Go Klostu Long God

Em i Larim Yumi Yet i Makim Rot Yumi Laik Bihainim

2 KING 18:​1-7

PAPAMAMA i mas i stap gutpela piksa long ol pikinini bilong ol. Gutpela pasin bilong papamama inap helpim pikinini long kamapim ol gutpela pasin na mekim ol gutpela disisen long laip bilong ol. Tasol sori tru, planti papamama i no stap gutpela piksa long ol pikinini bilong ol. Yu ting ol dispela pikinini i no inap kamap gutpela? Bekim bilong dispela askim i stap long dispela tok i tru olsem: God Jehova i rispek long yumi wan wan na i larim yumi yet i makim rot yumi laik bihainim. Tingim stori bilong Hesekia long 2 King 18:​1-7.

Hesekia em i “pikinini man bilong Ahas” em king bilong Juda. (Ves 1) Ahas i pulim ol manmeri i stap aninit long em long lusim lotu i tru bilong Jehova. Dispela king nogut i lotuim Bal, na em i insait long pasin bilong givim ol man olsem ofa bilong paia i kukim olgeta. Em i tok na ol i kilim i dai wanpela o sampela brata bilong Hesekia. Ahas i pasim ol dua bilong tempel na “em i wokim ol alta long olgeta hap bilong Jerusalem, bilong em i ken lotuim ol giaman god.” Em i ‘mekim God i belhat tru long em.’ (2 Stori 28:​3, 24, 25) I klia tru olsem papa bilong Hesekia em i man nogut tru. Tasol yu ting Hesekia i mas mekim ol wankain pasin nogut olsem bilong papa bilong em?

Taim Hesekia i kisim wok king bilong Ahas, wantu em i kamapim klia olsem em i no inap larim pasin nogut bilong papa bilong em i stiaim pasin bilong em. Hesekia i wok yet long “mekim gutpela pasin long ai bilong Bikpela.” (Ves 3) Hesekia i bilip strong long Jehova, na “i no gat wanpela king bilong Juda i bin bilip strong long God olsem [em].” (Ves 5) Long namba wan yia bilong wok king bilong em, dispela yangpela king i kirap strongim gen lotu i tru na em i rausim olgeta ples bilong lotuim ol giaman god. Em i opim gen ol dua bilong tempel, na ol man i kirap mekim gen lotu i tru. (Ves 4; 2 Stori 29:​1-3, 27-31) Hesekia “i pas tru long Bikpela . . . na Bikpela i stap wantaim Hesekia na i helpim em.”​—Ves 6, 7.

Wanem samting i helpim Hesekia long mekim gutpela pasin na daunim pasin nogut bilong papa bilong em? Yu ting mama bilong em, Abiya​—em yumi no save gut tumas long stori bilong em​—i skulim gut pikinini man bilong em? Olsem wanem? Gutpela pasin bilong profet Aisaia husat i bin kirap mekim wok profet paslain long mama i karim Hesekia, dispela i bin mekim sampela samting long pasin bilong Hesekia?a Baibel i no stori long dispela samting. Yumi no save long wanem samting i kamap, tasol samting yumi save long en em olsem: Rot em Hesekia i makim bilong bihainim i narapela kain olgeta long pasin bilong papa bilong em.

Dispela stori bilong Hesekia i ken strongim tru ol pikinini em ol i kamap bikpela insait long famili we papamama i no stap gutpela piksa. Yumi no inap senisim ol samting i bin kamap i go pinis; yumi no inap lusim tingting long ol samting nogut i bin painim yumi bipo. Tasol ol kain samting i painim yumi i no makim olsem ol samting yumi mekim bai i no kamap gutpela, nogat. Yumi ken wokim ol gutpela disisen long nau, em ol inap helpim yumi long i stap amamas long bihain. Olsem Hesekia, yumi ken makim olsem yumi laikim tru God Jehova na yumi laik lotuim em. Taim yumi mekim olsem, i stap bilong yumi long nau bai i gat amamas bilong en, na yumi inap kisim laip oltaim long nupela taim God bai kamapim. (2 Pita 3:13; KTH 21:​3, 4) Yumi ken tenkyu tru long God long em i rispek long yumi na em i larim yumi yet i makim rot yumi laik bihainim!

[Futnot]