Ol Man i Askim . . .

I Gutpela Mi Joinim Wanpela Lain Lotu?

▪ Olsem wanem? Yu tingting planti long joinim wanpela lain lotu, long wanem, yu nolaik tru long pasin bilong tupela maus na brukim lain em ol lain lotu na ol pris pasto i insait long en? Sapos olsem, orait ating wanpela savetok bilong Frans i stret long samting yu pilim, em i tok: “Man i stap klostu long haus lotu, planti taim em i stap longwe long God.”

Ating yu rispek long ol tok bilong Baibel na yu pilim olsem gavman na ol man i mas rispektim rait bilong man long stap insait long wanpela lain lotu. Tasol ating yu inap kisim tingting olsem: ‘Tru tru God i laik ol man husat i laik lotuim em i mas insait long wanpela lain lotu?’

Yumi ken tok yes. Olsem wanem yumi save long dispela samting? Na i orait long joinim nating wanpela lain lotu?

Tingim pasin bilong Jisas. Olsem wanem? Em i bin insait long wanpela lain lotu? Taim em i stap pikinini yet, Jisas i joinim famili bilong em na ol narapela manmeri bilong lain Juda, na ol i save go long tempel long Jerusalem bilong mekim lotu. (Luk 2:​41-43) Taim Jisas i kamap bikpela man, em i bung wantaim ol wanlain Juda na lotuim God long ol haus lotu i stap long hap bilong em. (Luk 4:​14-16) Taim Jisas i toktok wantaim wanpela meri bilong narapela lotu, em i tok: “Mipela Juda i save lotu long samting mipela i save long en.” (Jon 4:22) Jisas i kamapim klia olsem em i insait long lotu bilong lain Juda.

Bihain Jisas i tok, ol Juda olsem wanpela lain ol i bin sakim em, olsem na God bai i sakim pasin bilong ol long lotuim em. (Matyu 23:33–24:2) Tasol em i kamapim olsem ol man i laik lotu long God na bai God i ken orait long ol, ol i mas insait long wanpela lain lotu. Em i tokim ol disaipel bilong em: “Sapos yupela wan wan i laikim tru ol arapela man bilong lain bilong mi, orait dispela bai i soim olgeta man olsem, yupela i disaipel bilong mi.” (Jon 13:35) Ol disaipel bilong Krais i mas bung wantaim ol wanbilip bambai ol i ken soim olsem ol i laikim tru ol narapela. Jisas i kamapim klia olsem long ol samting bilong lotu i gat tupela kain rot tasol bilong bihainim. Em i tok wanpela rot ‘em i bikpela na i op tumas’ na “i go long ples bilong lus.” Tasol em i tok: “Dua i go long ples bilong kisim laip, em i liklik tru, na rot i go long dispela ples em i hat tru long bihainim. Na wanpela wanpela manmeri tasol i save lukim na bihainim dispela rot.”​—Matyu 7:​13, 14.

Olsem na yumi ken save, i no olgeta lotu i orait long ai bilong God. Baibel i givim tok lukaut long pasin bilong bung wantaim ol man ‘i bihainim pasin bilong God long skin tasol na ol i no save liklik long bikpela strong i stap long pasin tru bilong God.’ (2 Timoti 3:5) Tasol yumi inap kisim bikpela helpim long rot bilong luksave na bung wantaim ol manmeri em ol i wokabaut long rot i go long laip. Yumi kisim gutpela helpim na ol tok bilong strongim yumi long nau, na yumi wetim gutpela samting bai kamap bihain.​—Hibru 10:​24, 25.

Olsem wanem yu ken save wanem lotu i bihainim dispela liklik rot? I gutpela long yu skelim bekim i kam long Baibel na i stap long sapta 15 bilong buk Tru Tru Baibel i Tok Wanem?a Dispela buk bai helpim yu long mekim gutpela disisen long wanem lotu yu mas joinim.

[Ol Futnot]