I Stret Ol Pikinini i Mas Kisim Save Long God?

“Lotu i gat strong inap long mekim yumi heitim ol narapela, tasol strong bilong en i no inap mekim yumi laikim ol narapela.”​—JONATHAN SWIFT, MAN INGLAN BILONG RAITIM BUK.

SWIFT i bin kamapim dispela tingting inap olsem 200 yia i go pinis, tasol planti man long nau i wanbel wantaim em. Tru tumas, sampela i bilip olsem ol papamama i no gat rait long skulim ol pikinini bilong ol long God. Ol i ting olsem ol pikinini husat i kamap bikpela insait long ol famili i tingim lotu, ol i no stap fri long mekim ol samting.

Yu gat wanem tingting? Wanem tok i stap daunbilo i kamapim stretpela tingting?

● Ol papamama i no gat rait long skulim ol pikinini bilong ol long God.

● Ol papamama i mas wet inap long ol pikinini i kamap bikpela na bihain ol i ken toktok wantaim ol long ol samting bilong lotu.

● Taim ol pikinini i liklik yet, ol papamama i mas skulim ol long ol bilip papamama yet i holim long God. Tasol taim ol i kamap bikpela, ol papamama i mas strongim ol pikinini long ol yet i mas skelim ol bilip.

● Ol pikinini i mas bihainim nating tasol ol bilip bilong papamama long God.

Yu Ting Lotu i Nogutim Ol Pikinini?

Olgeta papamama husat i save tingim gut pikinini ol i no laik nogutim pikinini bilong ol. Tasol olsem wanem? Ol samting i kamap i strongim dispela tingting olsem i no gutpela long skulim ol pikinini long God? Inap planti yia nau ol saveman i bin skelim gut ol samting em ol bilip bilong lotu bilong papamama i mekim long ol pikinini. Ol i kisim wanem save long dispela?

Ol saveman i kisim save olsem lotu i gutpela samting bilong helpim ol pikinini, na i no bagarapim ol. Long 2008, wanpela ripot i kamap long nius Social Science Researcha i tok: “Lotu i save helpim papa na mama long pas gut wantaim pikinini.” Dispela ripot i tok moa: “I luk olsem lotu na pasin bilong save gut long God em i bikpela samting long laip bilong planti pikinini na long helpim famili long pas gut wantaim.” Dispela tingting i stret wantaim tok bilong Jisas Krais olsem: “Ol man i hangre long kisim save long God, ol i ken amamas, long wanem, Kingdom bilong heven em i bilong ol.”​—Matyu 5:3.

Olsem wanem long dispela tingting olsem ol pikinini i mas kamap bikpela pastaim na bihain ol i ken kisim save long God na long lotu? Dispela tingting i no stret, long wanem, tingting bilong pikinini i olsem wanpela emti baket i redi long pulapim samting i go insait long en. Olsem na papamama i mas makim, ol yet bai pulapim dispela “baket” long haus wantaim ol bilip na stretpela stiatok bilong helpim pikinini o ol bai larim olkain tingting bilong dispela graun i pulapim bel na tingting bilong pikinini.

Wanem Rot i Gutpela Long Bihainim?

Ol samting i kamap bipo i kamapim klia olsem lotu inap kirapim ol man long tingting nogut na heitim ol narapela. Olsem na ol papamama inap mekim wanem bambai ol samting Jonathan Swift i toktok long en i no ken kamap? Olsem wanem ol inap skulim ol pikinini long ol bilip we inap helpim pikinini long laikim ol narapela?

Ol inap bihainim gutpela rot sapos ol i painim bekim bilong tripela askim olsem: (1) Ol pikinini i mas kisim save long wanem samting? (2) Husat i mas skulim ol? (3) Wanem nambawan gutpela rot bilong skulim ol?

[Futnot]