Ol Yangpela​—Larim Tok Bilong God i Stiaim Yupela

“Yu mas kisim gutpela tingting na gutpela save.”​—SND. 4:5.

1, 2. (a) Wanem samting i helpim aposel Pol long winim dispela hevi we em i hatwok long mekim pasin i stret? (b) Olsem wanem yu inap kisim gutpela tingting na gutpela save?

“TAIM mi laik mekim gutpela pasin, pasin nogut i save pasim rot bilong mi.” Yu save husat i mekim dispela tok? Em aposel Pol tasol. Pol i laikim tru Jehova, tasol sampela taim i hatwok long em i mekim pasin i stret. Dispela i mekim na em i pilim olsem wanem? Em i tok: “O sori, dispela hevi i bagarapim tru tingting bilong mi!” (Ro. 7:​21-24) Olsem wanem? Sampela taim yu tu i pilim wankain olsem Pol? Yu tu i hatwok long mekim pasin i stret? Sapos olsem, na yu pilim nogut tru olsem Pol, orait no ken bel hevi. Pol i winim dispela hevi, na yu tu inap winim.

² Pol i winim dispela hevi, long wanem, em i larim ‘ol gutpela tok’ i stiaim em. (2 Ti. 1:​13, 14) Dispela i mekim na em i kisim gutpela tingting na gutpela save bilong helpim em long winim ol hevi na wokim ol gutpela disisen. Jehova inap helpim yu long kisim gutpela tingting na gutpela save. (Snd. 4:5) Long Baibel em i bin givim yumi ol gutpela skultok i nambawan tru. (Ritim 2 Timoti 3:​16, 17.) Tingim olsem wanem ol stiatok i stap long Baibel inap helpim yu taim yu kisim sampela tok long papamama, taim yu mekim wok long mani, na taim yu wanpela i stap.

Insait Long Famili

3, 4. Olsem wanem na yu inap pilim olsem i hatwok long bihainim ol lo bilong papamama bilong yu? Tasol i gat wanem as na ol papamama i putim ol lo?

³ Olsem wanem? Yu hatwok long bihainim ol lo bilong papamama? Wanem samting inap mekim na yu pilim olsem? Wanpela as em olsem, ating yu laik bosim yu yet. Dispela laik em samting olgeta yangpela i save pilim taim ol i wok long kamap bikpela. Tasol taim yu stap long haus, yu gat wok long bihainim tok bilong papamama.​—Ef. 6:​1-3.

⁴ Taim yu kliagut long as na papamama i putim sampela lo, dispela bai helpim yu long bihainim. Tru, ating sampela taim yu pilim wankain olsem Briellea husat i gat 18 krismas, em i tok long papamama bilong em olsem: “Ol i lusim tingting olgeta long tingting bilong ol yangpela i gat wankain krismas olsem mi. Ol i no laik bai mi kamapim tingting bilong mi o wokim disisen o stap olsem bikpela meri.” Olsem Brielle, ating yu tu i pilim olsem papamama bilong yu i putim planti lo tumas i kalabusim yu. Tasol ol i putim ol lo, long wanem, ol i tingim yu. Na tu, ol papamama Kristen i save olsem ol i mas tokim Jehova long pasin ol i mekim bilong lukautim yu.​—1 Ti. 5:8.

5. Taim yu bihainim tok bilong papamama, olsem wanem dispela bai helpim yu?

⁵ Taim yu bihainim ol lo bilong papamama bilong yu, i kain olsem yu bekim dinau long beng​—taim yu bekim ol dinau long taim stret, ating beng bai orait long yu ken kisim sampela dinau moa. Na olsem tasol yu gat dinau long papamama​—yu mas rispektim ol na bihainim tok bilong ol. (Ritim Sindaun 1:8.) Taim yu bihainim tok bilong papamama, ating ol bai givim sampela fridom moa long yu. (Lu. 16:10) Tasol sapos oltaim yu wok long kalapim ol lo bilong ol, yu no ken kirap nogut sapos papamama i tekewe fridom ol i bin givim long yu.

6. Papamama i ken mekim wanem bilong helpim ol pikinini long bihainim tok?

⁶ Wanpela rot we papamama i ken helpim ol pikinini bilong ol long bihainim ol lo ol i putim, em olsem: Ol yet i mas i stap gutpela piksa. Taim ol i amamas long bihainim ol lo bilong Jehova, dispela i soim olsem ol lo bilong God i no hatwok long bihainim. Dispela bai helpim ol pikinini long kisim wankain tingting long ol lo em papamama yet i putim. (1 Jo. 5:3) Baibel i stori long sampela taim we Jehova i bin givim rot long ol wokboi bilong em long kamapim tingting bilong ol long sampela samting. (Stt. 18:​22-32; 1 Kin. 22:​19-22) Olsem wanem? I gat sampela taim we papamama i ken givim rot long ol pikinini long kamapim tingting bilong ol long sampela samting?

7, 8. (a) Wanem samting i givim hatwok long sampela yangpela? (b) Bilong ol tok bilong stretim yu i ken helpim yu, yu mas luksave long wanem samting?

⁷ Narapela samting tu em inap givim hatwok long ol yangpela, em taim papamama i sutim tok nating long ol. Sampela taim, ating yu tu i bin pilim wankain olsem yangpela man Craig, em i tok: “Mama bilong mi i olsem wanpela polismeri​—oltaim em i wok long skelim mi bilong painim ol rong mi bin mekim.”

⁸ Bilong stretim yu, sampela taim dispela i save kamap long rot bilong strongpela tok narapela i givim long yu. Baibel i kamapim olsem taim narapela i stretim yumi, yumi no save amamas. (Hi. 12:11) Yu mas tingim wanem samting na bai ol tok bilong stretim yu i ken helpim yu? Wanpela bikpela samting yu mas tingim em olsem, papamama i save givim ol skultok, long wanem, ol i laikim yu tumas. (Snd. 3:12) Ol i no laik bai yu kisim ol pasin nogut; ol i laik helpim yu long kisim ol gutpela pasin. Papamama bilong yu i luksave olsem sapos ol i no stretim yu, i olsem ol i heitim yu! (Ritim Sindaun 13:24.) Na tu, yu mas save olsem taim yu mekim rong, dispela em wanpela rot bilong kisim skul. Olsem na taim papamama i givim sampela tok bilong stretim yu, traim long painimaut ol gutpela tingting i stap insait long dispela tok bilong ol. “Gutpela na stretpela tingting i winim tru silva na gol.”​—Snd. 3:​13, 14.

9. Sapos ol yangpela i pilim olsem papamama i bin mekim pasin i no stret long ol, ol i ken mekim wanem?

⁹ Tasol sampela taim papamama yet i save mekim ol popaia. (Jem. 3:2) Taim ol i stretim yu, ating sampela taim ol i no tingting gut na mekim tok. (Snd. 12:18) Wanem samting inap mekim na papamama i mekim olsem? Ating sampela samting i bin putim hevi long ol, o ol i tingim olsem ol pasin kranki bilong yu em asua bilong ol yet. Sapos yu pilim olsem ol i bin mekim pasin i no stret long yu, nogut yu wok long tingim tingim. Gutpela sapos yu soim olsem yu tenkyu long ol i laik tru long helpim yu. Pasin bilong orait long kisim tok bilong stretim yu, dispela bai helpim yu taim yu kamap bikpela pinis.

10. Yu ken mekim wanem na bai i isi moa long yu kisim ol lo papamama i putim na ol tok ol i givim bilong stretim yu?

¹⁰ Olsem wanem? Yu laik bai i isi moa long yu bihainim ol lo bilong papamama na ol tok ol i givim bilong stretim yu? Sapos olsem, yu mas lain long toktok gut wantaim papamama. Yu ken mekim long wanem rot? Namba wan samting, putim gut yau. Baibel i tok: “Yupela olgeta i mas putim yau kwik long harim tok, tasol yupela i no ken hariap long mekim toktok, na yupela i no ken kros kwik.” (Jem. 1:19) No ken hariap long givim eskius. Traim long bosim gut bel na putim yau long ol tok papamama i mekim. Tingting long ol samting papamama i toktok long en, no ken tingting long pasin ol i bihainim long mekim ol dispela tok. Orait nau long toktok bilong yu yet, kolim ol tok papamama i bin givim long yu. Taim yu mekim olsem, ol bai save olsem yu bin putim yau long tok bilong ol. Olsem wanem sapos yu laik tokim ol long as na yu bin mekim wanpela tok o pasin? Yu ‘no ken mekim planti toktok’; pastaim mekim ol samting papamama i laik bai yu mekim, na nau yu ken kamapim tingting bilong yu. (Snd. 10:19) Taim papamama i lukim olsem yu bin putim yau long tok bilong ol, ating ol bai amamas long harim tok bilong yu. Kain pasin olsem bai kamapim klia yu larim Tok Bilong God i stiaim yu.

Long Pasin Bilong Bosim Gut Mani

11, 12. (a) Long sait bilong mani, Tok Bilong God i kirapim yumi long mekim wanem, na bilong wanem? (b) Olsem wanem papamama bilong yu inap helpim yu long bosim gut mani?

¹¹ Baibel i tok: “Mani . . . i save helpim yumi long taim nogut.” Tasol dispela wankain ves i soim olsem gutpela tingting na save i winim mani. (Sav. 7:12) Tok Bilong God i kirapim yumi long holim stretpela tingting long mani, tasol no ken laikim tumas mani. I gat wanem as na yu no ken kisim pasin bilong laikim tumas mani? Tingim dispela tok piksa: Taim saveman bilong kukim kaikai i holim wanpela naip i sap, dispela naip i wanpela gutpela tul tru. Tasol taim wanpela man nating i holim, dispela naip inap givim hevi long em. Mani i wankain olsem naip​—sapos yu mekim gutpela wok long mani, em bai helpim yu. Tasol taim ol man i “laikim tumas long kisim planti mani samting,” dispela inap mekim na ol i no pas gut moa wantaim ol pren, famili, o God. I olsem ol i sutim ol yet long planti “bikpela hevi.”​—Ritim 1 Timoti 6:​9, 10.

¹² Olsem wanem yu inap lain long bosim gut mani? I gutpela sapos yu askim papamama long helpim yu long basetim gut mani. Solomon i tok: ‘Ol man i gat save bai ol i kisim save moa yet, na long ol gutpela rot ol i ken bihainim.’ (Snd. 1:5) Wanpela yangpela meri, nem bilong em Anna, i askim papamama long gutpela rot em i ken bihainim. Em i tok: “Papa i skulim mi long pasin bilong wokim baset na bosim gut mani.” Mama bilong Anna, em tu i givim sampela skultok long Anna. Anna i tok: “Em i tokim mi long pasin bilong skelim pe bilong ol samting paslain long mi baim.” Dispela i bin helpim Anna olsem wanem? Em i tok: “Nau mi yet inap lukautim mani bilong mi. Mi no save tromoi mani nating, olsem na mi stap bel isi, long wanem, mi no gat dinau.”

13. Long sait bilong baim samting, olsem wanem yu inap bosim yu yet?

¹³ Sapos yu baim nating nating ol samting o yu baim bilong ol narapela i ken ting yu gat planti mani, dispela inap mekim na yu gat planti dinau. Olsem wanem yu inap abrusim dispela hevi? Long sait bilong baim samting, yu mas bosim gut yu yet. Em samting Ellena, em i gat 20 krismas samting, i save mekim. Em i tok: “Taim mi laik go raun wantaim ol pren, pastaim mi save tingting long ol samting mi laik baim na mi putim mak long hamas mani mi bai tromoi. . . . Na tu, mi save go tasol wantaim ol pren husat i save bosim gut mani bilong ol na mi save ol bai strongim mi long skelim pe bilong ol samting na no ken baim namba wan samting mi lukim.

14. Bilong wanem yu mas was gut, nogut yu “wari long bungim planti mani”?

¹⁴ Pasin bilong mekim wok mani na bosim gut mani, em wanpela bikpela samting long i stap bilong man. Tasol Jisas i tok bilong man i ken amamas tru, em i mas “hangre long kisim save long God.” (Mt. 5:​3, NW) Em i givim tok lukaut olsem sapos man “i wari long bungim planti mani,” dispela inap pulim tingting bilong em na em i no tingim moa ol samting bilong God. (Mk. 4:19) Olsem na em bikpela samting long yu mas larim Tok Bilong God i stiaim yu na holim stretpela tingting long mani.

Taim Yu Wanpela i Stap

15. Long wanem kain taim bai yu no strong long sakim samting i traim pasin bilong yu long stap gut long God?

¹⁵ Yu ting long wanem kain taim bai yu no strong long sakim samting i traim pasin bilong yu long stap gut long God​—taim yu stap wantaim ol arapela o taim yu wanpela i stap? Taim yu stap long skul o long wok, ating yu save was gut na bihainim stretpela pasin. Tasol taim yu wanpela i stap na yu malolo, ating yu no was gut na taim traim i kamap, yu no strong long bihainim stretpela pasin.

16. I gat wanem as na yu mas i gat laik long bihainim tok bilong Jehova, maski yu wanpela i stap?

¹⁶ I gat wanem as na yu mas i gat laik long bihainim tok bilong Jehova, maski yu wanpela i stap? Tingim: Yu inap mekim Jehova i bel hevi o yu inap mekim em i belgut tru. (Stt. 6:​5, 6; Snd. 27:11) Ol samting yu mekim em inap mekim sampela samting long Jehova, long wanem, em ‘i save wari long yu.’ (1 Pi. 5:7) Em i laik bai yu harim tok bilong em na bai yu ken i stap gut. (Ais. 48:​17, 18) Taim sampela wokboi bilong Jehova long bipo i sakim tok bilong em, dispela i mekim em i bel hevi. (Sng. 78:​40, 41) Tasol Jehova i laikim tru profet Daniel. Wanpela ensel i tokim Daniel olsem, “God i laikim yu tumas.” (Dan. 10:11) Bilong wanem? Daniel i save stap gut long God long taim em i stap long ai bilong ol man, na tu, long taim em wanpela i stap.​—Ritim Daniel 6:​10.

17. Taim yu makim ol amamas, yu ken givim wanem ol askim long yu yet?

¹⁷ Bilong yu ken i stap gut long God taim yu wanpela i stap, yu mas kisim pasin bilong “skelim wanem ol pasin i gutpela na wanem ol pasin i nogut,” na lain long mekim olsem long rot bilong “planti taim” mekim ol samting yu save em i stret long mekim. (Hi. 5:14) Olsem: Taim yu tingim wanem kain musik yu bai harim na ol muvi na samting long Intenet yu bai lukim, orait bilong helpim yu long makim ol samting i stret na abrusim ol samting nogut, givim ol dispela askim long yu yet: ‘Dispela samting bai kirapim mi long sori long narapela o em bai pulim mi long amamas long “lukim ol arapela man i kisim bagarap”?’ (Snd. 17:5) Em bai helpim mi long “bihainim gutpela pasin tasol” o em bai mekim na mi hatwok long heitim “pasin nogut”? (Amo. 5:15) Samting yu mekim taim yu wanpela i stap, dispela i save kamapim klia ol samting i bikpela samting tru long yu.​—Lu. 6:45.

18. Yu mas mekim wanem sapos long pasin hait yu bin mekim sampela pasin i no stret? Bilong wanem yu mas mekim olsem?

¹⁸ Yu mas mekim wanem sapos long pasin hait yu bin mekim sampela pasin em yu save i no stret? Tingim: “Sapos man i ting long haitim sin bilong en, orait em i no inap i stap gut. Tasol sapos man i autim olgeta sin bilong en na i givim baksait long ol dispela sin, orait bai God i marimari long en.” (Snd. 28:13) Em i no savepasin sapos yu mekim yet pasin i no stret na yu “givim bel hevi long Holi Spirit bilong God”! (Ef. 4:30) Yu mas tingim God, na tingim papamama na yu yet, na autim rong yu bin mekim. “Ol hetman bilong sios” inap helpim gut yu. Disaipel Jems i tok: “Ol i mas prea long God i ken mekim [man i mekim rong] i kamap orait gen. Sapos ol i bilip long God na ol i prea, orait Bikpela bai i mekim orait dispela sikman na kirapim em gen. Na sapos em i bin mekim sin, orait Bikpela bai i lusim ol dispela sin.” (Jem. 5:​14, 15) Tru, dispela inap mekim na yu sem, na ating yu mas karim sampela hevi tu. Tasol sapos yu strongim bel na askim long kisim helpim, yu inap abrusim sampela hevi moa em inap painim yu, na yu bai stap bel isi, long wanem, bel bilong yu i no gat tok moa.​—Sng. 32:​1-5.

Mekim Jehova i Belgut

19, 20. Jehova i laik bai yu stap olsem wanem? Tasol yu yet i mas mekim wanem?

¹⁹ Jehova i God bilong “amamas,” na em i laik bai yu tu i stap amamas. (1 Ti. 1:11) Em i save tingim yu tru. Maski ol narapela i no luksave long hatwok yu mekim bilong bihainim stretpela pasin, Jehova i save lukim dispela hatwok. I no gat wanpela samting i stap hait long ai bilong em. Em i save lukim ol samting yu mekim na bai em i ken sapotim hatwok yu mekim bilong bihainim stretpela pasin, na i no bilong painim sampela rong long yu. God “i save was gut long ol manmeri i save aninit long em wanpela tasol, maski ol i stap long wanem hap bilong graun. Em i save helpim ol na strongim ol.”​—2 Sto. 16:9.

²⁰ Olsem na larim Tok Bilong God i stiaim yu, na bihainim ol tok bilong en. Long dispela rot bai yu kisim gutpela tingting na gutpela save em yu mas i gat bilong winim ol hevi na wokim ol gutpela disisen. Yu bai mekim papamama na Jehova i amamas, na yu tu bai stap amamas tru.

[Futnot]

Bai Yu Bekim Olsem Wanem?

• Ol yangpela i ken mekim wanem bilong orait long na kisim helpim long ol lo papamama i putim na ol wok ol i mekim bilong stretim ol?

• Bilong wanem em i bikpela samting long kisim stretpela tingting long mani?

• Olsem wanem yu inap stap gut long Jehova, maski yu wanpela i stap?

[Piksa long pes 6]

Bai yu stap gut long God taim yu wanpela i stap?