Jisas i Gat Wanem Tingting Long Politik?

OL MAN bilong raitim Gutnius i stori long sampela samting i bin kamap taim Jisas i mekim wok bilong em, na em i mas kamapim tingting bilong em long wok politik. Olsem, bihain liklik long Jisas i kisim baptais taim em i gat 30 krismas, Satan i laik givim bikpela namba long em olsem hetman bilong dispela graun. Bihain, wanpela bikpela lain manmeri i laik mekim em i kamap king. Na bihain moa, sampela man i laik bai em i sapotim wok politik. Jisas i mekim wanem? Orait nau yumi ken skelim ol dispela samting i bin kamap.

Hetman bilong dispela graun. Ol Gutnius i stori olsem Satan i laik givim long Jisas namba bilong bosim “olgeta kingdom bilong graun.” Tingim ol gutpela samting Jisas inap mekim bilong helpim ol man i karim pen na hevi sapos em i kisim strong long bosim dispela graun! Ating wanpela man husat i save ting wok politik inap helpim ol man long stretim ol hevi bilong dispela graun em bai i no inap sakim dispela wok, a? Tasol Jisas i sakim.—Matyu 4:8-11.

King. Planti man long taim bilong Jisas ol i nidim tru wanpela hetman husat inap stretim ol hevi bilong ol long mani na wok politik. Ol man i kirap nogut long save bilong Jisas, na ol i laik bai em i mas insait long ol wok politik. Jisas i mekim wanem? Jon, man bilong raitim Gutnius, i tok: “Jisas i save olsem ol i laik kam na holim em na mekim em i kamap king, olsem na em i lusim dispela hap na em wan i go gen long maunten.” (Jon 6:10-15) Em i klia tru olsem Jisas i no laik insait long wok politik.

Sapotim wok politik. Tingim samting i kamap sampela de paslain long ol i kilim i dai Jisas. Sampela disaipel bilong ol Farisi, em ol i no laik i stap aninit long Gavman Bilong Rom, na sampela man bilong lain politik bilong Herot, em ol i laik bai Rom i bosim ol, ol i go toktok long Jisas. Ol i strong long em i mas makim wanem sait bilong politik em i laik sapotim. Ol i askim em sapos ol Juda i mas baim takis long Rom o nogat.

Mak i kamapim bekim bilong Jisas olsem: “‘Bilong wanem yupela i traim mi? Soim mi wanpela koin denarius.’ Ol i kisim wanpela i kam. Na em i tokim ol: ‘Dispela em piksa na biknem bilong husat?’ Ol i tokim em: ‘Em bilong Sisar.’ Orait Jisas i tok: ‘Ol samting bilong Sisar, givim long Sisar, na ol samting bilong God, givim long God.’” (Mak 12:13-17) Buk Church and State—The Story of Two Kingdoms i stori long as na Jisas i bekim olsem, na i tok: “Em i no laik i stap olsem wanpela mesaia bilong wok politik, na em i kamapim klia samting ol man i mas givim long Sisar na samting ol i mas givim long God.”

Tru, Krais i no insait long wok politik, tasol dispela i no makim olsem em i no pilim hevi bilong pasin bilong i stap rabis, korapsen, na pasin i no stret. Nogat. Baibel i kamapim klia olsem em i sori tru long ol man i stap tarangu. (Mak 6:33, 34) Tasol Jisas i no mekim ol samting bilong pinisim pasin i no stret, maski sampela i laik subim em long insait long wok bilong stretim ol hevi bilong dispela taim.

Ol dispela samting i kamapim klia tru olsem Jisas i no laik insait long wok politik. Tasol olsem wanem long ol Kristen long nau? Ol i mas mekim wanem?