Dispela Em i Gutpela Samting Bilong Yumi

1. Jehova i bin lukautim wanem samting bilong helpim yumi ol man bilong graun?

JEHOVA i save stap oltaim, na em i tokim yumi long samting yumi mas mekim na bai yumi inap stap laip oltaim. Dispela tok i no senis. Baibel i tok: “Tok bilong Jehova i save stap oltaim oltaim.” (1 Pita 1:23-25) Yumi ken tenkyu tru olsem Jehova i bin lukautim dispela bikpela tok long Baibel.

2. God i laik bai yumi save long wanem samting?

² Jehova i laik bai yumi olgeta i save long nem bilong em. Namba 1 taim Baibel i kolim nem bilong Jehova em long taim Baibel i stori long olsem wanem Jehovaa i wokim heven na graun. (Stt. 2:4) Long rot bilong mirakel God i raitim nem bilong em planti taim long ol ston bilong Tenpela Lo em i givim long Moses. Olsem: Namba 1 lo i tok: “Mi Jehova, God bilong yupela.” (Kis. 20:1-17, NW) Satan i bin traim long bagarapim ol tok i stap long Baibel bambai yumi no gat rot bilong kisim save long God na nem bilong em. Tasol Jehova i no bin larim dispela samting i kamap.—Sng. 73:28.

3. God i laik bai yumi lainim wanem samting moa long Baibel?

³ Ol man i gat planti tingting kranki long God. Tasol Jehova i laik bai yumi olgeta i save long tok i tru. Yumi mas amamas olsem Baibel i kamapim klia tok i tru. (Ritim Song 43:3, 4.) I kain olsem yumi tasol i stap long lait, na ol man bilong dispela graun i stap long tudak.—1 Jon 1:6, 7.

YUMI GAT GUTPELA SAMTING TRU

4, 5. Long 1931, yumi bin kisim wanem gutpela samting tru?

⁴ Sapos ol man i kam long wankain hap, ating pasin bilong ol, ol kastam bilong ples, sindaun, na wokabaut bilong ol bai wankain, na wanpela lain tumbuna bai skulim narapela lain tumbuna i kamap bihain. Dispela i stap olsem wanpela gutpela samting tru long ol. Na i wankain tu long yumi ol Witnes Bilong Jehova. Jehova i helpim lain bilong em long kliagut long ol tok bilong Baibel na kisim stretpela save long em na samting em i tingting pinis long mekim. Na tu, em i givim yumi biknem taim em i larim yumi karim nem bilong em.

⁵ Yumi bin kisim nem bilong yumi long wanpela kibung long Columbus, Ohio, Amerika, long 1931. Ol dispela leta, “JW,” i stap long program bilong kibung. Wanpela sista i tok ol bratasista i bin tingting planti long mining bilong “JW.” Paslain long dispela taim, mipela i bin holim nem olsem ol Sumatin Bilong Baibel, tasol long wanpela spesel tok long Julai 26, 1931, olgeta long odiens i wanbel long kisim nem olsem ol Witnes Bilong Jehova (Jehovah’s Witnesses). Bikpela amamas i kamap long dispela de, long wanem, mipela i kisim wanpela nem i kam long Baibel. (Ritim Aisaia 43:12.) Wanpela brata i tok: “Mi no inap tru long lusim tingting long bikpela singaut na amamas i kamap long dispela taim.” I no gat narapela lain long graun i laikim dispela nem, tasol God i larim yumi karim dispela spesel nem winim 80 yia nau!

6. Wanem tok i stap olsem gutpela samting tru long yumi?

⁶ Narapela gutpela samting yumi gat em olsem: Yumi gat stretpela save bilong Baibel long ol wokman bilong God long bipo, na dispela save em i bikpela samting. Olsem: Baibel i tokim yumi long ol samting i bin kamap long Abraham, Aisak, na Jekop. Ating ol i bin stori wantaim famili bilong ol long ol samting ol i mas mekim na Jehova bai orait long ol. Ating ol kain stori olsem i bin helpim Josep long sakim traim bilong mekim pasin adaltri wantaim meri bilong Potifar. (Stt. 39:7-9) Long taim bilong ol aposel, ol Kristen i save toktok wantaim narapela narapela long save ol i kisim long God. Jisas i bin skulim Pol long Kaikai Bilong Bikpela, na Pol i tokim kongrigesen long dispela samting. (1 Kor. 11:2, 23) Olgeta dispela stori i stap long Baibel bambai yumi inap kisim save long ol samting yumi mas mekim bilong lotuim God. (Ritim Jon 4:23, 24.) Baibel inap helpim olgeta kain man, tasol yumi lain bilong Jehova i mas tenkyu moa long em.

7. Wanem tok promis i wanpela bilong ol gutpela samting yumi gat?

⁷ Jehova i helpim lain bilong em long nau tu. (Sng. 118:7) Yumi inap ritim ol buk na nius bilong yumi we i stori long ol samting God i mekim bilong lukautim lain bilong em. Dispela i mekim na yumi no pret, maski ol i mekim nogut long yumi. Baibel i tok promis olsem maski ol man i yusim wanem kain samting bilong pait o ol i mekim wanem, dispela i no inap bagarapim yumi. Na sapos ol narapela i traim long mekim tok bilong daunim lain bilong God long kot, bihain ol bai luksave olsem pasin ol i mekim i no stret, long wanem, Jehova yet i helpim yumi long bihainim stretpela pasin. Dispela tu em i wanpela bilong ol gutpela samting yumi gat. (Ais. 54:17) Satan i no inap long mekim wanpela samting bilong bagarapim na pinisim tru lain bilong yumi.

8. Yumi bai stori long wanem ol samting long dispela stadi na long neks stadi?

⁸ Satan i traim long bagarapim ol tok bilong Baibel, pasim rot bilong ol man long save long nem bilong Jehova na tok i tru. Tasol Satan i no win. Long dispela stadi na long neks stadi, yumi bai stori long (1) olsem wanem God i bin stretim rot bilong lukautim Baibel na ol tok i stap long en; (2) olsem wanem Jehova i stretim rot bambai ol manmeri i ken save long nem bilong em; na (3) olsem wanem God i stretim rot na yumi inap save long tok i tru long nau.

JEHOVA I BIN LUKAUTIM TOK BILONG EM

9-11. Olsem wanem Jehova i lukautim Baibel?

⁹ Ol birua i bin mekim planti samting bilong bagarapim Baibel, tasol Jehova i bin lukautim Baibel. Misin Katolik i bin traim long pasim ol man long ritim Baibel. Long yia 1229, ol lotu i bung long Frans na kamapim lo olsem i no stret long ol man i ritim Baibel long tokples bilong ol yet. Long Spen, long yia 1234, ol i bin kamapim wankain lo. Bihain, long yia 1559, Pop Paul Namba 4 i makim olsem Baibel tu em wanpela buk we lotu tasol bai givim tok orait long ol man i ken prinim o holim wanpela kopi bilong ol yet.

¹⁰ Maski ol man i traim long bagarapim Baibel, Jehova i bin lukautim Baibel. Long 1382, John Wycliffe i tanim Namba 1 Baibel long tok Inglis. William Tyndale tu i tanim Baibel i go long tok Inglis. Olsem na ol i kilim em i dai long yia 1536. Ol i taitim em long wanpela pos, na em i singaut na tok: “Bikpela, opim ai bilong king bilong Inglan.” Bihain long dispela, ol i pasim nek bilong em na em i dai, na ol i kukim bodi bilong em long paia.

¹¹ Long 1535, Miles Coverdale i tanim tok bilong Baibel i go long tok Inglis. Taim Coverdale i tanim tok bilong Baibel, em i yusim Baibel em Tyndale i bin tanim tok bilong en, na tu, em i yusim Baibel i stap long tok Latin na Baibel em Martin Luther i raitim long tok Jeman. Long taim bilong yumi, yumi gat Baibel New World Translation of the Holy Scriptures. Yumi amamas olsem yumi gat dispela Baibel, long wanem, ol tok bilong en i klia, na i stret, na em isi long yusim long wok autim tok. Satan na ol man i no inap tru long bagarapim Baibel.

JEHOVA I BIN LUKAUTIM NEM BILONG EM

12. Olsem wanem Baibel New World Translation i bin helpim ol man long save long nem bilong God?

¹² God Jehova i bin stretim rot na bai ol man i no inap rausim nem bilong em long olgeta Baibel. Taim ol brata i kamapim Baibel New World Translation, ol i putim bek nem bilong God, Jehova, long olgeta hap dispela nem i bin stap long en long ol buk bilong Baibel ol i bin raitim long pastaim tru. Dispela nem i stap inap 6,973 taim long Ol Skripsa Hibru na 237 taim long Ol Skripsa Grik. Baibel New World Translation i stap nau long winim 116 tokples, na ol i bin prinim planti tru winim 178,545,862.

13. Olsem wanem yumi save olsem ol manmeri i save long nem bilong God kirap long taim God i wokim Namba 1 man na meri?

¹³ Namba 1 man na meri, em Adam na Iv, ol i save long nem bilong God na ol i bin yusim. Noa tu i bin yusim nem bilong God. Em i tok: “Blesing i ken i stap long Jehova, God bilong Siem.” (Stt. 4:1; 9:26, NW) God i bin yusim nem bilong em taim em i toktok long ol manmeri. Em i tok: “Mi Jehova. Dispela em nem bilong mi, na mi no inap givim glori bilong mi long narapela.” Na tu, God i tok: “Mi Jehova, na i no gat narapela moa i stap. Mi tasol i stap, na i no gat narapela God moa i stap.” (Ais. 42:8; 45:5, NW) Jehova i bin stretim rot na bai ol manmeri long olgeta hap bilong graun inap save long nem bilong em. Yumi mas amamas tru olsem yumi inap yusim nem bilong Jehova na stap olsem lain Witnes bilong em! I olsem yumi mekim dispela tok bilong Baibel: “Bai mipela i tingim dispela na litimapim nem bilong God bilong yumi.”—Sng. 20:5.

14. Nem bilong God i stap long Baibel na i stap tu long wanem hap?

¹⁴ Nem bilong God i stap long Baibel na i stap tu long ol narapela hap. Olsem: Nem bilong God i stap long Ston Bilong Ol Moap, long Dhiban (Dibon), em i stap 21 kilomita longwe long hap is bilong solwara Detsi. Antap long dispela ston i gat stori i kolim King Omri bilong Israel, na tu, i gat tok em King Mesa bilong Moap i mekim taim em i pait long lain Israel. (1 Kin. 16:28; 2 Kin. 1:1; 3:4, 5) Na tu, dispela Ston Bilong Ol Moap i gat nem bilong God em ol i raitim long 4-pela leta Hibru ol i kolim Tetragramaton. Dispela 4-pela leta bilong Hibru i stap planti taim tu long ol Pas Bilong Lakis, em ol hap hap bilong sospen graun ol i painim long Israel.

15. Olsem wanem ol i kamapim Baibel Septuagint? Bilong wanem ol i nidim dispela Baibel?

¹⁵ Winim 2,000 yia i go pinis, ol i tanim ol tok bilong Ol Skripsa Hibru i go long tok Grik na prinim olsem Baibel Septuagint. Bilong wanem ol i tanim ol tok bilong Ol Skripsa Hibru i go long tok Grik? Ol Juda i bin stap kalabus long Babilon inap 70 yia. Taim ol i lusim kalabus long yia 537 B.C.E., sampela i laik stap bek long Babilon. Tasol bihain, planti lain Juda i go sindaun long Aleksandria long Isip we ol manmeri i save mekim tok Grik. Ol dispela Juda tu i mekim tok Grik, olsem na ol i mas i gat Ol Skripsa Hibru em ol i tanim long tok Grik. Sampela Baibel Septuagint long tok Grik i gat nem bilong God long tok Hibru.

16. Olsem wanem Bay Psalm Book i yusim nem bilong God?

¹⁶ Namba 1 buk ol i kamapim long ol hap bilong Amerika em Inglan i bosim, em buk ol i tanim tok bilong en long ol Song we i gat nem bilong God long en. Ol i tanim ol tok bilong en long tok Hibru i go long tok Inglis. Ol i kolim dispela buk olsem Bay Psalm Book, na ol i kirap long prinim long yia 1640. Wanpela hap we ol i raitim nem bilong God olsem Iehovah, em long Song 1:1, 2. Dispela ves i tok olsem man i gat blesing em i no save putim yau long ol tok bilong ol man nogut, nogat, em i save laikim tru “lo bilong Iehovah.” Bilong kisim sampela save moa long nem bilong God, lukim buklet The Divine Name That Will Endure Forever.

JEHOVA I BIN LUKAUTIM TOK I TRU

17, 18. (a) Tok i tru em wanem samting? (b) “Tok tru bilong gutnius” em as bilong wanem ol stretpela save?

¹⁷ Yumi amamas long lotuim “Jehova, em God bilong tok i tru.” (Sng. 31:5, NW) Tok i tru em wanem samting? Tok i tru em stretpela save long wanpela samting. Long ol tokples ol i bin raitim Baibel long en long pastaim, ol tok ol i yusim bilong tanim “tok i tru” i makim olsem wanpela tok em i tru, i stret, na yumi inap bilip long en.

¹⁸ Jehova i bin stretim rot na bai yumi inap save long tok i tru long nau. Na em i wok yet long helpim yumi na bai yumi inap save moa long tok i tru. (2 Jon 1, 2) Dispela i stret wantaim tok bilong Sindaun 4:18, 19, em i tok: “Rot bilong ol stretpela man i lait olsem san i kamap long moningtaim, na lait i wok long kamap strong moa, inap long belo.” Jisas i bin beten long God na i tok: “Tok bilong yu em i tok i tru.” (Jon 17:17) Baibel i kamapim “tok tru bilong gutnius,” em as bilong olgeta stretpela save yumi ol Kristen i bilip long en. (Gal. 2:14) Sampela bilong ol dispela stretpela save em, nem bilong Jehova, wok bos bilong em, pe bilong Jisas long baim bek man, kirap bek, na Kingdom. Orait nau yumi bai kisim save long olsem wanem God i bin lukautim tok i tru maski Satan i bin mekim ol samting bilong bagarapim.

JEHOVA I PASIM SATAN LONG HAITIM TOK I TRU

19, 20. Nimrot em i husat? Taim Nimrot i mekim wok bos, ol manmeri i laik mekim wanem?

¹⁹ Bihain long taim bilong Bikpela Tait, Nimrot i kamap. Em i wanpela saveman tru bilong painim abus, na em i birua long Jehova. (Stt. 10:9) Nimrot i bin birua long God Jehova, olsem na yumi ken tok em i mekim wok bilong Satan. Nimrot i wankain olsem ol man husat i bin birua long Pikinini Bilong God. Jisas i tokim ol: “Yupela i kam long Papa bilong yupela, em Satan. Na yupela i laik bihainim laik bilong papa bilong yupela” husat “i no holimpas tok i tru.”—Jon 8:44.

²⁰ Nimrot i bosim taun Babel na ol narapela taun namel long wara Taigris na wara Yufretis. (Stt. 10:10) Yumi inap tok olsem Nimrot i bin kirapim wok bilong wokim taun Babel na taua bilong en long yia 2269 B.C.E. Jehova i laik bai ol man i go sindaun long olgeta hap bilong graun, tasol ol man bilong wokim taun Babel i tok: “Nau yumi mas wokim wanpela bikpela taun bilong yumi yet, na wanpela longpela taua insait long en. Dispela taua bai i go antap inap long skai. Olsem na bai ol manmeri i lukim dispela wok, na ol i litimapim nem bilong yumi. Na bai yumi no ken bruk nabaut na i go i stap long narapela narapela hap bilong graun.” Tasol ol i no pinisim wok bilong sanapim dispela taua, long wanem, God i “paulim tok ples bilong ol dispela pipel.” Olsem na ol manmeri i lusim Babel na i go nabaut long ol narapela hap. (Stt. 11:1-4, 8, 9) Satan i laik bagarapim lotu i tru na kirapim olgeta man long lotuim em. Tasol Jehova i lukautim lotu i tru, olsem na long nau planti manmeri moa i kirap long lotuim Jehova.

21, 22. (a) Bilong wanem i no gat wanpela samting i bin bagarapim na pinisim lotu i tru? (b) Long neks stadi, yumi bai kisim save long wanem samting?

²¹ I no gat wanpela taim bipo we ol lotu giaman i bagarapim na pinisim lotu i tru. Bilong wanem? Long wanem, Nambawan Bikpela Tisa bilong yumi, Jehova, i bin stretim rot bambai yumi gat Baibel, yumi save long nem bilong em, na yumi save long tok i tru. (Ais. 30:20, 21) Taim yumi bihainim pasin God i makim bilong lotuim em, dispela i givim bikpela amamas long yumi. Tasol yumi mas was gut na bilipim tasol ol tok i tru, na bihainim ol tok em holi spirit i kamapim bilong stiaim yumi.

²² Long neks stadi, yumi bai kisim save long olsem wanem sampela lotu i kirap long skulim ol man long God, tasol ol i skulim ol long ol tok i no stret. Yumi bai kisim save olsem Baibel i no as bilong ol dispela tok. Na yumi bai kisim save olsem Jehova i bin mekim gut long yumi na yumi inap kisim stretpela save long em. Olgeta dispela samting em ol gutpela samting tru bilong yumi.