilong laikim tumas mani kago i makim olsem man i no strong long ol samting bilong spirit. Tasol ol Kristen husat i amamas long liklik samting ol i holim, olsem “kaikai na laplap samting,” ol i kamapim klia olsem ol i kamap strong long ol samting bilong spirit.—1 Ti. 6:6-8; Fl. 4:11-13.
12. Olsem wanem yumi ken soim long wokabaut bilong yumi yet olsem yumi wok long kamap strong moa?
12 Pol i tokim Timoti long em i bikpela samting long ol meri Kristen i mas ‘putim ol gutpela klos samting, inap tasol long ol na ol i no ken hambak.’ (1 Ti. 2:9) Ol meri husat i gat pasin daun na i bihainim gutpela tingting taim ol i makim ol klos na bilas bilong ol, na ol narapela samting long i stap bilong ol, ol i stap gutpela piksa tru. (1 Ti. 3:11) Dispela stiatok i stret tu long ol man Kristen. Pol i tokim ol wasman long “sindaun gut na bihainim ol gutpela tingting tasol na mekim ol gutpela pasin.” (1 Ti. 3:2) Taim yumi kamapim ol dispela pasin long ol samting yumi mekim long olgeta de, ol narapela bai lukim olsem yumi wok long kamap strong moa.
13. Olsem Timoti, olsem wanem yumi inap i stap gutpela piksa long pasin i klin?
13 Timoti i stap gutpela piksa tu long pasin i klin. Taim Pol i mekim dispela tok, em i toktok long stretpela pasin em man i mas mekim long ol meri. Timoti i mas was gut long pasin em i mekim long ol meri, em i mas mekim stretpela pasin tasol. Em i mas ‘mekim wankain pasin long ol lapun meri olsem em i save mekim long ol mama. Na em i mas mekim wankain pasin long ol yangpela meri olsem em i save mekim long ol susa bilong em, em long pasin i klin tru.’ (1 Ti. 4:12; 5:2) Kristen inap ting pasin pamuk em i mekim i stap hait, tasol God i save long en na bihain ol narapela tu bai save long en. Na ol gutpela wok em Kristen i mekim, ol dispela tu i no stap hait. (1 Ti. 5:24, 25) Olgeta insait long kongrigesen i gat rot bilong kamap strong moa long pasin bilong wokabaut stret na mekim pasin i klin.
Pasin Laikim na Bilip i Bikpela Samting
14. Olsem wanem Baibel i kamapim klia olsem yumi mas i gat pasin laikim namel long yumi?
14 Wanpela bikpela hap bilong lotu Kristen tru em pasin laikim. Jisas i tokim ol disaipel bilong em: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jo. 13:35) Olsem wanem yumi inap kamapim kain pasin laikim olsem? Baibel i tokim yumi long ‘givim bel bilong yumi long ol arapela Kristen na karim hevi ol i givim yumi’ na ‘mekim gutpela pasin long ol na givim bel bilong yumi long ol, na lusim sin bilong ol,’ na mekim gut long ol. (Ef. 4:2, 32; Hi. 13:1, 2) Aposel Pol i tok: “Yupela i mas givim bel bilong yupela long ol arapela manmeri bilong God, na laikim ol tru olsem ol brata bilong yupela stret.”—Ro. 12:10.
15. Bilong wanem em i bikpela samting long olgeta i kamapim pasin laikim, na moa yet ol wasman Kristen?
15 Sapos Timoti i bin mekim hatpela pasin long ol wanbilip Kristen, dispela inap mekim na ol gutpela wok bilong em olsem tisa na wasman i lus nating. (Ritim 1 Korin 13:1-3.) Tasol pasin bilong Timoti long laikim tru ol brata, na pasin bilong em long mekim gut long ol na helpim ol, dispela i kamapim klia olsem em i wok long kamap strong moa long ol samting bilong spirit. Olsem na long pas Pol i raitim long Timoti, em i tokim Timoti long em i mas i stap gutpela piksa long pasin bilong laikim tru ol narapela.
16. Bilong wanem Timoti i mas i gat strongpela bilip?
16 Taim Timoti i stap long Efesus, samting bilong traim bilip bilong em i kamap. Sampela i autim ol bilip i no stret wantaim tok i tru bilong ol Kristen. Sampela narapela i autim ol “stori nating” o ol i mekim wok painimaut long ol tok na tingting i no helpim kongrigesen long ol samting bilong spirit. (Ritim 1 Timoti 1:3, 4.) Pol i tok ol kain man olsem ol i ‘laikim tumas pasin bilong ol yet na ol i bikhet nating tasol. Ol i no gat save liklik. Nogat. Ol i gat laik nogut bilong tok resis na tok pait nabaut long ol liklik samting nating.’ (1 Ti. 6:3, 4) Olsem wanem? I gutpela long Timoti i skelim skelim long bel ol dispela tingting kranki i wok long kam insait long kongrigesen? Nogat. Pol i tokim Timoti long “ran strong long dispela gutpela resis” na givim baksait “long olkain toktok nabaut i no bihainim tingting bilong God. Na stap longwe long ol man i ting ol i gat gutpela save na ol i mekim kain kain toktok i pait long tingting bilong God.” (1 Ti. 6:12, 20, 21) Yumi ken save tru olsem Timoti i bin bihainim dispela gutpela tok bilong Pol.—1 Ko. 10:12.
17. Wanem samting inap traim bilip bilong yumi long nau?
17 Pol i tokim Timoti olsem “bihain sampela man bai i lusim bilip bilong ol, long wanem, ol bai i putim yau long tok bilong ol spirit bilong giaman na ol spirit nogut na bihainim tok bilong ol.” (1 Ti. 4:1) Olgeta insait long kongrigesen, na ol brata i go pas long mekim wok, ol i mas bihainim pasin bilong Timoti long kamapim strongpela bilip i no save surik liklik. Long rot bilong sanap strong na sakim pasin apostet, yumi ken wok long kamap strong moa na stap gutpela piksa long pasin bilong bilip.
Kamapim Klia Olsem Yu Kamap Strong Moa
18, 19. (a) Yu ken mekim wanem na bai olgeta inap lukim olsem yu wok long kamap strong moa? (b) Stadi i kamap bihain long dispela bai skelim wanem samting?
18 Tru tumas, lukluk bilong Kristen tru, save bilong em, o namba bilong em, dispela i no makim olsem em i kamap strong o nogat. Na hamas yia em i bin mekim wok insait long kongrigesen, dispela tu i no makim dispela samting. Nogat. Pasin bilong yumi long bihainim tok bilong Jehova long tingting, toktok, na pasin bilong yumi, dispela i kamapim klia olsem yumi wok long kamap strong moa. (Ro. 16:19) Yumi mas bihainim dispela lo long laikim tru narapela narapela na kisim strongpela bilip. Yes, gutpela sapos yumi tingim tingim long bel ol tok Pol i mekim long Timoti na bai olgeta manmeri i lukim olsem yumi wok long kamap strong moa.
19 Narapela mak i kamapim klia olsem yumi strongpela Kristen, em pasin bilong amamas, em wanpela bilong ol pasin em holi spirit bilong God i save kamapim. (Ga. 5:22, 23) Stadi i kamap bihain long dispela bai skelim olsem wanem yumi ken kisim na holimpas pasin bilong amamas long taim bilong hevi.
Bai Yu Bekim Olsem Wanem?
• Toktok bilong yumi inap kamapim klia wanem samting?
• Olsem wanem wokabaut bilong yumi na pasin bilong bihainim pasin i klin i soim olsem yumi kamap strong moa?
• Bilong wanem ol Kristen i mas i stap gutpela piksa long pasin laikim na pasin bilong bilip?
[Piksa long pes 11]
Yangpela Timoti i kamap strong moa na i gat tingting bilong man i bikpela pinis
[Ol Piksa long pes 13]
Ol narapela inap lukim olsem yu kamap strong moa?