Skulim Ol Pikinini Bilong Yu

Sampela Taim Yu Pilim Olsem Yu Narapela Kain?

SAPOS wanpela i narapela kain, ol narapela i no laik orait long em o kisim em i kam insait long grup bilong ol. Ating em i gat narapela skin kala, em i bilong narapela kantri, o em i gat narapela pasin bilong toktok o mekim ol samting. Sampela taim yu save pilim olsem yu narapela kain?​—⁠a

Yumi ken stori long wanpela man husat i pilim olsem. Nem bilong em Mefiboset. Yumi ken kisim save long em i husat na bilong wanem em i pilim olsem. Sapos yu pilim olsem yu narapela kain, orait yu inap kisim gutpela skul long stori bilong Mefiboset.

Mefiboset em i pikinini bilong Jonatan, gutpela pren bilong Devit. Paslain long Jonatan i dai long pait, em i tokim Devit: “Mekim gut long ol lain pikinini bilong mi.” Devit i kamap king. Sampela yia bihain em i tingim tok bilong Jonatan, na Mefiboset i stap laip yet. Taim em i liklik, em i kisim bagarap long wanpela bikpela eksiden. Em i hatwok long wokabaut long laip olgeta bilong em. Yu luksave long as na em inap pilim olsem em i narapela kain?​—⁠

Devit i laik mekim gutpela pasin long pikinini bilong Jonatan. Olsem na Devit i stretim rot bambai haus bilong Mefiboset i stap klostu long haus bilong em long Jerusalem, na Devit i makim wanpela sia bilong Mefiboset long tebol kaikai bilong em. Devit i givim Siba wantaim ol pikinini man na ol wokman bilong em long Mefiboset olsem wokman bilong em. Tru tumas, Devit i givim ona long pikinini bilong Jonatan! Yu save wanem samting i bin kamap bihain?​—⁠

Devit i gat hevi long famili bilong em. Apsalom, wanpela bilong ol pikinini bilong Devit i birua long em na i laik kamap king. Devit i mas ranawe. Planti narapela i go wantaim Devit, na Mefiboset tu i laik go wantaim em. Ol dispela pren bilong Devit i save olsem Devit em king God i makim. Tasol Mefiboset i no inap go, long wanem, em i no inap wokabaut.

Orait, Siba i tokim Devit olsem Mefiboset i stap bek, long wanem, em i gat laik tru long kamap king. Devit i bilipim dispela tok giaman! Olsem na em i givim olgeta graun samting bilong Mefiboset long Siba. I no longtaim na Devit i winim pait em i mekim long Apsalom, na em i kam bek long Jerusalem. Nau Devit i harim ol tok bilong Mefiboset yet. Devit i tok Mefiboset na Siba i mas tilim graun na kisim hap hap. Yu ting Mefiboset i mekim wanem?​—⁠

Em i no komplein olsem disisen Devit i mekim i no stret, nogat. Mefiboset i save olsem king i mas i gat bel isi bambai em inap mekim gut wok bilong em. Olsem na em i tok Siba i ken kisim graun olgeta. Bikpela samting long tingting bilong Mefiboset em olsem wokboi bilong Jehova, em Devit, i kam bek long Jerusalem olsem king.

Mefiboset i karim bikpela hevi tru. Planti taim em i pilim olsem em i narapela kain. Tasol Jehova i laikim em na i lukautim em gut. Yumi inap kisim wanem skul long dispela?​—⁠ Maski yumi mekim stretpela pasin, sampela inap sutim kain kain tok giaman long yumi. Jisas i tok: “Sapos ol manmeri husat i stap longwe long God i heitim yupela, orait yupela i save olsem ol i bin heitim mi paslain long ol i heitim yupela.” Na tu, ol man i bin kilim i dai Jisas! Yumi ken save tru olsem sapos yumi mekim pasin i stret, God tru, Jehova, bai laikim yumi​—⁠na Pikinini bilong em, Jisas, tu bai laikim yumi.

Ritim long Baibel bilong yu

1 Samuel 20:​15-17, 41, 42

2 Samuel 4:4; 9:​1-10; 19:​24-30

Jon 15:18

[Futnot]