Skulim Ol Pikinini Bilong Yu

Wanpela Tok Hait Yu Inap Tokim Ol Narapela Long En

OLSEM WANEM? I gat wanpela taim we wanpela i bin tokim yu long wanpela tok hait?​—a I gat wanpela tok hait mi laik tokim yu long en. Baibel i tok long en olsem, ‘dispela tok hait holi i bin i stap hait long olgeta taim bipo.’ (Rom 16:​25, NW) Pastaim God wanpela tasol i save long “dispela tok hait holi.” Orait nau yumi laik skelim olsem wanem God i mekim sampela samting na bai planti man i ken save long dispela tok hait.

Yu save long mining bilong dispela tok “holi”?​— Dispela tok i makim samting i klin, o gutpela tru. Olsem na ol i kolim dispela tok hait olsem tok hait holi, long wanem, God i as bilong en, na em i holi. Yu ting husat i laik save long dispela gutpela tok hait?​— Ol ensel i laik save long en. Baibel i tok: “Ol ensel tu i laikim tumas long kisim save long ol dispela gutpela samting.” Yes, ol i laik kliagut long dispela tok hait holi.​—1 Pita 1:12.

Taim Jisas i kam long graun, em i toktok long dispela tok hait na em i kirap long kamapim insait bilong en. Em i tokim ol disaipel bilong em olsem: “God i soim yupela pinis long as bilong tok hait bilong kingdom bilong God.” (Mak 4:11) Yu luksave long dispela tok hait i stori long wanem samting?​— Em i stori long dispela Kingdom Bilong God em Jisas i skulim yumi long beten long en!​—Matyu 6:​9, 10.

Orait nau yumi ken stori long olsem wanem Kingdom Bilong God i bin stap olsem wanpela tok hait inap “olgeta taim bipo” i kam inap long taim Jisas i kam long graun na kamapim insait bilong en. Bihain long taim Adam na Iv i brukim lo bilong God na God i rausim ol long gaden Iden, ol wokman bilong God i kisim save olsem God i gat laik yet long dispela graun olgeta i mas kamap wanpela paradais. (Stat 1:​26-28; 2:​8, 9; Aisaia 45:18) Ol i raitim tok olsem ol man bai stap amamas long graun aninit long Kingdom Bilong God.​—Song 37:​11, 29; Aisaia 11:​6-9; 25:8; 33:24; 65:​21-24.

Tingim man husat bai stap King long Kingdom Bilong God. Yu save long God i makim husat bilong i stap King?​— Em Pikinini bilong em, “King bilong kamapim gutpela sindaun na bel isi,” em Jisas Krais. (Aisaia 9:​6, 7) Yu na mi i mas kisim “save gut long as bilong tok hait bilong God. Krais yet em i as bilong dispela tok hait.” (Kolosi 2:2) Yumi mas save olsem God i bin kisim laip bilong nambawan ensel (Pikinini spirit) em i bin wokim, na putim insait long bel bilong Maria. Dispela Pikinini, husat i bin stap wanpela strongpela ensel, em i kamap man God i salim i kam daun long graun olsem ofa bambai yumi inap kisim laip oltaim.​—Matyu 20:28; Jon 3:16; 17:3.

Tasol dispela save olsem God i makim Jisas long kamap King long Kingdom bilong Em, dispela tasol i no inap, i gat sampela samting moa yumi mas kisim save long en long dispela tok hait. Hap bilong dispela tok hait i olsem: I gat sampela man na meri bai stap long heven wantaim Jisas husat i kirap bek pinis. Ol bai mekim wok king long heven wantaim Jisas!​—Efesus 1:​8-12.

Nau yumi ken lain long nem bilong sampela bilong ol manmeri husat bai wok king wantaim Jisas long heven. Jisas i tokim ol gutpela aposel bilong em olsem em i go bilong redim ples bilong ol. (Jon 14:​2, 3) Taim yumi skelim ol dispela skripsa, yu bai lukim ol nem bilong sampela man na meri husat bai mekim wok king wantaim Jisas long Kingdom bilong Papa bilong em.​—Matyu 10:​2-4; Mak 15:​39-41; Jon 19:25.

Inap longtaim pinis, i no gat man i save long hamas man bai mekim wok king long heven wantaim Jisas long Kingdom bilong em.Tasol nau yumi save long namba bilong ol. Yu save long hamas bai mekim wok king?​— Baibel i tok, namba bilong ol inap olsem 144,000. Dispela tu em i hap bilong dispela tok hait.​—KTH 14:​1, 4.

Olsem wanem? Yu wanbel olsem dispela “tok hait bilong kingdom bilong God” em wanpela gutpela tok hait tru ol man i mas save long en?​— Sapos olsem, orait yumi mas traim bes long kisim gut save long dispela tok hait bambai yumi inap tokim planti manmeri long dispela samting.

[Futnot]

OL ASKIM:

[Piksa long pes 31]

▪ Wanem nem bilong dispela tok hait yumi stori long en? Bilong wanem Baibel i kolim olsem?

▪ Wanem dispela tok hait? Husat em i namba wan man long skulim ol man long en?

▪ Wanem sampela samting bilong dispela tok hait yu kisim save pinis long en?

▪ Olsem wanem yu inap stori long ol pren bilong yu long dispela tok hait?

[Piksa long pes 31]

Yu ting ol ensel i laik save long wanem samting?