Jisas Krais—Tok Bilong Em i Helpim Ol Man Olsem Wanem?
“Samting i soim olsem dispela saveman bilong Kaperneam em i narapela kain tru em olsem, ol tok na pasin bilong em i wok yet long stiaim bel na tingting bilong ol man.”a—AUTHOR GREGG EASTERBROOK.
OL TOK i gat strong. Ol gutpela savetok inap kirapim laik bilong man, na helpim man long bilip na wetim gutpela samting, na senisim laip bilong em. Tok bilong Jisas Krais tasol i gat bikpela strong tru, i no gat narapela man i wankain olsem em. Man husat i harim Jisas i mekim wanpela tok bilong em antap long maunten, bihain em i tok: “Jisas i autim pinis ol dispela tok, orait ol bikpela lain manmeri ol i kirap nogut tru long skul bilong en.”—Matyu 7:28.
I kam inap long nau, ol manmeri long olgeta hap ol i save long ol tok bilong Jisas. Skelim sampela tok i gat bikpela mining.
“Yupela i no inap i stap aninit long God na long mani wantaim.”—Matyu 6:24.
“Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.”—Matyu 7:12.
“Samting bilong Sisar, em yupela i mas givim long Sisar. Na samting bilong God, em yupela i mas givim long God.”—Matyu 22:21.
“Amamas bilong man i givim samting long ol arapela man, dispela i winim amamas bilong man i kisim samting bilong em yet.”—Aposel 20:35.
Jisas i autim ol tok em planti man i tingim yet. Na tu, tok bilong em i gat strong, long wanem, em i givim stretpela save long ol man long God em i husat, na i skulim ol man long mekim i stap bilong ol i gat as tru bilong en, na i tokaut klia long rot bilong pinisim olgeta hevi bilong ol man—dispela rot em Kingdom Bilong God. Taim yumi skelim dispela tok long ol pes i kamap bihain, yumi bai kisim save long olsem wanem ol tok na pasin bilong Jisas “i wok yet long stiaim bel na tingting bilong ol man.”
[Futnot]