Ol Pikinini i Mas Kisim Wanem Save?

“God em i as bilong olgeta tok i stap long Rait Holi, na ol i gutpela long skulim man, stretim man, mekim ol samting i kamap stret, na skulim ol man long stretpela pasin.”​—2 TIMOTI 3:16.

OL PIKININI i mas kisim save long tok i tru bilong God. Ol i ken lainim dispela tok i tru long we? Long nambawan buk bilong lotu em planti man tru i save rispektim, em Baibel.

Baibel i olsem wanpela pas i kam long God. Insait long dispela pas, God i kamapim klia ol pasin bilong em na em i givim ol stretpela lo bilong stiaim olgeta pikinini bilong em​—em ol yangpela na ol lapun. Tingim sampela tok i stap long Baibel na ol skultok em ol yangpela pikinini tu i ken lain long en.

God i laik yumi mas kisim wanem save long em?

◼ Tok Baibel i mekim: “Yu, nem bilong yu Jehova, yu wanpela tasol yu God Antap Tru na yu bosim olgeta hap bilong graun.”​—Song 83:​18, NW.

Skul yumi kisim: God em wanpela Man i stap tru na em i gat nem bilong em.

◼ Tok Baibel i mekim: “Bikpela i save long olgeta tingting na laik bilong yumi. Sapos yu wok strong long kisim save long laik bilong em, orait bai em i larim yu i save gut long em.”​—1 Stori 28:9.

Skul yumi kisim: God Jehova i save tingim tru yumi olgeta, na ol liklik pikinini tu. (Song 10:14; 146:9) Em i laik yumi mas kisim save long em.

◼ Tok Baibel i mekim: “Yupela i no ken mekim nogut long . . . pikinini, papa [bilong em] i dai pinis. Sapos yupela i mekim nogut long ol na ol i krai long mi long helpim ol, bai mi harim singaut bilong ol.”​—Kisim Bek 22:​22-24.

Skul yumi kisim: Jehova i save harim tu beten bilong ol liklik pikinini. Yumi ken toktok wantaim God long olgeta taim na kamapim tru bel na tingting bilong yumi long em.

◼ Tok Baibel i mekim: “Ol i no lusim pasin bilong traim God bilong Israel, em God bilong mekim gutpela na stretpela pasin olgeta. Ol i traim em na mekim em i kros tru long ol.”​—Song 78:41.

Skul yumi kisim: Ol tok na pasin bilong yumi i save mekim sampela samting long Jehova, olsem na yumi mas tingting gut paslain long yumi toktok na mekim ol samting.

Yumi mas mekim wanem pasin long ol man i narapela kain long yumi?

◼ Tok Baibel i mekim: “God i save mekim wankain pasin long olgeta man. Na em i save laikim man husat i save pret long em na bihainim stretpela pasin maski em i bilong wanem lain.”​—Aposel 10:​34, 35.

Skul yumi kisim: Sapos God i orait long olgeta kain man, orait yumi no ken bel nogut long ol narapela husat i gat narapela skin kala o lukluk bilong ol i narapela long yumi.

◼ Tok Baibel i mekim: “Oltaim yupela i mas redi long bekim tok long olgeta man i askim yupela long ol samting yupela i bilip na wet long en, tasol mekim olsem long pasin isi na pasin rispek.”​—1 Pita 3:15.

Skul yumi kisim: Taim yumi toktok wantaim ol narapela long ol samting bilong lotu, yumi mas kamapim olsem yumi bilip tru, tasol yumi no ken mekim long hatpela pasin. Na tu, yumi mas soim rispek long ol man i gat narapela bilip.

Yumi mas mekim wanem pasin long famili bilong yumi?

◼ Tok Baibel i mekim: “Yupela ol pikinini, . . . bihainim tok bilong papamama bilong yupela long olgeta samting. Bikpela i save laikim dispela kain pasin.”​—Kolosi 3:20.

Skul yumi kisim: Taim ol pikinini i bihainim tok, ol i kamapim olsem ol i laikim tru papamama na ol i laik amamasim God.

◼ Tok Baibel i mekim: “Yupela i mas wok yet long karim hevi narapela i putim long yupela na amamas long fogivim narapela, na mekim olsem maski sapos i gat as na wanpela i gat tok long narapela. Jehova i amamas long fogivim yupela, olsem na yupela tu i mas mekim wankain pasin.”​—Kolosi 3:13.

Skul yumi kisim: Ol narapela man na famili tu, sampela taim ol bai bagarapim bel bilong yumi. Tasol sapos yumi laik bai God i fogivim yumi, orait yumi mas lain long fogivim ol narapela.​—Matyu 6:​14, 15.

Bilong wanem yumi mas mekim tok tru na gutpela pasin?

◼ Tok Baibel i mekim: “Yupela i mas lusim pasin bilong giaman. Yupela olgeta i mas mekim tok tru tasol long ol arapela.”​—Efesus 4:​25, BB.

Skul yumi kisim: Taim yumi mekim tok tru, yumi bihainim pasin bilong God na amamasim em. Sapos yumi kisim pasin bilong tok giaman, yumi kamap olsem Satan, em birua bilong God na “papa bilong pasin giaman.”​—Jon 8:44; Taitus 1:2.

◼ Tok Baibel i mekim: “Olgeta samting yupela i laik bai ol man i mekim long yupela, yupela i mas mekim long ol.”​—Matyu 7:12.

Skul yumi kisim: Yumi mas tingim filings, tingting, na nid bilong famili bilong yumi na ol narapela. Taim yumi soim olsem yumi “pilim hevi bilong narapela,” orait ol narapela tu bai mekim gutpela pasin long yumi.​—1 Pita 3:8; Luk 6:38.

Olsem ol dispela tok i kamapim, ol skul yumi kisim long Baibel inap helpim ol pikinini long kamap ol bikpela man i gat pasin bilong tenkyu, rispek, na pilim tru tingting bilong ol narapela. Tasol husat i mas skulim ol pikinini long ol dispela samting?