Skulim Ol Pikinini Long God Wanem Nambawan Gutpela Rot Bilong Mekim?

“Oltaim yupela i mas tingim ol dispela lo nau mi givim long yupela. Na yupela i mas lainim ol pikinini bilong yupela long ol dispela lo. Na tokim ol long taim yupela i stap long haus na long taim yupela i wokabaut long rot, na long taim yupela i malolo na long taim yupela i wok.”​—LO 6:​6, 7.

SAMPELA taim ol papamama inap pilim olsem em i bikpela wok tumas long skulim ol pikinini bilong ol. Tasol taim ol i askim ol narapela long gutpela tingting, ol i kisim kain kain tingting na nau ol papamama i paul olgeta long wanem tingting i stret. Planti taim ol wanblut na pren i hariap long tokim ol long samting ol i mas mekim. Ol buk, ol stori bilong ol magasin, na Intenet, i save kamapim kain kain tok bilong helpim papamama, tasol ol dispela tok i save pait wantaim.

Tasol Baibel i tokim ol papamama long wanem samting ol i ken skulim ol pikinini long en, na tu, olsem wanem ol i ken skulim ol. Olsem dispela ves i stap antap i kamapim, long olgeta wan wan de ol papamama i mas painim rot bilong toktok wantaim ol pikinini bilong ol long God. Ol tok i stap daunbilo i kamapim 4-pela rot em Baibel i as bilong en, na ol i bin helpim planti tausen papamama long skulim ol pikinini long God.

1. Kisim skul long ol samting God i wokim. Aposel Pol i tok: “Kirap long taim God i wokim olgeta samting na i kam inap long nau, ol man i lukim ol samting God i bin wokim na long dispela rot ol inap save long ol pasin bilong en i stap hait. Na ol i save long bikpela strong bilong en i stap oltaim na ol i save olsem tru tru em i God.” (Rom 1:20) Ol papamama inap mekim planti samting bilong helpim ol pikinini long tingim God olsem Man i stap tru. Ol inap mekim olsem long rot bilong soim ol long ol samting God i bin wokim na helpim ol long luksave ol dispela samting i kamapim wanem pasin bilong God.

Jisas i bin mekim wok long dispela pasin bilong skulim ol disaipel bilong em. Olsem, em i tok: “Lukim gut ol pisin long skai, ol i no save planim kaikai o kisim kaikai na bungim long ol bakstua. Nogat. Papa bilong yupela long heven i save givim kaikai long ol. Tasol yupela i winim tru ol pisin.” (Matyu 6:26) Jisas i kamapim klia ol pasin bilong Jehova olsem pasin laikim na pasin sori. Tasol em i mekim sampela samting moa. Em i helpim ol disaipel bilong em long tingim olsem wanem God i kamapim ol dispela pasin long ol pikinini bilong em.

Saveman King Solomon i stori long savetingting em God i givim long ol anis, na em i mekim wok long ol dispela liklik anis bilong skulim yumi long wanpela bikpela samting. Em i tok: “Yupela ol lesman, . . . yupela go lukim gut pasin bilong ol anis na bai yupela i kamap saveman. Ol anis i no gat hetman o bikman o ofisa bilong bosim ol. Tasol taim i gat planti kaikai i stap, ol anis i save bungim kaikai na putim i stap bilong taim kaikai i sot.” (Sindaun 6:​6-8) Man! Em i wanpela gutpela rot bilong skulim yumi long putim ol gutpela mak, na mekim wok long strong God i givim long yumi bilong winim ol dispela mak!

Ol papamama i ken bihainim gutpela pasin bilong Jisas na Solomon long skulim ol pikinini sapos ol i mekim olsem: (1) Askim ol pikinini long wanem kain diwai plaua na animal ol i laikim. (2) Kisim sampela save moa long ol dispela diwai plaua na animal. (3) Kisim save long God long rot bilong ol dispela samting em i bin wokim.

2. Bihainim pasin Jisas i mekim long ol man em i bin skulim. Long olgeta man i bin stap laip, Jisas tasol i gat ol nambawan bikpela samting bilong toktok long en. Tasol maski i olsem, em i lusim bikpela haptaim bilong em long kamapim ol askim. Em i gat bikpela laik tru long save long tingting na filings bilong ol man em i skulim. (Matyu 17:​24, 25; Mak 8:​27-29) Olsem tasol, ol papamama i gat planti bikpela samting bilong skulim ol pikinini bilong ol. Tasol bilong mekim gut wok bilong ol, ol i mas bihainim pasin bilong Jisas na kirapim ol pikinini long kamapim tingting na filings bilong ol.

Olsem wanem sapos ol pikinini i gat pasin nogut o ol i no hariap long kisim sampela gutpela skultok? Tingim pasin Jisas i mekim long ol aposel bilong em. Sampela taim ol i tok pait namel long ol yet na ol i no hariap long lainim gutpela samting em pasin daun i kamapim. Tasol Jisas i mekim pasin isi, na planti taim em i tokim ol olsem em i bikpela samting long mekim pasin daun. (Mak 9:​33, 34; Luk 9:​46-48; 22:​24, 25) Ol papamama husat i bihainim pasin bilong Jisas ol bai stretim ol pikinini long pasin isi, na sapos i gat wok long mekim, planti taim ol bai givim wankain skultok yet long ol pikinini inap long ol i ken kliagut long en.a

3. Skulim ol long rot bilong gutpela pasin yu mekim. I gutpela ol papamama i bihainim tok em aposel Pol i givim long ol Kristen i sindaun long Rom. Long pas em i raitim long ol, em i tok: “Olsem wanem? Yu save skulim ol arapela, tasol yu no save skulim yu yet? Yu husat i tokim ol man, ‘No ken stil,’ yu yet yu save stil?”​—Rom 2:21.

Dispela tok em i stret, long wanem, planti taim ol pikinini i save bihainim ol pasin bilong papamama, winim ol tok papamama i mekim. Tru tumas, taim ol papamama yet i bihainim ol tok ol i skulim ol pikinini long en, orait ol pikinini bilong ol bai putim gut yau na bihainim tok bilong ol.

4. Skulim pikinini taim em i liklik yet. Timoti, em poroman bilong aposel Pol long wok misineri, em i gat gutnem tru long ples bilong em. (Aposel 16:​1, 2) Wanpela as em olsem, taim em i “stap bebi yet” ol i skulim em long “ol Rait Holi.” Mama na bubu meri bilong Timoti i bin ritim ol Rait Holi long em, na tu, ol i helpim em long skelim gut ol tok i tru insait long ol dispela rait.​—2 Timoti 1:5; 3:​14, 15.

Ol Samting Bilong Helpim Yu

Ol Witnes Bilong Jehova i wokim planti buk na nius i stret bilong helpim ol papamama long skulim ol pikinini long tok i tru bilong God. Sampela buk ol i raitim i bilong helpim ol liklik pikinini. Sampela narapela i bilong helpim ol papamama na ol tineja long toktok gut wantaim.b

Tru tumas, paslain long ol papamama i ken skulim ol pikinini bilong ol long God, ol i mas save long bekim bilong sampela strongpela askim em ol pikinini inap kamapim. Olsem wanem bai yu bekim ol kain askim olsem: Bilong wanem God i larim pen na hevi i stap? I gat wanem as na God i wokim dispela graun? Ol man i dai pinis ol i stap we? Ol Witnes Bilong Jehova bai amamas long helpim yu long kisim bekim bilong ol dispela na sampela narapela askim bambai yu na famili bilong yu i ken go klostu long God.​—Jems 4:8.

[Ol Futnot]