Jisas Krais Tok Bilong Em na Yu Yet

“Mi kam bilong ol i ken kisim laip, na bilong laip i ken pulap tru long ol.”​​—JON 10:10.

JISAS KRAIS i kam long graun bilong givim ol samting, na i no long kisim ol samting. Em i mekim wok autim tok na i givim wanpela presen i dia tumas long yumi ol manmeri bilong graun​​—em wanpela tok i tokim yumi long God na long laik bilong Em. Ol man i putim yau long dispela tok, ol inap amamas long sindaun bilong ol long nau, na planti milion man em ol i stap olsem ol Kristen tru, ol inap strongim dispela tok.a Long dispela tok Jisas i autim, bikpela samting long en em wanpela presen i winim olgeta narapela samting​​—em dispela laip bilong em i gutpela olgeta na em i givim bilong helpim yumi. Dispela em bikpela samting tru long tok em i autim; yumi bai mekim wanem taim yumi harim dispela tok, dispela bai makim olsem yumi bai kisim laip long bihain o nogat.

Samting God na Krais i givim Jisas i save olsem em bai kisim bikpela pen na i dai long han bilong ol birua. (Matyu 20:​17-​19) Maski i olsem, long tok bilong em long Jon 3:​16 em planti man i save long en, em i tok: “God i gat wanpela Pikinini tasol i stap. Tasol God i laikim tumas olgeta manmeri bilong graun, olsem na em i givim dispela wanpela Pikinini long ol. Em i mekim olsem bilong olgeta manmeri i bilip long em ol i no ken lus. Nogat. Bai ol i kisim laip i stap gut oltaim oltaim.” Jisas i tok tu olsem em i kam “bilong givim laip bilong em bilong baim bek planti manmeri.” (Matyu 20:28) Sapos ol birua bai tekewe laip bilong Jisas, bilong wanem em i tok em bai givim laip bilong em?

God i laikim tumas yumi ol manmeri bilong graun na em i stretim rot bilong kisim bek yumi long kalabus bilong sin yumi bin kisim long Adam na long samting sin i kamapim​—em indai. Bilong mekim olsem, God i salim dispela wanpela Pikinini bilong em i kam long graun bilong i dai na givim laip bilong em olsem ofa. Jisas i bihainim laik bilong Papa, na dispela laip bilong em olsem man i gutpela olgeta, em i givim dispela laip bilong helpim yumi. Dispela em pe bilong baim bek man, na em nambawan gutpela presen God i givim long yumi ol manmeri bilong graun.b Dispela presen inap helpim yumi long kisim laip oltaim.

Samting yu yet i mas mekim Yu ting pe bilong baim bek man em presen i kam long yu stret? Dispela em samting yu yet bai makim. Yumi ken tok piksa olsem: Wanpela man i holim wanpela presen bilong yu. Yu yet i mas putim han i go na kisim, na nau em bai kamap olsem presen bilong yu. Olsem tasol, Jehova i redim pinis dispela pe bilong baim bek man, tasol yu yet i mas putim han i go na kisim dispela presen na nau em bai kamap olsem presen bilong yu yet. Olsem wanem yu inap putim han i go na kisim dispela presen?

Jisas i tok ol man em ol i “bilip” long em, ol bai kisim laip oltaim. Pasin yu bihainim long wokabaut bilong yu, dispela i insait long pasin bilong bilip. (Jems 2:​26) Pasin bilong bilip long Jisas i makim olsem yu bihainim pasin i stret wantaim ol tok na ol samting em i bin mekim. Bilong mekim olsem, yu mas save gut long Jisas na Papa bilong em. Jisas i tok: “Laip bilong i stap gut oltaim, em i olsem. Ol man i kisim dispela laip, ol i save long yu, yu wanpela tasol yu God tru. Na ol i save long Jisas Krais, em yu bin salim i kam.”​​—Jon 17:3.

Inap olsem 2,000 yia i go pinis, Jisas Krais i bin autim wanpela tok we i senisim tru sindaun bilong planti milion manmeri long olgeta hap bilong graun. Olsem wanem? Yu laik kisim sampela save moa long dispela tok, na long olsem wanem dispela tok inap helpim yu na ol famili na ol pren bilong yu, long nau na i go inap oltaim oltaim? Ol Witnes Bilong Jehova bai amamas long helpim yu.

Ol stori i kamap bihain long dispela bai givim yu sampela save moa long Jisas Krais, em man husat i bin autim wanpela tok we inap senisim sindaun bilong yu inap oltaim oltaim.

[Ol Futnot]