Go Klostu Long God

“Bai Mi Mekim Ol Man Long Lain Bilong Yu i Kamap King Oltaim”

2 Samuel 7:​1-​16

LONG bipo yet na i kam inap long nau, ol man i bin rausim planti hetman bilong gavman. Sampela taim ol man i vot na rausim ol, na sampela taim ol i pait na rausim ol. Olsem wanem long Jisas Krais, em King bilong Kingdom Bilong God long heven? I gat wanpela samting inap pasim em long mekim wok olsem King em God i bin makim? Yumi inap painim bekim bilong dispela askim long ol tok Jehova i bin mekim long King Devit bilong Israel bilong bipo, olsem 2 Samuel sapta 7 i stori long en.

Long kirap bilong dispela sapta yumi kisim save olsem Devit i sem, long wanem, em i wanpela king nating tasol na em i stap long wanpela gutpela haus king, tasol Bokis Kontrak bilong God i stap long wanpela haus sel tasol.a Devit i kamapim laik bilong em long wokim wanpela gutpela haus, olsem tempel, bilong Jehova. (Ves 2) Tasol Devit i kisim save olsem em yet bai i no inap wokim dispela haus. Long rot bilong profet Natan, Jehova i tokim Devit olsem pikinini man bilong Devit bai wokim tempel.​​—Ves 4, 5, 12, 13.

Jehova i pilim tru bikpela laik bilong Devit. God i amamas long pasin bilong Devit long givim bel tru long em, na tu, God i tingim tok profet, olsem na God i mekim wanpela kontrak wantaim Devit, olsem Em bai kamapim wanpela man long lain king bilong Devit husat bai mekim wok king inap oltaim oltaim. Natan i tokim Devit long dispela strongpela tok promis bilong God olsem: “Lain bilong yu bai i no inap pinis. Na bai mi mekim ol man long lain bilong yu i kamap king oltaim.” (Ves 16) Husat em dispela Man bilong lain bilong Devit em bilong i stap king oltaim oltaim, olsem kontrak i tok?​​—Song 89:​20, 29, 34-​36.

Jisas bilong Nasaret em i wanpela tumbuna pikinini bilong Devit. Taim ensel i tokaut long Maria bai karim Jisas, ensel i tok: “God bai i putim em i stap king olsem tumbuna bilong en Devit. Em bai i stap king bilong ol lain bilong Jekop oltaim. Na wok king bilong en bai i no inap pinis.” (Luk 1:​32, 33) Olsem na kontrak God i wokim wantaim Devit i kamap tru long rot bilong Jisas Krais. Em nau, Jisas i mekim wok king long rot bilong strongpela tok promis bilong God husat i givim rait long em long mekim wok king inap oltaim oltaim, na em i no mekim wok king, long wanem, sampela man i givim dispela wok long em, nogat. Yumi no ken lusim tingting olsem long olgeta taim ol tok promis bilong God i save kamap tru.​​—Aisaia 55:​10, 11.

I gat tupela bikpela samting em 2 Samuel sapta 7 inap skulim yumi long en. Namba wan, yumi ken save tru olsem i no gat wanpela samting o wanpela man inap pasim Jisas Krais long mekim wok king. Olsem na yumi ken bilip tru olsem em bai truim ol samting em wok king bilong em i mas kamapim, em long kamapim tru laik bilong God long graun olsem i kamap long heven.​​—Matyu 6:​9, 10.

Namba tu, dispela stori i skulim gut yumi long pasin bilong Jehova. Tingim olsem Jehova i bin pilim tru na i amamas long laik bilong Devit. I gutpela tru long yumi ken save olsem Jehova i save pilim tru na i amamas long pasin bilong yumi long givim bel long lotuim em. Ating sampela taim sik o lapun i pasim yumi long mekim olgeta samting em bel bilong yumi i gat laik tru long mekim bilong lotuim God, na yumi i no inap bosim dispela samting. Sapos olsem, yumi ken save olsem Jehova i save lukim laik i stap long bel bilong yumi olsem yumi gat laik tru long givim bel long lotuim em, na dispela inap mekim gut bel bilong yumi.

[Futnot]