Bilong Ol Yangpela
Lukaut Long Pasin Bilong Strong Tumas Long Kisim Namba!
Pasin bilong mekim: Mekim dispela projek long wanpela hap we i no gat planti nois. Taim yu ritim ol skripsa, tingim olsem yu yet i stap insait long stori. Piksaim long tingting ol samting i kamap. Harim nek bilong ol man i toktok. Pilim tingting bilong ol man insait long stori. Mekim dispela stori i kamap olsem samting tru tru em yu lukim i stap.
Ol man insait long stori: Devit, Apsalom, Joap
Bikpela tok: Apsalom i wok strong long kisim wok king bilong papa bilong em
SKELIM SAMTING I KAMAP.—RITIM 2 SAMUEL 14:25-33; 15:1-17; 18:9-17, 30-33.
Yu ting Apsalom i luk olsem wanem? (Ritim gen 2 Samuel 14:25, 26.)
Pasin bilong Apsalom na krai bilong nek bilong em i kamapim klia wanem samting taim em i traim long pulim tingting bilong ol man husat i kam long king bilong stretim hevi bilong ol? (Ritim gen 2 Samuel 15:2-6.)
Yu ting Apsalom i gat wanem kain pasin taim yu ritim stori i stap long 2 Samuel 14:28-30?
SKELIM I GO MOA.
Apsalom i bin mekim wanem ol samting bambai em i ken kisim wok king? (Givim tingting: Ritim 2 Samuel 13:28, 29. Amnon em i namba 1 pikinini bilong Devit na i stret em i kisim wok king.)
Apsalom i bin wok strong long litimapim nem bilong em yet, tasol yu ting ol man i gat wanem tingting long em taim yu ritim stori long samting ol i mekim bilong planim bodi bilong em?(Ritim gen 2 Samuel 18:17.)
Wanem samting i mekim na Apsalom i gat dispela pasin bilong wok strong long kisim namba? (Bilong skelim narapela stori i wankain long dispela, ritim stori bilong Diotrefes long 3 Jon 9, 10.)
Pasin bilong Apsalom i mekim wanem long Devit? (Givim tingting: Ritim Song sapta 3, em tok Devit i bin raitim long taim Apsalom i bikhet long em.)
MEKIM GUTPELA WOK LONG SAMTING YU LAINIM. RAITIM SAMTING YU KISIM SAVE LONG EN . . .
Ol samting nogut i save kamap long pasin bilong strong tumas long kisim namba.
Pasin man i mekim inap givim bikpela bel hevi long ol narapela, na tu, long papamama bilong em.
SAMPELA TOK MOA YU KEN MEKIM WOK LONG EN.
Wanem samting inap pulim yu long strong tumas long kisim namba?
Yu mas mekim wanem bambai yu no ken kisim pasin antap?
YU PILIM TRU WANEM SAMTING LONG DISPELA STORI BILONG BAIBEL? BILONG WANEM YU TOK OLSEM?
Traim mekim olsem: Tingim sapos Apsalom i bin mekim pasin daun na em i no strong tumas long kisim namba, wanem samting inap kamap?—Sindaun 18:12.