Bilong Wanem Yu Mas Dediket Long Jehova?

“Mi man bilong God, na . . . long dispela nait ensel bilong God i bin kam sanap klostu long mi.”​—AP. 27:23.

1. Ol man i redi long kisim baptais, ol i bin mekim pinis wanem ol samting? Dispela i kamapim wanem ol askim?

“LONG rot bilong ofa bilong Jisas Krais, yu hevi long ol sin yu bin mekim na yu tanim bel na yu dediket pinis long Jehova long bihainim laik bilong em?” Dispela em i wanpela bilong tupela askim ol man bilong kisim baptais i save bekim long pinis bilong tok bilong baptais. Bilong wanem ol Kristen i mas dediket long Jehova? Taim yumi dediket long God, olsem wanem dispela i helpim yumi? Bilong wanem man i mas dediket long God bambai God i ken orait long pasin bilong em long lotu? Bilong kliagut long bekim bilong ol dispela askim, pastaim yumi mas skelim mining bilong dispela tok dediket.

2. Pasin bilong dediket long Jehova i makim wanem samting?

² Pasin bilong dediket long God i makim wanem samting? Lukim tok em aposel Pol i mekim bilong stori long pasin bilong em long pas gut wantaim God. Long ai bilong planti man i stap long sip i laik bagarap, em i tok em i “man bilong God.” (Ritim Aposel 27:​22-24.) Olgeta Kristen tru i bilong Jehova. Tasol dispela graun i “stap aninit long strong bilong Satan.” (1 Jo. 5:19) Ol Kristen i kamap ol manmeri bilong Jehova taim ol i dediket long em long rot bilong beten. Kain dediket olsem em wanpela tok promis man yet i mekim. Bihain long en, em i kisim baptais long wara.

3. Baptais bilong Jisas i makim wanem samting? Olsem wanem ol disaipel bilong em i ken bihainim pasin bilong em?

³ Jisas i stap gutpela piksa long yumi taim em i wokim disisen long mekim laik bilong God. Mama i bin karim em insait long lain Israel, em lain i dediket pinis, olsem na em i dediket pinis long God. Tasol taim em i kisim baptais, em i mekim samting em Lo i no tok long mekim. Baibel i kamapim tok em i mekim: “God, mi kam pinis . . . bilong bihainim laik bilong yu.” (Hi. 10:7; Lu. 3:21) Olsem na baptais bilong Jisas i makim olsem em i givim em yet long God bilong mekim laik bilong Papa bilong em. Ol disaipel bilong em i bihainim pasin bilong em taim ol i kisim baptais. Tasol taim ol i kisim baptais long wara, dispela i soim ol man olsem ol i dediket pinis long God long rot bilong beten.

Pasin Bilong Dediket i Helpim Yumi

4. Pasin pren namel long Devit na Jonatan i kamapim klia wanem samting long pasin bilong stap gut long narapela?

⁴ Dediket bilong ol Kristen i bikpela samting tru. Em i no wanpela tok promis nating. Tasol sapos yumi dediket, olsem wanem dispela i helpim yumi? Yumi ken skelim olsem wanem pasin bilong stap gut long narapela man i save kamapim ol gutpela samting. Tingim pasin pren i stap namel long tupela man. Bilong yu ken kisim wanpela pren, yu mas redi long stap olsem wanpela pren. Dispela i makim olsem yu mas stap gut long pren bilong yu​—yu pilim olsem yu gat wok long tingim gut em. Wanpela gutpela pasin pren em Baibel i stori long en, em pasin pren bilong Devit na Jonatan. Ol i mekim strongpela tok promis long ol bai stap pren oltaim. (Ritim 1 Samuel 17:57; 18:​1, 3.) Ating planti man bai i no mekim kain strongpela tok promis olsem, tasol pasin pren bai kamap strong moa taim tupela i pilim olsem narapela i mas i stap gut long narapela.​—Snd. 17:17; 18:24.

5. Wokboi nating i mas mekim wanem bambai em inap kisim helpim bilong stap aninit long gutpela bosman?

⁵ Lo em God i bin givim long lain Israel i stori long pasin i stap namel long wokboi nating na bosman bilong em, we wokboi i kisim helpim sapos em i stap gut long bosman. Sapos wokboi i laikim gutpela sindaun, em inap wokim kontrak wantaim gutpela bosman bilong stap oltaim aninit long em. Lo i tok: “Sapos dispela wokboi i tok, ‘Mi laikim tumas bosman bilong mi, na mi laikim tumas meri na ol pikinini bilong mi, na mi no laik lusim ol,’ orait bosman bilong en i mas kisim em i go long haus bilong God. Na wokboi i mas sanap long dua o long pos bilong dua, na bos i mas kisim nil na mekim hul long yau bilong wokboi. Na bai em i stap wokboi nating bilong dispela man inap em i dai.”​—Kis. 21:​5, 6.

6, 7. (a) Olsem wanem pasin bilong i stap gut long narapela narapela i helpim ol man? (b) Yumi mas mekim wanem bilong pas gut wantaim Jehova?

⁶ Marit em i samting we man na meri i mas wok strong tru long stap gut long narapela narapela. I no olsem ol i stap gut long wanpela kontrak, nogat, ol i stap gut long narapela narapela. Sapos man na meri i stap nating wantaim na ol i no marit, tupela inap pilim olsem narapela bai i no stap gut long narapela, na ol pikinini bilong ol tu bai i no stap bel isi. Tasol man na meri husat i marit stret na i laik stap gut long marit bilong ol, ol i stap gut. Taim hevi i kamap, ol tok bilong Baibel i stap olsem as na ol i wok strong long stretim hevi bilong ol na ol i mekim long pasin laikim.​—Mt. 19:​5, 6; 1 Ko. 13:​7, 8; Hi. 13:4.

⁷ Long taim bilong ol man i bin raitim Baibel, ol i bin wokim ol kontrak insait long wok bisnis na wok mani, na dispela i bin helpim ol man. (Mt. 20:​1, 2, 8) Long nau tu i wankain. Olsem, i gutpela yumi raitim kontrak paslain long yumi kirap mekim wanpela wok bisnis o kamap wokman long wanpela kampani. Olsem na sapos pasin bilong stap gut long narapela i strongim pasin i stap namel long ol pren, ol marit, na ol wokman na bos, orait pasin bilong dediket long Jehova bai helpim yu moa yet long pas gut wantaim em! Nau yumi ken skelim olsem wanem ol manmeri bilong bipo i bin kisim helpim taim ol i dediket long God Jehova, na olsem wanem yumi ken tok dediket i no wanpela tok promis nating.

Lain Israel i Dediket Long God na Dispela i Helpim Ol

8. Taim lain Israel i dediket, dispela i makim wanem samting?

⁸ Lain Israel olgeta i dediket long Jehova taim ol i mekim tok promis long God. Jehova i bungim ol klostu long maunten Sainai, na i tokim ol: “Sapos nau yupela i holim strong kontrak bilong mi na bihainim tok bilong mi, orait bai yupela i kamap lain manmeri bilong mi.” Ol Israel i wanbel na tok: “Mipela bai mekim olgeta samting olsem Bikpela i bin tok.” (Kis. 19:​4-8) Taim lain Israel i dediket, dispela i no makim tasol olsem ol i tok promis long stap gut long wanpela wok. Nogat. Em i makim olsem ol i bilong Jehova, na Jehova i tingim ol olsem “lain manmeri” bilong em.

9. Taim lain Israel i dediket long God, olsem wanem dispela i helpim ol?

⁹ Taim lain Israel i stap olsem lain manmeri bilong Jehova, dispela i bin helpim ol. Jehova i stap gut long ol na i lukautim ol olsem wanpela papa husat i tingim tru pikinini bilong em. God i tokim lain Israel olsem: “Ating wanpela mama inap lusim tingting long pikinini em yet i bin karim na em i no sori long dispela pikinini em i bin givim susu long en, a? Ating wanpela mama inap mekim olsem, tasol mi no inap tru lusim tingting long yupela. Nogat tru.” (Ais. 49:15) Jehova i givim Lo long lain Israel bilong stiaim ol, na ol profet bilong strongim bel bilong ol, na ol ensel bilong sambai long ol. Man bilong raitim song i tok: “Em i givim tok bilong em long Jekop. Ol dispela tok na lo em i givim long ol Israel. Em i no save mekim olsem long ol arapela lain.” (Sng. 147:​19, 20; ritim Song 34:​7, 19; 48:14.) Jehova i bin lukautim lain bilong em long bipo, na olsem tasol em bai lukautim ol manmeri husat i dediket long em long nau.

As na Yumi Mas Dediket Long God

10, 11. Yumi bon insait long famili bilong God o olsem wanem? Stori long dispela.

¹⁰ Taim ol Kristen i tingting long dediket na kisim baptais, sampela inap ting, ‘Bilong wanem mi mas dediket long God bambai mi ken lotuim em?’ As na yumi mas dediket, i kamap ples klia taim yumi tingim i stap bilong yumi long ai bilong God long nau. Tingim, sin bilong Adam i mekim na yumi olgeta i kamap ausait long famili bilong God. (Ro. 3:23; 5:12) Bilong yumi ken stap insait long famili bilong God, em i bikpela samting long yumi mas dediket long em. Yumi ken skelim as na i olsem.

¹¹ I no gat wanpela bilong yumi i gat papa husat inap givim yumi kain laip em God i bin tingting long en long pastaim​—em laip i gutpela olgeta. (1 Ti. 6:19) Yumi no bin bon olsem ol pikinini bilong God, long wanem, taim namba wan man na meri i mekim sin, ol lain manmeri i no pas gut moa wantaim Papa na Man Bilong Wokim ol. (Skelim Lo 32:5.) Kirap long dispela taim na i kam, ol lain manmeri i bin stap ausait long famili bilong Jehova, ol i stap longwe long God.

12. (a) Olsem wanem ol sinman inap kam insait long famili bilong God? (b) Yumi mas mekim wanem ol samting paslain long yumi kisim baptais?

¹² Tasol yumi wan wan inap askim God long kisim yumi i go insait long famili bilong em i gat ol wokboi em i orait long ol.a Olsem wanem yumi ol sinman inap insait long famili bilong em? Aposel Pol i tok: “Taim yumi stap yet olsem birua bilong God, Pikinini Bilong God i dai bilong pinisim pasin birua na mekim yumi i kamap wanbel wantaim God.” (Ro. 5:10) Taim yumi kisim baptais, yumi askim God long mekim maus bilong bel bilong yumi i stap klin na bai em i ken orait long yumi. (1 Pi. 3:21) Tasol paslain long yumi kisim baptais, yumi mas mekim sampela samting. Yumi mas kisim save long God, lain long bilip long em, tanim bel, na senisim pasin bilong yumi. (Jo. 17:3; Ap. 3:19; Hi. 11:6) Na i gat wanpela narapela samting tu yumi mas mekim paslain long God i kisim yumi i go insait long famili bilong em. Em wanem samting?

13. Bilong wanem i stret man i mekim tok promis bilong dediket long God bambai em i ken stap insait long famili bilong Em i gat ol wokboi em i orait long ol?

¹³ Paslain long wanpela husat i stap longwe long God em inap kam insait long famili bilong God i gat ol wokboi em i orait long ol, em i mas mekim wanpela tok promis long Jehova. Bilong kliagut long as bilong dispela, tingim wanpela gutpela papa husat i tingim wanpela yangpela i no gat papamama na em i laik adoptim em long famili bilong em. Dispela papa i gat nem olsem gutpela man. Tasol paslain long em i kisim dispela yangpela olsem pikinini bilong em, papa i laik bai dispela yangpela i mekim wanpela tok promis. Olsem na papa i tok, “Paslain long mi kisim yu olsem pikinini bilong mi, yu mas promis olsem yu bai laikim na rispektim mi olsem papa bilong yu.” Sapos yangpela i amamas long mekim kain tok promis olsem, orait papa bai kisim em i go insait long famili bilong em. Dispela pasin papa i mekim i stret, a? Na olsem tasol, Jehova i kisim i go insait long famili bilong em ol man husat i amamas long mekim tok promis bilong dediket long em. Baibel i tok: “Yupela i mas givim bodi bilong yupela long God olsem ofa. Na taim yupela i stap laip bai yupela i stap ol manmeri bilong God stret na bai yupela i mekim ol pasin God i laikim.”​—Ro. 12:1.

Dediket i Kamapim Klia Pasin Laikim na Bilip

14. Olsem wanem yumi ken tok taim man i dediket, dispela i kamapim klia pasin laikim bilong em?

¹⁴ Taim yumi mekim tok promis bilong dediket long God, yumi soim olsem yumi laikim tru Jehova. Dispela promis i wankain liklik olsem tok promis bilong marit. Man Kristen i laik marit, em i kamapim pasin laikim bilong em taim em i tok promis olsem em bai stap gut long meri em i laik maritim, maski wanem samting bai kamap. Em wanpela strongpela tok promis man i mekim long narapela, em i no wanpela tok promis nating bilong mekim wanpela wok. Man Kristen i laik marit, em i save olsem em i no inap i stap wantaim meri em i laik maritim sapos em i no mekim tok promis bilong marit. Na olsem tasol, sapos yumi no mekim tok promis bilong dediket, yumi no inap kisim ol blesing em ol lain insait long famili bilong Jehova i save kisim. Olsem na maski yumi gat sin, yumi dediket long God, long wanem, yumi laik kamap lain manmeri bilong em na yumi tingting strong long stap gut long em maski wanem samting i kamap.​—Mt. 22:37.

15. Taim man i dediket, olsem wanem dispela i kamapim klia bilip bilong em?

¹⁵ Taim yumi dediket long God, dispela i kamapim bilip bilong yumi. Bilong wanem i olsem? Pasin bilong yumi long bilip long Jehova i mekim na yumi bilip olsem em i gutpela samting tru long yumi go klostu long God. (Sng. 73:28) Yumi stap namel long “ol lain i bin lusim stretpela pasin na mekim planti rong,” olsem na sampela taim bai i hatwok long yumi wokabaut wantaim God. Tasol yumi bilip long tok promis bilong God olsem em bai helpim yumi long wokabaut wantaim em. (Fl. 2:15; 4:13) Yumi save olsem yumi gat sin, tasol yumi bilip olsem Jehova bai marimari long yumi maski yumi popaia. (Ritim Song 103:​13, 14; Rom 7:​21-25.) Yumi bilip olsem Jehova bai praisim pasin bilong yumi long stap gut long em.​—Jop 27:5.

Dediket Long God, Dispela i Kamapim Amamas

16, 17. Taim yumi dediket long Jehova, bilong wanem dispela i mekim yumi stap amamas?

¹⁶ Taim yumi dediket long Jehova, dispela i kamapim amamas, long wanem, yumi givim yumi yet long em. Jisas i kamapim wanpela tok i tru taim em i tok: “Amamas bilong man i givim samting long ol arapela man, dispela i winim amamas bilong man i kisim samting bilong em yet.” (Ap. 20:35) Jisas i bin pilim tru amamas bilong pasin bilong givim taim em i mekim wok bilong em long graun. Sampela taim em i lusim malolo, kaikai, na gutpela ples bilong stap long en bambai em i ken helpim ol narapela long painim rot i go long laip. (Jo. 4:34) Jisas i amamas long mekim Papa bilong em i belgut tru. Jisas i tok: “Oltaim mi save mekim ol samting em i laikim.”​—Jo. 8:29; Snd. 27:11.

¹⁷ Jisas i soim ol disaipel bilong em long gutpela rot bilong bihainim taim em i tok: “Sapos wanpela man i laik bihainim mi, orait em i mas daunim laik bilong em yet.” (Mt. 16:24) Taim yumi mekim olsem, dispela bai helpim yumi long i go klostu moa long Jehova. Yu ting i gat narapela man husat inap tingim gut yumi na yumi ken putim yumi yet long han bilong em? Nogat tru.

18. Taim yumi inapim dediket bilong yumi long Jehova, bilong wanem dispela i givim yumi bikpela amamas moa, winim amamas yumi kisim sapos yumi dediket long wanpela samting o long wanpela man?

¹⁸ Taim yumi dediket long Jehova na inapim dediket bilong yumi long rot bilong mekim laik bilong em, dispela i givim bikpela amamas tru long yumi, winim amamas yumi kisim sapos yumi dediket long wanpela samting o long wanpela man. Olsem, planti manmeri i givim olgeta strong bilong ol bilong kisim mani kago, tasol dispela i no mekim ol i stap amamas na belgut tru. Nogat. Tasol ol man i dediket long Jehova ol i stap amamas tru. (Mt. 6:24) Ol inap i stap “wanwok bilong God” na dispela i mekim ol i stap amamas, tasol ol i no dediket long wanpela wok, nogat, ol i dediket long God bilong yumi husat i pilim tru ol samting ol i mekim. (1 Ko. 3:9) I no gat narapela man i pilim tru pasin bilong ol wokman bilong God long daunim laik bilong ol yet. Em bai mekim lain i stap gut long em i kamap yangpela gen na bai ol i ken stap aninit long lukaut bilong em inap oltaim oltaim.​—Jop 33:25; ritim Hibru 6:10.

19. Ol lain i dediket long Jehova i kisim wanem gutpela samting?

¹⁹ Taim yu dediket long Jehova, dispela i mekim na yu pas gut wantaim em. Baibel i tok: “Yupela i mas i go klostu tru long God, na em bai i kam klostu tru long yupela.” (Jem. 4:8; Sng. 25:14) Long stadi i kamap bihain long dispela, bai yumi skelim as na yumi ken bilip olsem taim yumi wokim disisen long kamap lain manmeri bilong Jehova, dispela i nambawan gutpela samting yumi mekim.

[Futnot]

Bai Yu Bekim Olsem Wanem?

• Man i dediket long God, dispela i makim wanem samting?

• Taim yumi dediket long God, olsem wanem dispela i helpim yumi?

• Bilong wanem ol Kristen i mas dediket long Jehova?

[Piksa long pes 6]

Pasin bilong inapim dediket bilong yumi i mekim yumi stap amamas inap oltaim oltaim