Olsem Wanem God Bai Pinisim Pasin Nogut?

Baibel i kamapim klia olsem Jehova na Pikinini bilong em, Krais Jisas bai pinisim ol pen na hevi em Satan i kamapim. Baibel i tok: “As na Pikinini bilong God [Jisas] i kamap ples klia em i olsem: Em bilong bagarapim ol samting Satan i kamapim.” (1 Jon 3:8) Taim nau yumi stap long en i pulap long pasin gridi, birua long narapela, na olgeta kain pasin nogut, ol dispela pasin bai pinis olgeta. Jisas i tok, em “bai rausim hetman bilong dispela graun,” em dispela man nogut Satan. (Jon 12:31) Taim Satan i no bosim moa ol man, wanpela nupela taim bai kamap we i gat stretpela pasin na ol manmeri bai stap bel isi long graun.—2 Pita 3:13.

Wanem samting bai painim ol man i no laik senisim pasin bilong ol na ol i mekim yet ol pasin nogut? Baibel i tok promis olsem: “Ol gutpela stretpela man bai i stap gut oltaim long graun bilong yumi. Tasol God bai rausim ol man i save mekim pasin nogut na ol i no save bihainim em. Em bai i kamautim ol, olsem man i kamautim kaikai long gaden bilong en.” (Sindaun 2:21, 22) Ol man nogut bai pinis olgeta. Long dispela taim ol man husat i bihainim tok bilong God ol bai stap bel isi na isi isi ol bai lusim kalabus bilong sin.—Rom 6:17, 18; 8:21.

Long dispela nupela taim, God bai mekim wanem long pinisim ol pasin nogut? Em bai i no kontrolim ol olsem robot, nogat. Em bai skulim ol man long ol pasin bilong em, long dispela rot em i helpim ol long lusim ol tingting na pasin nogut bilong ol.

God bai mekim wanem long pinisim ol hevi? Em i tok promis olsem klostu nau Kingdom bilong em bai bosim graun. God i makim King bilong dispela Kingdom em Krais Jisas, na Em i givim strong long em long pinisim ol sik. (Matyu 14:14) Jisas i gat strong tu long bosim ol samting bilong graun olsem win na ren samting. (Mak 4:35-41) Ol pen na hevi em “taim nogut” i save kamapim bai pinis olgeta. (Saveman 9:11) Taim Krais i mekim wok bos, olgeta manmeri bai i no karim pen na hevi moa.—Sindaun 1:33.

Wanem samting bai painim planti milion manmeri husat i nogat asua em ol i bin dai long rot bilong bikpela sik o eksiden samting? Paslain liklik long Jisas i kirapim bek pren bilong em Lasarus, Jisas i tok: “Kirap bek em mi yet na laip em mi yet.” (Jon 11:25) Tru tumas, Jisas i gat strong long kirapim bek ol man i dai pinis!

Sapos yu amamas long save olsem bai i gat wanpela taim bai kamap we ol hevi i no inap painim ol gutpela man, yu inap kisim sampela save moa long God tru na ol samting em i tingting pinis long mekim long rot bilong stadi long Baibel. Ol Witnes Bilong Jehova long hap bilong yu bai amamas long helpim yu long mekim olsem. Mipela i laik bai yu toktok wantaim ol o raitim pas i go long ol lain bilong wokim dispela nius.