Jisas​—Rot Bilong Kisim Laip i Gat As Tru Bilong En

YU TING i stap bilong Jisas i gat as tru bilong en? Em i kamap bikpela insait long wanpela famili i no gat planti samting, na long laip olgeta bilong em long graun em i holim liklik samting tasol. Tru tumas, em “i no gat ples bilong slip.” (Luk 9:57, 58) Na tu, ol man i heitim em, tok nogutim em, na bihain ol birua bilong em i kilim em i dai.

Ating bai yu tok, ‘Mi no ting dispela kain laip i gat as tru bilong en!’ Tasol i gat planti samting long laip bilong Jisas em i gutpela long yumi save long en. Bai yumi skelim 4-pela samting long laip bilong em.

1. I STAP BILONG JISAS I GAT AS TRU BILONG EN—BILONG MEKIM LAIK BILONG GOD.

“Kaikai bilong mi em long mekim laik bilong man i bin salim mi i kam.”—Jon 4:34.

Long toktok na pasin bilong em, Jisas i wok strong long inapim laik bilong Papa bilong em long heven, em Jehova.a Jisas i kisim bikpela amamas tru long mekim laik bilong God. Em i tok dispela wok i olsem kaikai bilong em, olsem yumi lukim long dispela skripsa. Tingim samting i bin kamap na em i mekim dispela tok.

Jisas i mekim dispela tok long belo samting. (Jon 4:6) Long moning olgeta em i bin wokabaut long ol ples maunten bilong kantri Samaria na em hangre tru. Ol disaipel bilong em i tokim em: “Rabai, yu mas kaikai.” (Jon 4:31) Bekim bilong Jisas i soim olsem taim em i mekim wok bilong God dispela i givim strong long em. Yu ting tok bilong em i kamapim olsem i stap bilong em i gat as tru bilong en?

2. JISAS I LAIKIM TRU PAPA BILONG EM.

“Mi laikim Papa.”—Jon 14:31.

Jisas i pas gut tru wantaim Papa bilong em long heven. Pasin bilong Jisas long laikim tru God i kirapim em long tokim ol narapela long Papa bilong em—nem bilong Papa, ol samting Papa i tingting pinis long mekim, na ol pasin bilong Papa. Long ol toktok, pasin na tingting bilong em, Jisas i kamapim stret pasin bilong Papa bilong em—na taim yumi lukim pasin bilong Jisas, i olsem yumi lukim piksa bilong Papa bilong em. Olsem na taim Filip i tokim Jisas: “Soim Papa long mipela,” Jisas i bekim tok: “Man i lukim mi, em i lukim Papa tu.”—Jon 14:8, 9.

Jisas i laikim tru Papa bilong em na em i redi long bihainim tok bilong em i go inap long em i dai. (Filipai 2:7, 8; 1 Jon 5:3) Kain pasin bilong laikim tru God i mekim na i stap bilong Jisas i gat as tru bilong en.

3. JISAS I LAIKIM OL MANMERI.

“Sapos man i lusim laip bilong en bilong helpim ol pren bilong en, dispela pasin laikim i bikpela moa winim ol arapela pasin laikim.”—Jon 15:13.

Yumi ol sinman i no inap i stap laip oltaim long bihain. Baibel i tok: “Long rot bilong wanpela man tasol sin i kamap long graun. Na sin i bringim dai i kam. Na long dispela rot dai i painim olgeta manmeri, long wanem, olgeta i bin mekim sin.” (Rom 5:12) Long strong bilong yumi yet yumi no inap abrusim pe bilong sin, em dai.—Rom 6:23.

Gutpela tru Jehova i wokim wanpela rot bilong pinisim tru ol hevi bilong ol man. Em i larim nambawan gutpela Pikinini Man bilong em i no gat sin, em Jisas, long karim pen na hevi na i dai bilong givim pe bilong baim bek man long kalabus bilong sin na dai. Pasin bilong Jisas long laikim Papa na ol manmeri, i kirapim em long redi long bihainim laik bilong Papa na givim laip bilong em i gutpela olgeta bilong helpim ol man. (Rom 5:6-8) Kain pasin laikim olsem i mekim na laip bilong em i gat as tru bilong en.b

4. JISAS I SAVE OLSEM PAPA BILONG EM I LAIKIM EM NA AMAMAS LONG EM.

“Dispela em i Pikinini bilong mi, mi laikim em tumas na mi amamas long em.”—Matyu 3:17.

Jehova i stap long heven na mekim dispela tok long taim Jisas i bin kisim baptais. Em i tokaut klia olsem em i laikim tru Pikinini bilong em, Jisas, na amamas long em. Olsem na Jisas inap tok stret olsem: “Papa i laikim mi”! (Jon 10:17) Jisas i save olsem Papa i laikim em na amamas long em, na dispela i strongim em long karim hevi taim ol man i birua na tok bilas long em. Em i holim tu stretpela tingting na strongim bel long taim em i dai. (Jon 10:18) Jisas i save olsem Papa i laikim em na orait long em, dispela tu i mekim na laip bilong em i gat as tru bilong en.

Tru tumas, i stap bilong Jisas i gat as tru bilong en. Yumi inap lainim planti samting long pasin bilong em—long yumi ken mekim wanem na bai laip bilong yumi i gat as tru bilong en. Long atikol i kamap bihain bai yumi skelim sampela skultok em Jisas i givim long ol disaipel bilong em bilong helpim ol long sindaun bilong ol.