Olsem Wanem Yu Inap Daunim Bel Hevi?

OLSEM WANEM? Sampela taim yu save bel hevi? Yumi olgeta i save bel hevi, a? Long nau i gat bikpela hevi long mani, long olgeta hap i gat pasin bilong pait na bagarapim man, na pasin i no stret i go bikpela tru. Dispela em i as na planti manmeri i bel hevi tru, bel i kotim ol, na ol i pilim olsem ol i samting nating tasol.

Kain tingting olsem inap nogutim man. Dispela inap mekim na yumi no bilip long yumi yet, yumi no wokim gut tingting, na yumi no amamas. Baibel i tok: “Sapos taim nogut i painim yu na bun bilong yu i slek, orait yu no gat strong tru.” (Sindaun 24:10) Yumi mas i gat strong bilong yumi ken stap gut long dispela taim bilong planti hevi. Olsem na em i bikpela samting long yumi daunim ol tingting i save bagarapim bel bilong yumi.a

Baibel i kamapim sampela gutpela tok bilong helpim yumi long daunim bel hevi. God Jehova, em Man Bilong Wokim na Lukautim olgeta samting i gat laip, em i no laik bai ol wari na bel hevi i daunim yumi. (Song 36:9) Orait nau yumi ken skelim tripela rot we Tok Bilong God inap helpim yumi long daunim bel hevi.

Save Olsem God i Tingim Yu

Sampela man i ting olsem God i gat planti samting em i mas mekim na em i no gat taim bilong tingim ol samting ol i pilim long bel. Olsem wanem? Yu tu i gat dispela kain tingting? Baibel i tokaut klia olsem Man Bilong Wokim yumi i save tingim samting yumi pilim long bel. Man bilong raitim song i tok: “God i save stap klostu long ol manmeri i gat hevi. Na em i save helpim ol manmeri bilip bilong ol i bagarap.” (Song 34:18) Em i gutpela samting tru long save olsem King bilong heven na graun i stap klostu long yumi taim yumi bel hevi!

God em i no Man nogut o Man husat i no save pilim hevi bilong ol man. Baibel i tok, ‘God em i as bilong pasin laikim.’ (1 Jon 4:8) Em i laikim tru ol man na em i save tingim tru ol man husat i karim hevi. Olsem: Taim ol Israel i stap kalabus long Isip inap 3,500 yia i go pinis, Jehova i tok: “Mi lukim pinis ol i wok long mekim nogut long ol manmeri bilong mi long Isip. Na ol manmeri bilong mi i wok long singaut long mi long kisim bek ol long han bilong ol bosman nogut. Mi harim pinis dispela singaut na mi save tru long pen na hevi ol i karim. Olsem na mi kam daun bilong kisim bek ol.”​—Kisim Bek 3:​7, 8.

God i save gut long bel na tingting bilong yumi, long wanem, “em wanpela tasol i bin wokim yumi, olsem na yumi bilong em yet.” (Song 100:3) Sampela taim yumi pilim olsem ol narapela manmeri i no pilim tingting bilong yumi, tasol yumi ken save tru olsem God i save long samting yumi pilim long bel. Baibel i tok: “[God i] no save skelim ol man olsem ol man i save skelim. Nogat. Ol man i save lukluk long bodi. Tasol [God] i save lukim tingting na laik bilong man.” (1 Samuel 16:7) God i save lukim ol samting yumi pilim tru long bel.

Jehova i save lukim ol popaia na ol pasin kranki bilong yumi. Tasol yumi ken amamas olsem Man Bilong Wokim yumi em i save lusim rong bilong yumi. Man bilong raitim Baibel, em Devit, i tok: “Papa i save sori long ol pikinini bilong en. Olsem tasol Bikpela i save sori long ol manmeri i pret long em. Em i save olsem em i bin kisim graun na wokim yumi na em i tingim yumi i olsem das tasol.” (Song 103:​13, 14) Ating yumi save tingim tasol ol pasin kranki bilong yumi, tasol God i no save tingim yumi olsem. Em i save lukim ol gutpela pasin bilong yumi, na em i no tingim ol pasin kranki bilong yumi sapos yumi tanim bel tru long ol sin bilong yumi.​—Song 139:​1-3, 23, 24.

Olsem na sapos yumi pilim olsem yumi samting nating, yumi mas wok strong long daunim dispela tingting. Yumi mas tingim olsem wanem God i save tingim yumi.​—1 Jon 3:​19, 20.

Kisim Pasin Bilong Pren Gut Wantaim God

Wanem gutpela samting inap kamap sapos yumi tingim yumi olsem God i save tingim yumi? Dispela bai helpim yumi long kisim narapela pasin bilong daunim bel hevi​—em long kamap gutpela pren bilong God. Tru yumi inap kamap pren bilong God?

God Jehova em i gutpela Papa bilong yumi na em i gat strongpela laik tru long helpim yumi long pren gut wantaim em. Baibel i tok: “Yupela i mas i go klostu tru long God, na em bai i kam klostu tru long yupela.” (Jems 4:8) Tingim dispela samting: Maski yumi no gat strong na yumi sinman, yumi inap kisim pasin bilong pren gut wantaim King bilong heven na graun.

God i kamapim klia ol pasin bilong em long Baibel, bambai yumi ken save gut long em. Sapos yumi ritim Baibel long olgeta taim, yumi inap kisim save long ol gutpela pasin bilong God.b Taim yumi tingim tingim long bel ol dispela save, bai yumi pilim olsem yumi go klostu moa long Jehova. Yumi bai kisim save long ol gutpela pasin bilong em olsem em i gat pasin laikim, na em i olsem wanpela Papa i gat pasin sori.

Pasin bilong tingim gut ol tok yumi ritim long Baibel, dispela inap mekim sampela samting moa long yumi. Bai yumi go klostu moa long Papa bilong yumi long heven long rot bilong kisim ol tok bilong em na holim long bel na tingting bilong yumi, na larim ol dispela tok i stretim yumi, mekim gut bel bilong yumi, na stiaim yumi. Yumi mas mekim moa yet taim bel na tingting bilong yumi i no stap isi. Man bilong raitim song i tok: “Taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.” (Song 94:19) Tok Bilong God inap mekim gut bel bilong yumi. Taim yumi bihainim tok i tru bilong Baibel, isi isi dispela bai helpim yumi long rausim ol bel hevi bilong yumi na yumi kisim bel isi God i save givim. Jehova i save mekim gut bel bilong yumi olsem wanpela gutpela papa i save mekim long pikinini bilong em i bel hevi.

Narapela bikpela samting long kamap pren bilong God em pasin bilong toktok wantaim em long olgeta taim. Baibel i tok: “Sapos yumi bihainim laik bilong God yet na yumi beten na askim em long wanpela samting, orait em i save harim beten bilong yumi.” (1 Jon 5:14) Maski yumi gat wanem ol hevi na wari, yumi inap beten long God na askim em long helpim yumi. Sapos yumi kamapim long God olgeta samting yumi pilim long bel, yumi inap kisim bel isi. Aposel Pol i tok: “Oltaim yupela i mas tokim God long olgeta hevi bilong yupela. Yupela i mas prea long God na tok tenkyu long em, na askim em long helpim yupela. Bel isi God i save givim yumi, em i gutpela samting tru, na yumi man i no inap tru long save long as bilong en. Orait God bai i mekim yupela i stap bel isi tru, na long dispela pasin yupela bai i pas gut wantaim Krais Jisas, na bel na tingting bilong yupela bai i stap gut tru.”​—Filipai 4:​6, 7.

Taim yu bihainim wanpela sediul bilong ritim Baibel, tingim tingim long bel, na beten, yu bai pilim olsem yu wok long pas gut moa wantaim Papa bilong yumi long heven. Dispela pasin bai helpim yu long daunim pasin bilong bel hevi. Wanem narapela samting inap helpim yu?

Tingim Gutpela Samting Bai Kamap Bihain

Maski yumi gat bikpela hevi tru, yumi inap long tingim ol gutpela samting. Yumi inap mekim olsem wanem? God i helpim yumi long tingim gutpela samting bai kamap bihain. Aposel Pita i tok long dispela samting olsem: “God i promis pinis long em bai i wokim nupela skai na nupela graun, na stretpela pasin tasol bai i stap long en. Yumi wet long dispela samting tasol i mas kamap.” (2 Pita 3:13) Dispela i makim wanem samting?

Dispela tok “nupela skai” i makim wanpela gavman​—em Kingdom Bilong God long heven long han bilong Jisas Krais. “Nupela graun” i makim wanpela nupela lain manmeri i stap long graun na God i orait long ol. Aninit long wok bos bilong “nupela skai,” dispela nupela lain manmeri i stap long graun ol bai i stap fri long olgeta samting i mekim ol i bel hevi. Long ol dispela gutpela manmeri, Baibel i tokim yumi olsem God “bai i mekim drai wara i stap long ai bilong olgeta bilong ol. Na ol manmeri bai i no i dai moa, na ol bai i no bel hevi moa na krai moa, na ol bai i no inap kisim pen gen. Ol dispela samting bilong bipo ol i pinis olgeta.”​—KTH 21:4.

Ating yu wanbel olsem ol dispela tok inap mekim gut bel bilong yumi, a? Em as na Baibel i tok long ol gutpela samting God bai kamapim long ol Kristen olsem em ol samting ol i ken “amamas tru” long wetim i kamap bihain. (Taitus 2:13) Sapos yumi putim tingting olgeta long ol tok promis bilong God long gutpela samting bai painim ol man long bihain na long as na ol dispela promis bai kamap tru, bai yumi sakim ol tingting i mekim nogut bel bilong yumi.​—Filipai 4:8.

Baibel i tok pasin bilong wetim God i kisim bek yumi em i olsem hat kapa. (1 Tesalonaika 5:8) Long bipo, wanpela soldia i no inap go long pait sapos em i no putim hat kapa. Em i save olsem hat kapa bai sakim ol spia na ol i no inap bagarapim em. Wankain olsem hat kapa i save lukautim het, gutpela samting yumi bilip na wet long en inap lukautim tingting bilong yumi. Pasin bilong tingim tingim ol gutpela samting yumi wetim i kamap bihain, dispela inap helpim yumi long sakim ol tingting nogut em ol inap bagarapim bel bilong yumi.

Em nau, i gat rot long daunim bel hevi. Yu tu inap mekim olsem! Tingim olsem God i save tingim yu, go klostu long em, na tingim ol gutpela samting bai kamap bihain. Taim yu mekim olsem, yu inap save tru olsem yu bai lukim dispela taim we i no gat bel hevi moa!​—Song 37:29.

[Ol Futnot]

[Rait long pes 19]

“Mi save tru long pen na hevi ol i karim.”​—KISIM BEK 3:​7, 8

[Rait long pes 20]

“Taim mi bel hevi na mi gat planti tingting long ol samting, yu save mekim bel bilong mi i stap isi na yu mekim mi i amamas.”​—SONG 94:19

[Rait long pes 21]

“Bel isi God i save givim yumi, em i gutpela samting tru, na yumi man i no inap tru long save long as bilong en.”​—FILIPAI 4:7

[Blok/Piksa long pes 20, 21]

Sampela Skripsa i Stori Long God Jehova

“Mi God na mi as bilong marimari na sori. Na mi no save belhat kwik. Mi save laikim tru olgeta manmeri, na mi save bihainim olgeta tok bilong mi.”​—KISIM BEK 34:6.

“Bikpela i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.”​—2 STORI 16:9.

“God i save stap klostu long ol manmeri i gat hevi. Na em i save helpim ol manmeri [bel] bilong ol i bagarap.”​—SONG 34:18.

“Bikpela, yu gutpela tru na yu save rausim sin bilong mipela.”​—SONG 86:5.

“Em i save mekim gutpela pasin long olgeta manmeri na em i save marimari long olgeta samting em i bin wokim.” ​—SONG 145:9.

“Mi God, Bikpela bilong yupela. Mi save sambai long yupela na mi tokim yupela olsem, yupela i no ken pret. Bai mi helpim yupela.”​—AISAIA 41:13.

“Litimapim nem bilong God. . . . Em i God bilong mekim isi bel bilong olgeta man i gat hevi.”​—2 KORIN 1:3.

“Sapos bel bilong yumi i kotim yumi long wanpela samting, yumi ken i stap bel isi long ai bilong God. Long wanem, God em i save long olgeta samting, na save bilong en i winim tru save i stap long bel bilong yumi.”​—1 JON 3:​19, 20.

[Blok/Ol Piksa long pes 22]

Ol i Winim Pasin Bilong Bel Hevi

“Papa bilong mi em man bilong dring oltaim, na dispela i bin givim bikpela pen na hevi long mi. Inap longpela taim tru mi pilim olsem mi samting nating. Tasol taim mi kirap stadi long Baibel wantaim wanpela Witnes Bilong Jehova, mi kisim save long tok promis bilong laip oltaim long graun. Dispela gutpela bilip i mekim gut bel na tingting bilong mi. Long olgeta de mi save ritim Baibel. Olgeta taim mi save putim Baibel i stap klostu long mi. Taim mi bel hevi, mi save kisim Baibel na ritim ol ves i save mekim gut bel bilong mi. Mi save ritim ol tok long ol gutpela pasin bilong God na dispela i helpim mi long tingim olsem mi gutpela samting long ai bilong God.”​—Kátia, wanpela meri i gat 33 krismas.c

“Mi kalabus long pasin bilong dring alkohol, kisim mariwana, koken, na pulim smel bilong glu long nus. Klostu olgeta samting mi holim i pinis olgeta, na mi kamap wanpela rabisman. Tasol taim mi kirap stadi long Baibel wantaim ol Witnes Bilong Jehova, mi senisim tru i stap bilong mi. Mi kisim save long God olsem wanpela Man i stap tru. Maski mi mas wok strong yet long daunim tingting olsem mi gat asua na mi samting nating, mi lain long bilip long marimari bilong God na pasin sori bilong em. Mi bilip tru olsem God bai givim yet strong long mi long daunim bel hevi bilong mi. Pasin bilong kisim save long tok i tru bilong Baibel, em i nambawan gutpela samting i kamap long laip bilong mi.”​—Renato, wanpela man i gat 37 krismas.

“Kirap long taim mi liklik yet, mi save skelim mi yet wantaim bikbrata bilong mi. Olgeta taim mi pilim olsem em i winim mi. I kam inap long nau, mi pilim olsem mi no gutpela tumas na mi no inap mekim gut ol samting. Tasol mi gat strongpela tingting long winim dispela hevi. Long olgeta taim mi save beten long Jehova, na em i helpim mi long daunim ol dispela tingting olsem mi no gutpela tumas. Taim mi tingim olsem God i laikim tru mi na em i tingim mi, dispela i mekim gut bel bilong mi!”​—Roberta, wanpela meri i gat 45 krismas.

[Ol Futnot]