Yu Save Long Dispela?
Namba wan pikinini man i gat wanem ol wok bilong mekim na wanem ol gutpela samting?
▪ Kirap long bipo yet, ol wokman bilong God i save givim ol spesel samting long namba wan pikinini man. Taim papa i dai, namba wan pikinini man i kisim wok bilong i stap het bilong famili. Em bai lukautim na stap olsem het bilong famili. Long ai bilong God, namba wan pikinini man i stap olsem mausman bilong famili. Taim ol i tilim ol samting bilong papa na givim long ol pikinini, namba wan pikinini man bai kisim bikpela hap. Em bai kisim planti samting moa winim ol narapela pikinini.
Long taim bilong ol bilipman long bipo, namba wan pikinini man inap lusim namba bilong em olsem namba wan pikinini. Olsem Iso, em i bin lusim namba bilong em olsem namba wan pikinini na namba tu brata i kisim dispela namba. (Stat 25:30-34) Jekop i kisim namba bilong Ruben olsem namba wan pikinini na givim long Josep. Ruben i lusim dispela gutpela samting, long wanem, em i bin mekim pasin pamuk. (1 Stori 5:1) Tasol long Lo Bilong Moses, man i gat planti meri i no inap kisim namba bilong namba wan pikinini bilong wanpela meri bilong em na givim long namba wan pikinini man bilong narapela meri bilong em, long wanem, em i laikim moa mama bilong dispela pikinini, nogat. Papa i mas rispekim dispela rait bilong namba wan pikinini long ol samting i stret em i mas kisim.—Lo 21:15-17.
Bilong wanem ol saveman bilong lo na ol Farisi i pasim ol liklik paus i gat sampela hap tok bilong buk bilong God long en?
▪ Jisas i daunim ol birua bilong em, em ol saveman bilong lo na ol Farisi, long wanem, ol i skruim sais bilong ol dispela “ol liklik paus” i gat sampela “hap tok bilong buk bilong God long ol liklik pepa,” em ol i ting dispela bai lukautim ol. (Matyu 23:2, 5, futnot) Ol man i bihainim dispela lotu, ol i save pasim ol dispela liklik blakpela paus long pes bilong ol. Ol i save pasim dispela samting tu long sait bilong han bilong ol long antap klostu long bros bilong ol. Insait long ol dispela liklik paus i gat sampela hap tok ol i kisim long buk bilong God. Ol i bin kirap long pasim ol dispela paus (phylacteries) long pes, long wanem, ol yet i kisim tingting kranki long tok God i bin givim long ol Israel. Em i tok: “Oltaim yupela i mas tingim ol dispela lo nau mi givim long yupela. . . . Na yupela i mas raitim ol long pepa na pasim ol long han bilong yupela na long pes bilong yupela.” (Lo 6:6-8) Yumi no save long wanem taim stret ol i bin kirap pasim ol dispela liklik paus, tasol planti saveman i ting dispela pasin i bin kirap 300 o 200 yia paslain long Krais.
I gat tupela as na Jisas i daunim dispela pasin. Namba wan, ol saveman bilong lo na ol Farisi i skruim ol paus bilong ol i go bikpela bilong soim ol man olsem ol i givim bel tru long wok lotu bilong ol. Namba tu, ol dispela lain i gat tingting kranki olsem ol dispela paus bai lukautim ol. Dispela tok Grik phylakterion, em ol i tanim olsem paus, long ol narapela buk ol i tanim olsem “kem,” “banis,” o “samting bilong lukautim man.”