“Oltaim Tingting Bilong Yupela i Mas Stap Long Ol Samting Bilong Ples Antap”

1, 2. (a) Long taim bilong ol aposel, wanem hevi i painim kongrigesen long Kolosi? (b) Wanem tok kaunsel i helpim ol bratasista long Kolosi long sanap strong yet?

LONG taim bilong ol aposel, hevi i painim kongrigesen long Kolosi! Sampela insait long kongrigesen i strong long ol Kristen i mas bihainim Lo Bilong Moses, na dispela i kirapim ol long brukim lain. Sampela narapela i strongim pasin bilong ol haiden long tambuim ol yet long olgeta kain amamas. Pol i laik stretim ol dispela tingting kranki bilong ol, olsem na em i raitim pas i go long ol Kristen long Kolosi na tokim ol olsem: “Yupela lukaut, nogut wanpela i trapim yupela long rot bilong savetingting bilong ol man na tok giaman. Kastam bilong ol man i as bilong ol dispela samting na i stret wantaim ol bikpela tingting bilong graun, tasol i no stret wantaim ol tok Krais i skulim ol man long en.”—Kol. 2:8.

² God i bin makim ol dispela Kristen long holi spirit, olsem na sapos oltaim tingting bilong ol i stap long “ol bikpela tingting bilong dispela graun,” ol bai givim baksait long rot bilong Jehova long kisim bek ol. (Kol. 2:20-23) Pol i laik helpim ol long lukautim gut pasin bilong ol long pas gut wantaim God, olsem na em i tok: “Oltaim tingting bilong yupela i mas stap long ol samting bilong ples antap, na i no long ol samting i stap long graun.” (Kol. 3:2) Yes, ol brata bilong Krais inap kisim blesing we i no inap bagarap, ‘em samting God i makim bilong ol long heven,’ olsem na oltaim tingting bilong ol i mas stap long dispela blesing.—Kol. 1:4, 5.

3. (a) Ol Kristen God i bin makim, oltaim tingting bilong ol i stap long wanem samting? (b) Yumi bai skelim wanem ol askim long dispela stadi?

³ Long nau, ol Kristen God i bin makim long holi spirit, oltaim tingting bilong ol tu i stap long Kingdom Bilong God long heven, na oltaim ol i tingim blesing ol bai kisim long “kamap wanlain wantaim Krais.” (Rom 8:14-17) Tasol olsem wanem long ol Kristen i bilip na wet long kisim laip long graun? Olsem wanem ol inap bihainim tok bilong Pol? Olsem wanem “ol arapela sipsip” inap tingting oltaim long “ol samting bilong ples antap”? (Jon 10:16) Hevi i bin painim ol bilipman bilong bipo olsem Abraham na Moses, tasol oltaim tingting bilong ol i stap long ol samting bilong ples antap. Olsem na taim yumi skelim eksampel bilong ol, hau bai dispela inap helpim yumi?

TINGTING I MAS STAP LONG OL SAMTING BILONG PLES ANTAP

4. Olsem wanem ol arapela lain sipsip inap putim tingting i go long ol samting bilong ples antap?

⁴ Maski ol arapela lain sipsip i no inap kisim laip long heven, ol tu i mas putim tingting long ol samting bilong ples antap. Ol inap mekim olsem taim ol i putim God Jehova na wok bilong Kingdom i stap namba 1 samting long laip bilong ol. (Luk 10:25-27) Olsem na Krais i stap olsem gutpela piksa yumi ken bihainim. (1 Pita 2:21) Wankain olsem ol Kristen long taim bilong ol aposel, yumi tu i save harim ol giaman tingting, ol save bilong dispela graun, na tingting bilong kisim planti mani kago long dispela haptaim bilong nau em Satan i bosim. (Ritim 2 Korin 10:5.) Yumi stap olsem ol disaipel bilong Jisas, olsem na yumi mas was i stap na no ken larim ol dispela samting i bagarapim bilip bilong yumi.

5. Olsem wanem yumi inap painimaut sapos yumi gat tingting bilong bungim planti mani kago?

⁵ Olsem wanem? Yumi stat long kisim tingting bilong dispela graun long bungim planti mani kago? Tingting na toktok bilong yumi bai kamapim klia ol samting yumi laikim. Jisas i tok: “Long ples we ol gutpela gutpela samting bilong yu i stap long en, long dispela ples laik bilong bel bilong yu tu bai stap.” (Mat. 6:21) Olgeta taim yumi mas skelim yumi yet na bai yumi inap luksave long wanem kain tingting i stap insait long bel bilong yumi. Askim yu yet: ‘Mi save lusim hamas taim long tingting long hevi bilong mani? Mi save lusim bikpela haptaim long tingim ol samting bilong wok bisnis, ol invesmen, na tingting long kisim gutpela sindaun? Mi wok strong long putim tingting i go long pasin bilong pas gut wantaim God?’ (Mat. 6:22) Jisas i tok olsem, sapos ol manmeri i tingting tasol long ‘bungim ol gutpela gutpela samting long graun,’ dispela bai bagarapim pasin bilong ol long pas gut wantaim God.—Mat. 6:19, 20, 24.

6. Olsem wanem yumi inap daunim ol laik bilong skin?

⁶ Yumi gat sin, olsem na dispela inap pulim yumi long mekim ol samting bilong inapim ol laik bilong yumi yet. (Ritim Rom 7:21-25.) Sapos holi spirit i no stiaim laip bilong yumi, yumi inap insait long “olgeta pasin bilong tudak.” Dispela inap makim tu ol kain pasin olsem, pasin bilong mekim ‘ol pati i gat planti pairap, dring spak, pasin pamuk na pasin bikhet na i no sem.’ (Rom 13:12, 13) Yumi no laik bai tingting bilong yumi i stap long “ol samting i stap long graun,” em ol laik bilong skin, olsem na oltaim tingting bilong yumi i mas stap long ol samting bilong ples antap. Yumi mas wok strong long mekim olsem. Olsem na aposel Pol i tok: “Mi save paitim tru bodi bilong mi yet na mekim bodi i stap wokboi bilong mi.” (1 Kor. 9:27) Dispela i soim olsem yumi mas taitim bun tru sapos yumi laik ron yet long resis bilong laip! Yumi ken skelim stori bilong 2-pela bilipman bilong bipo husat i bin “mekim God i amamas.”—Hib. 11:6.

ABRAHAM “I BILIPIM TOK” BILONG JEHOVA

7, 8. (a) Abraham na Sara i bin bungim wanem ol hevi? (b) Abraham i tingting tasol long wanem samting?

⁷ Taim Jehova i tokim Abraham long bringim famili bilong em i go sindaun long graun bilong Kenan, Abraham i bihainim tok. Abraham i bilip na bihainim tok, olsem na Jehova i mekim wanpela kontrak wantaim em na tok: “Bai mi mekim ol lain tumbuna bilong yu i kamap bikpela lain tru. Na bai mi mekim gut long yu.” (Stt. 12:2) Tasol planti yia i lus na Abraham na Sara i no gat pikinini. Yu ting Jehova i lusim tingting long promis em i bin mekim long Abraham? Laip long Kenan i hatwok. Abraham na ol wanhaus bilong em i lusim haus na ol wanblut bilong ol long Ur, em wanpela biktaun i gat planti mani kago long Mesopotemia. Ol i wokabaut winim 1 tausen 6 handret kilomita bilong i go long Kenan, na long Kenan ol i sindaun long ol haus sel, karim hevi bilong bikpela hangre, na ol birua i kam stilim ol samting bilong ol. (Stt. 12:5, 10; 13:18; 14:10-16) Maski i olsem, ol i no gat laik long i go bek long kisim gutpela sindaun long Ur!—Ritim Hibru 11:8-12, 15.

⁸ Abraham i no putim tingting i go long “ol samting i stap long graun,” nogat, em i “bilipim tok bilong Bikpela.” (Stt. 15:6) Yes, oltaim tingting bilong em i stap long ol samting bilong ples antap, olsem em i tingting tasol long ol tok promis bilong God. Olsem na God Antap Tru i kamap long Abraham na i tokim em olsem: “‘Yu lukluk i go antap long skai na yu lukim ol sta. Ating yu inap kaunim ol, a? Ol tumbuna pikinini bilong yu bai i kamap planti tru, olsem ol sta.’” (Stt. 15:5) Ating dispela i bin strongim tru bel bilong Abraham! Olgeta taim Abraham i lukluk i go antap long skai na lukim ol sta, em i save tingim gen tok promis bilong Jehova long mekim ol tumbuna pikinini bilong em i kamap planti tru. Bihain, long taim God yet i makim, Abraham i kamapim wanpela pikinini, olsem God i bin tok promis long en.—Stt. 21:1, 2.

9. Taim yumi bihainim pasin bilong Abraham, hau bai dispela i strongim yumi long mekim yet wok bilong God?

⁹ Wankain olsem Abraham, yumi tu i wet long lukim truim bilong ol tok promis bilong God. (2 Pita 3:13) Sapos oltaim tingting bilong yumi i no stap long ol samting bilong ples antap, yumi inap pilim olsem truim bilong ol dispela tok promis i no inap kamap hariap na yumi no inap givim bel tumas long mekim ol wok bilong Kingdom. Olsem wanem? I gat wanpela taim bipo we yu bin lusim sampela samting o daunim sampela laik bilong yu yet na bai yu inap mekim wok painia o mekim bikpela wok moa long wok bilong Kingdom? Sapos yu bin mekim olsem, orait mipela i tok amamas long yu. Tasol olsem wanem long nau? Tingim, Abraham i bin putim tingting i go long “dispela taun i stap strong tru.” (Hib. 11:10) Abraham “i bilip long Jehova, olsem na [Jehova] i tingim Abraham olsem stretpela man.”—Rom 4:3.

MOSES I LUKIM “MAN EM OL MAN I NO INAP LUKIM LONG AI”

10. Wanem samting i painim Moses taim em i yangpela yet?

¹⁰ Moses tu em narapela man husat i bin putim tingting bilong em i go long ol samting bilong ples antap. Taim em i stap yangpela yet, em i bin “kisim skul long olgeta gutpela save bilong ol Isip.” Em i kisim bikpela save tru. Isip i stap strongpela kantri long dispela taim, na tu, Moses i stap olsem wanhaus bilong Fero. Dispela bikpela save i mekim na Moses inap “mekim ol strongpela toktok na ol strongpela wok.” (Apo. 7:22) Tingim olgeta gutpela samting em Moses inap kisim! Tasol Moses i putim tingting i go long ol bikpela samting moa, olsem em i laik mekim laik bilong God.

11, 12. (a) Long tingting bilong Moses, wanem kain save i winim tru olgeta narapela save? (b) Olsem wanem yumi save long dispela?

¹¹ Jokebet em mama bilong Moses, na taim Moses i liklik yet, mama bilong em i skulim em long God bilong ol Hibru. Long tingting bilong Moses, save i kam long Jehova i winim tru olgeta gutpela samting bilong Isip. Em i stap olsem wanhaus bilong Fero, olsem na em inap kisim ol gutpela wok na planti gutpela samting, tasol em i lusim olgeta dispela samting. (Ritim Hibru 11:24-27.) Moses i bin kisim save i kam long Jehova na em i bilip long Jehova, na dispela i kirapim em long putim tingting i go long ol samting bilong ples antap.

¹² Moses i bin kisim nambawan gutpela skul long dispela taim bipo. Tasol yu ting em i bin yusim save bilong em long kisim bikpela wok long Isip, kisim biknem, na bungim planti mani kago? Nogat. Sapos em i bin mekim olsem, em bai orait long “ol i kolim em olsem tumbuna pikinini bilong Fero.” Na tu, dispela bai pasim rot bilong em long “wokim tingting olsem i gutpela long kisim hevi wantaim lain bilong God,” na em bai “bihainim pasin bilong sin na kisim amamas bilong sotpela taim tasol.” Yumi save olsem Moses i bin kisim save long Jehova na em i yusim dispela save long mekim samting em Jehova i tingting pinis long mekim.

13, 14. (a) Wanem samting i kamap na i redim Moses long kisim asainmen em Jehova i givim long em? (b) Olsem Moses, yumi tu i mas mekim wanem?

¹³ Moses i tingim tru Jehova na lain bilong Em. Taim Moses i gat 40 krismas, em i pilim olsem em i redi long helpim lain bilong God long lusim kalabus long Isip. (Apo. 7:23-25) Tasol paslain long Jehova i givim dispela asainmen long em, Moses i mas kisim sampela moa pasin. Em i mas kisim pasin daun, pasin bilong i no les kwik, pasin isi, na pasin bilong bosim bel. (Snd. 15:33) Moses i mas kisim trening bilong redim em long karim ol hevi bai kamap bihain. Inap 40 yia em i mekim wok olsem wasman bilong ol sipsip, na long dispela rot em i kisim trening bilong kamapim ol pasin bilong God.

¹⁴ Taim Moses i mekim wok olsem wasman bilong sipsip, yu ting dispela i bin skulim em long sampela pasin? Yes, em i bin kisim gutpela skul! Baibel i tok olsem Moses i kamap man i “daunim em yet, na i no gat wanpela man long dispela graun i save daunim em yet inap olsem Moses.” (Nam. 12:3) Em i kisim pasin daun, olsem na em i soim pasin isi na em i no les kwik long helpim kain kain manmeri husat i gat ol bikpela hevi. (Kis. 18:26) Olsem tasol, yumi tu i mas kisim ol pasin bilong God, na dispela bai helpim yumi long abrusim “traipela hevi tru” na kisim laip long nupela taim God bai kamapim na stretpela pasin tasol bai i stap long en. (Rev. 7:14) Olsem wanem? Yumi inap stap gut yet wantaim olgeta manmeri, na stap gut tu wantaim ol manmeri husat i gat pasin bilong belhat kwik o bel hevi kwik? Yumi mas bihainim tok bilong aposel Pita, em i bin tokim ol wanbilip olsem: “Yupela i mas givim ona long olgeta kain man, na laikim tru olgeta wanbilip bilong yupela.”—1 Pita 2:17.

PUTIM TINGTING LONG OL SAMTING BILONG PLES ANTAP

15, 16. (a) Bilong wanem na oltaim tingting bilong yumi i mas stap long ol stretpela samting? (b) Bilong wanem em i bikpela samting long ol Kristen i mas bihainim gutpela pasin?

¹⁵ Yumi stap long “taim nogut . . . na dispela bai givim hatwok” long yumi. (2 Tim. 3:1) Olsem na oltaim tingting bilong yumi i mas stap long ol stretpela samting, na dispela bai helpim yumi long wok strong yet long mekim wok bilong God. (1 Tes. 5:6-9) Yumi ken stori nau long olsem wanem yumi inap bihainim dispela tok long 3-pela samting long laip bilong yumi.

¹⁶ Pasin bilong yumi: Pita i luksave olsem em i bikpela samting long yumi mas bihainim gutpela pasin. Em i tok: “Mekim yet ol gutpela pasin namel long ol manmeri bilong graun, na . . . ol bai lukim gutpela pasin bilong yupela na long dispela rot ol inap givim glori long God.” (1 Pita 2:12) Maski yumi stap long haus, long ples wok, long skul, yumi raun, o yumi mekim wok autim tok, yumi mas wok strong long bihainim gutpela pasin na dispela bai givim glori long Jehova. Yumi ol sinman, olsem na yumi olgeta i save mekim ol popaia. (Rom 3:23) Tasol taim yumi wok yet long “pait strong long winim gutpela pait bilong bilip,” yumi inap daunim ol laik nogut bilong skin.—1 Tim. 6:12.

17. Olsem wanem yumi inap bihainim wankain tingting olsem Krais Jisas i bin holim? (Lukim piksa long kirap bilong stadi.)

¹⁷ Tingting bilong yumi: Sapos yumi laik bihainim gutpela pasin, orait yumi mas holim stretpela tingting. Aposel Pol i tok: “Yupela i mas holim wankain tingting olsem Krais Jisas tu i bin holim.” (Fili. 2:5) Jisas i bin holim wanem kain tingting? Em i bihainim pasin daun. Pasin daun i kirapim em long daunim laik bilong em yet na mekim wok autim tok. Long tingting bilong em, nambawan bikpela samting em wok bilong autim gutnius bilong Kingdom Bilong God. (Mak 1:38; 13:10) Jisas i tingim olsem Tok Bilong God tasol i stret olgeta na ol man i mas bihainim. (Jon 7:16; 8:28) Em i stadi gut long ol tok i stap long Ol Rait Holi na bai em inap kolim ol dispela tok, sambai long en, na stori gut long mining bilong en. Taim yumi bihainim pasin daun na givim bel tru long mekim wok autim tok na mekim Baibel stadi bilong yumi yet, yumi bai holim wankain tingting olsem Krais.

18. Wanem nambawan gutpela rot bilong helpim tru wok bilong Jehova?

¹⁸ Helpim bilong yumi: Jehova i laik bai “olgeta i ken brukim skru long nem bilong Jisas, em olgeta long heven na long graun.” (Fili. 2:9-11) Maski Jisas i kisim pinis bikpela namba, em bai stap daun yet long bihainim laik bilong Papa bilong em, na yumi tu i mas mekim wankain pasin. (1 Kor. 15:28) Long wanem rot? Yumi mas givim bel olgeta long mekim gut wok God i tokim yumi long mekim, em long “kamapim ol disaipel long olgeta lain man.” (Mat. 28:19) Na tu, yumi laik “mekim gutpela pasin long olgeta man,” em olgeta narapela manmeri yumi bungim, na ol wanbilip bilong yumi.—Gal. 6:10.

19. Yumi mas tingting strong long mekim wanem?

¹⁹ Yumi tenkyu tru olsem Jehova i kirapim yumi long putim tingting i go long ol samting bilong ples antap! Yumi mas “sanap strong na ran long dispela resis God i makim bilong yumi.” (Hib. 12:1) Yumi olgeta i mas mekim wok bilong Jehova na “givim bel olgeta na strong olgeta long mekim” dispela wok, na Papa bilong yumi long heven bai blesim olgeta hatwok bilong yumi.—Kol. 3:23, 24.