Wok Yet Long Painim Pastaim “Stretpela Pasin Bilong God”

“Wok yet long painim Kingdom pastaim na stretpela pasin bilong God na em bai givim olgeta dispela samting long yupela.”​—MT. 6:​33, NW.

1, 2. Stretpela pasin bilong God i wanem kain? Wanem samting i as bilong dispela pasin?

“WOK yet long painim Kingdom pastaim.” (Mt. 6:​33, NW) Ol Witnes Bilong Jehova long nau i save gut long dispela tok Jisas Krais i bin mekim long Bikpela Tok Long Maunten. Long olgeta wokabaut bilong yumi, yumi wok strong long soim olsem yumi laikim tru dispela Kingdom na yumi laik stap gut long en. Tasol yumi mas tingim tu namba tu hap bilong dispela tok olsem, painim “stretpela pasin bilong God.”

² Jehova, em Man Bilong Wokim olgeta samting, olsem na em i gat rait long putim lo long wanem samting i gutpela na wanem samting i nogut, na wanem samting i stret na wanem samting i no stret. (KTH 4:11) Tasol stretpela pasin bilong God i no makim olsem ol lo bilong em i strong tumas, o em i gat longpela lista bilong ol samting yumi mas mekim na no ken mekim. Nogat. Ol pasin bilong Jehova i as bilong stretpela pasin bilong em, wantaim pasin laikim, savetingting, na strong bilong em. Stretpela pasin bilong God i wok wantaim laik bilong em na ol samting em i tingting pinis long mekim. Na ol samting em i laik bai ol man i lotuim em ol i mas mekim, dispela i insait long stretpela pasin bilong em.

3. (a) Pasin bilong painim pastaim stretpela pasin bilong God i makim wanem samting? (b) Bilong wanem yumi mas wok strong long bihainim ol stretpela lo bilong Jehova?

³ Pasin bilong painim pastaim stretpela pasin bilong God i makim wanem samting? Yumi ken tok, dispela i makim pasin bilong mekim laik bilong God bambai em i ken amamas long yumi. Pasin bilong painim stretpela pasin bilong em i makim tu olsem yumi bihainim ol tingting na lo bilong God em ol i gutpela olgeta, na tingting bilong yumi yet, nogat. (Ritim Rom 12:2.) Kain pasin olsem i insait long pasin bilong yumi long pas gut wantaim Jehova. I no olsem yumi bihainim ol lo bilong em, long wanem, yumi pret long kisim strafe. Nogat. Pasin bilong yumi long laikim tru God i kirapim yumi long wok strong long mekim ol samting em i laikim taim yumi bihainim ol lo bilong em, na yumi no kamapim ol lo bilong yumi yet. Yumi save olsem i stret yumi mekim olsem, long wanem, God i wokim yumi bilong bihainim ol lo bilong em. Olsem Jisas Krais, em King bilong Kingdom Bilong God, yumi tu i mas laikim tru stretpela pasin.​—Hi. 1:​8, 9.

4. Bilong wanem em i bikpela samting long painim stretpela pasin bilong God?

⁴ Pasin bilong painim stretpela pasin bilong Jehova i bikpela samting olsem wanem? Tingim dispela samting: As bilong namba wan traim i bin kamap long gaden Iden em bilong save olsem Adam na Iv bai stap daun long namba bilong Jehova long putim ol lo o nogat. (Stt. 2:17; 3:5) Ol i no bin mekim olsem, na dispela i bin kamapim pen na dai long ol tumbuna pikinini bilong ol. (Ro. 5:12) Tasol Baibel i tok: “Sapos man i bihainim stretpela pasin na pasin bilong laikim tru ol arapela, em bai i stap gut na bai ol i mekim stretpela pasin long em na givim biknem long em.” (Snd. 21:21) Tru tumas, pasin bilong painim pastaim stretpela pasin bilong God i mekim na yumi pas gut wantaim Jehova, na long dispela rot em bai kisim bek yumi.​—Ro. 3:​23, 24.

Was Gut Long Pasin Bilong Ting Yu Yet i Stretpela Man Tru

5. Yumi mas sakim wanem samting?

⁵ Taim aposel Pol i raitim pas i go long ol Kristen long Rom, em i kamapim klia wanpela samting em yumi mas sakim bambai yumi ken painim pastaim stretpela pasin bilong God. Pol i stori long ol wanlain Juda, na em i tok: “Mi save gut long ol na mi tokaut olsem, ol i strong tumas long bihainim pasin God i laikim. Tasol ol i no klia gut long laik tru bilong God, na ol i mekim. Ol i no save long pasin God i bihainim bilong kolim yumi stretpela man, na ol i laik kamap stretpela man long strong bilong ol yet. Olsem na ol i no bin aninit long God na larim em i mekim ol i kamap stretpela man.” (Ro. 10:​2, 3) Pol i tok, ol dispela Juda i no kliagut long stretpela pasin bilong God, long wanem, ol i bisi tumas long kamap stretpela man long strong bilong ol yet.a

6. Yumi mas abrusim wanem pasin? Bilong wanem yumi mas abrusim dispela pasin?

⁶ Wanpela rot we yumi inap pundaun long dispela pasin, em long rot bilong tingim wok bilong God i olsem wanpela wok resis, olsem yumi skelim wok bilong yumi wantaim wok bilong ol narapela. Dispela kain pasin inap kirapim yumi long bilip tumas long save bilong yumi yet long mekim ol samting. Tasol sapos yumi mekim kain pasin olsem, dispela i soim olsem yumi lusim tingting long stretpela pasin bilong Jehova. (Ga. 6:​3, 4) Stretpela laik na tingting i kirapim yumi long mekim pasin i stret, em pasin bilong yumi long laikim tru Jehova. Pasin bilong kamapim olsem yumi stretpela man tru inap mekim na tok bilong yumi​—olsem yumi laikim tru God​—i no gat strong bilong en.​—Ritim Luk 16:15.

7. Jisas i mekim wanem tok piksa long pasin bilong man long ting em i stretpela man tru?

⁷ Jisas i tingting planti long ol man husat “i ting ol i stretpela man na ol arapela man i no gutpela olsem ol.” Em i toktok long dispela pasin long rot bilong wanpela tok piksa, olsem: “Tupela man i laik mekim prea, na tupela i go long tempel. Narapela em i Farisi. Na narapela em i man bilong kisim takis. Dispela Farisi em i sanap na long bel bilong em yet em i prea olsem, ‘God, mi no olsem ol arapela man, olsem na mi tenkyu long yu. Ol i save stil na mekim pasin i no stret na trabel long ol maritmeri. Tasol mi nogat. Na mi no olsem dispela man bilong kisim takis. Long olgeta wik mi save makim tupela de bilong tambu long kaikai. Na olgeta samting mi kisim, mi save tilim long 10-pela hap na givim wanpela hap long yu.’ Tasol man bilong kisim takis em i sanap longwe, na em i no laik lukluk i go antap long heven. Nogat. Em i paitim bros bilong en na i tok, ‘God, mi man bilong mekim sin. Yu ken marimari long mi.’” Na Jisas i tok, “Mi tokim yupela, long taim dispela man bilong kisim takis i go bek long haus bilong en, em tasol i kamap stretpela man long ai bilong God. Tasol dispela arapela man nogat. Long wanem, olgeta man i litimapim nem bilong ol yet, God bai i daunim ol. Na olgeta man i daunim ol yet, God bai i litimapim nem bilong ol.”​—Lu. 18:​9-14.

No Ken “Ting Yu Stretpela Man Tumas”

8, 9. Pasin bilong “ting yu stretpela man tumas” i makim wanem samting? Dispela pasin inap kirapim yumi long mekim wanem?

⁸ Saveman 7:16 (NW) i kamapim narapela samting yumi mas was gut long en. Em i tok: “Yu no ken ting yu stretpela man tumas, na yu no ken kamapim olsem yu gat bikpela savetingting tru. Bilong wanem yu laik bagarapim yu yet?” Long ves 20, man bilong raitim Baibel i tok moa long dispela samting, bilong helpim yumi long sakim kain tingting olsem. Em i tok: “I no gat wanpela stretpela man i save mekim gutpela pasin oltaim. Nogat. Sampela taim em tu i mekim sin.” Man husat i ting em i “stretpela man tumas” i kamapim ol lo bilong em yet long stretpela pasin na i skelim ol narapela man long ol dispela lo. Tasol taim em i mekim olsem, em i putim ol lo bilong em yet i go antap long ol bilong God, olsem na em i no stretpela man long ai bilong God.

⁹ Pasin bilong “ting yu stretpela man tumas” inap kirapim yumi long kisim tupela tingting long pasin bilong Jehova long mekim ol samting. Yumi mas tingim olsem, sapos yumi kisim tupela tingting long ol disisen bilong Jehova, olsem ol i stret o nogat, yumi putim ol lo bilong yumi yet long stretpela pasin i go antap long ol lo bilong Jehova. I olsem yumi putim Jehova long kot na yumi jasim em long ol lo bilong yumi yet long wanem samting i stret na wanem samting i no stret. Tasol Jehova wanpela tasol i gat rait long putim ol lo long stretpela pasin, yumi yet, nogat!​—Ro. 14:10.

10. Olsem Jop, wanem samting inap kirapim yumi long jasim God?

¹⁰ Tru, i no gat wanpela bilong yumi i laik jasim God, tasol yumi gat sin na dispela inap kirapim yumi long mekim olsem. Dispela inap kamap sapos yumi lukim pasin em yumi ting i no stret, o sapos yumi yet i karim hevi. Bilipman Jop tu i bin mekim dispela popaia. Pastaim Baibel i kolim Jop olsem ‘man i no gat asua long ai bilong God, em i save lotu na aninit long God, na bihainim olgeta tok bilong en. Na em i no save mekim wanpela pasin nogut.’ (Jop 1:1) Tasol bihain ol hevi i painim Jop, na em i ting i no stret ol dispela hevi i painim em. Dispela i kirapim Jop long tok “em yet i mekim stretpela pasin na pasin bilong God i no stret.” (Jop 32:​1, 2) Wanpela i mas stretim tingting bilong Jop. Olsem na yumi no ken kirap nogut sapos sampela taim wanpela i mas stretim tingting bilong yumi. Sapos olsem, orait wanem samting inap helpim yumi long stretim tingting bilong yumi?

Yumi No Save Long Olgeta Samting i Bin Kamap

11, 12. (a) Sapos yumi pilim olsem wanpela samting i no fea, yumi mas tingim wanem samting? (b) Bilong wanem sampela inap ting tok piksa Jisas i mekim long ol wokman long gaden wain, i soim pasin i no fea?

¹¹ Namba wan samting bilong tingim em olsem, yumi no save long olgeta samting i bin kamap. Dispela samting i bin painim Jop. Em i no bin save long ol bung bilong ol ensel bilong God long heven, we Satan i bin sutim tok giaman long em. (Jop 1:​7-12; 2:​1-6) Jop i no save olsem Satan i as bilong ol hevi bilong em. Yumi no save sapos Jop i bin save Satan em i husat tru! Olsem na em i gat tingting kranki na em i ting olsem God i as bilong ol hevi bilong em. Yes, em i isi tru long kisim tingting kranki taim yumi no save long olgeta samting i bin kamap.

¹² Tingim tok piksa Jisas i mekim long ol wokman long gaden wain. (Ritim Matyu 20:​8-16.) Jisas i stori long papa bilong gaden husat i givim wankain pe long olgeta wokman bilong em, maski ol i bin wok de olgeta o wanpela aua tasol. Yu ting olsem wanem long dispela? Yu ting em i fea? Ating wantu yu sori long ol wokman husat i bin wok de olgeta long bikpela san. Ating yu pilim olsem i stret ol i mas kisim bikpela pe moa! Sapos yu pilim olsem, orait yu inap ting papa bilong gaden i no gat pasin laikim na em i mekim pasin i no fea. Na tu, bekim em i givim long ol wokman husat i komplein, inap soim olsem em i mekim wok nogut long namba bilong em. Tasol olsem wanem? Yumi save long olgeta samting i bin kamap?

13. Yumi inap skelim tok piksa bilong Jisas long ol wokman bilong gaden wain long wanem narapela rot?

¹³ Orait nau yumi ken skelim dispela tok piksa long narapela rot. Yumi ken ting olsem papa bilong gaden long dispela tok piksa i luksave olsem olgeta dispela wokman i gat wok bilong lukautim famili bilong ol long kaikai. Long taim bilong Jisas, ol i save baim ol wokman bilong gaden long olgeta wan wan de. Pe ol wokman i kisim long olgeta wan wan de inap lukautim famili bilong ol long kaikai samting. Dispela inap helpim yumi long tingim i stap bilong ol wokman em papa bilong gaden i givim wok long ol long pinis bilong de, na ol i wok inap wanpela aua tasol. Ating ol i no inap baim kaikai bilong famili long pe bilong wanpela aua tasol; tasol ol i redi long mekim wok na ol i bin wet de olgeta long kisim wok. (Mt. 20:​1-7) I no asua bilong ol na ol i no inap wok de olgeta. Baibel i no tok olsem ol i les long mekim wok. Tingim olsem yu mas wet de olgeta bilong kisim wok, na yu save olsem famili inap kisim kaikai long pe yu kisim long dispela de. Bai yu amamas tru sapos yu kisim wok​—na bai yu kirap nogut taim yu kisim pe we inap baim kaikai bilong famili bilong yu!

14. Yumi kisim wanem skul long tok piksa bilong gaden wain?

¹⁴ Orait nau yumi ken skelim gen ol samting papa bilong gaden i mekim. Em i baim stret olgeta wokman. Em i ting ol i gat rait long kisim mani bilong lukautim ol yet na famili bilong ol. Maski ol man i nidim stret wok na papa bilong gaden inap lukim olsem dispela em sans bilong em long baim ol long liklik pe, em i no mekim olsem, nogat, em i baim stret olgeta wokman. Olgeta wokman i go bek long haus na ol i gat mani inap long baim kaikai bilong famili. Taim yumi tingim ol dispela samting, dispela inap senisim tingting bilong yumi long pasin papa bilong gaden i mekim. Disisen bilong em i gutpela na em i no mekim wok nogut long namba bilong em. Yumi inap kisim wanem skul long dispela? Olsem: Taim yumi skelim sampela samting tasol bilong ol samting i bin kamap, dispela inap mekim na yumi kisim tingting kranki. Tru tumas, dispela tok piksa i kamapim klia olsem stretpela pasin bilong God i nambawan tru, winim ol lo bilong ol man na ol samting ol man i ting i stret.

Tingting Bilong Yumi Inap Kranki o i Sot

15. Wanem samting inap mekim na tingting bilong yumi i kranki o i sot?

¹⁵ Namba tu samting yumi mas tingim taim wanpela samting i kamap na yumi ting em i no fea, i olsem: Tingting bilong yumi inap kranki o i sot. Sin, pasin bilong bel nogut long narapela lain, pasin bilong ples, ol dispela samting inap paulim tingting bilong yumi. Na tu, yumi no inap save long wanem samting i kirapim ol narapela long mekim samting na yumi no inap save long tingting i stap long bel bilong ol. Tasol tingting na save bilong Jehova na Jisas i no olsem.​—Snd. 24:12; Mt. 9:4; Lu. 5:22.

16, 17. Ating bilong wanem Jehova i no strong long ol man i mas kilim i dai Devit na Batseba olsem lo bilong em i tok?

¹⁶ Orait nau yumi ken skelim stori bilong Devit na Batseba em tupela i bin mekim pasin pamuk. (2 Sml. 11:​2-5) Olsem Lo Bilong Moses i tok, tupela i mas i dai. (Wkp. 20:10; Lo 22:22) Maski Jehova i givim strafe long ol, em i no strong long ol man i mas kilim tupela i dai olsem lo bilong em i tok. Yu ting Jehova i mekim pasin i no fea? Yu ting em i wansait long Devit na brukim lo bilong Em yet long stretpela pasin? Sampela man bilong ritim Baibel i pilim olsem.

¹⁷ Tasol Jehova i givim dispela lo i tambuim pasin pamuk long ol jas i no gutpela olgeta, em ol i no inap save long tingting i stap long bel bilong man. Maski i olsem, dispela lo i helpim ol long makim wankain strafe long olgeta man i mekim pasin pamuk. Tasol Jehova i save long tingting i stap long bel bilong man. (Stt. 18:25; 1 Sto. 29:17) Olsem na yumi no ken ting olsem ol lo em Jehova i bin givim long ol jas i gat sin, i pasim em long skelim gut ol man. Sapos ol dispela lo i pasim em, em bai wankain olsem man i fosim wanpela man husat i gat gutpela ai long werim aiglas bilong man i no gat gutpela ai. Jehova inap lukim bel bilong Devit na Batseba na em i save olsem tupela i tanim bel tru. Em i tingim dispela samting, na em i marimari na mekim gutpela pasin long tupela taim em i jasim ol.

Wok Yet Long Painim Stretpela Pasin Bilong Jehova

18, 19. Wanem samting bai helpim yumi na bai yumi no skelim Jehova long ol lo em yumi yet i putim long stretpela pasin?

¹⁸ Olsem na sapos sampela taim yumi lukim samting we yumi ting Jehova i mekim pasin i no fea​—olsem taim yumi ritim wanpela stori bilong Baibel, o sampela samting i kamap long laip bilong yumi yet​—yumi no ken skelim God long ol lo em yumi yet i putim long stretpela pasin. Tingim, sampela taim yumi no save long olgeta samting i bin kamap na tingting bilong yumi inap kranki o i sot. No ken lusim tingting olsem “belhat bilong man em i no save kamapim stretpela pasin bilong God.” (Jem. 1:​19, 20) Sapos yumi tingim dispela tok, bai yumi no ‘kros long Bikpela.’​—Snd. 19:3.

¹⁹ Olsem Jisas, oltaim yumi mas save olsem Jehova wanpela tasol i gat rait long putim lo bilong makim wanem samting i stret na i gutpela. (Mk. 10:​17, 18) Wok strong long kisim “stretpela save” long ol lo bilong God. (Ro. 10:​2, NW) Taim yumi daun long ol dispela lo na stretim wokabaut bilong yumi na bai i stret wantaim laik bilong Jehova, yumi soim olsem yumi wok yet long painim pastaim “stretpela pasin bilong God.”​—Mt. 6:​33, NW.

[Futnot]

Yu Tingim Yet?

• Bilong wanem em i bikpela samting long painim stretpela pasin bilong Jehova?

• Yumi mas was gut long wanem tupela pasin?

• Olsem wanem yumi inap painim pastaim stretpela pasin bilong God?

[Piksa long pes 9]

Tok piksa bilong Jisas long tupela man i beten long tempel i skulim yumi long wanem samting?

[Piksa long pes 10]

Yu ting i no fea long ol i givim wankain pe long man i bin wok inap wanpela aua na long man i wok inap de olgeta?