Kingdom Bilong God i Kirap Mekim Wok Bos Long Wanem Taim?​—Namba 2 Hap

DRIMAN BILONG NEBUKATNESAR

Cameron: Mi amamas long lukim yu gen. Mi save luk fowed long ol Baibel stadi bilong yumi long olgeta wik.a So yu stap orait?

Jon: Mi orait.

Cameron: Em gutpela. Las taim yumi stori long as na ol Witnes Bilong Jehova i bilip olsem Kingdom Bilong God i kirap mekim wok bos long yia 1914.b Olsem yumi stori pinis, yumi kisim skul long wanpela bikpela tok bilong dispela tok profet i stap long Baibel long buk Daniel sapta 4. Yu inap tingim bikpela tok bilong dispela sapta?

Jon: Em i stori long Nebukatnesar i driman na lukim wanpela bikpela diwai.

Cameron: Em stret. Long driman bilong em, Nebukatnesar i lukim wanpela bikpela diwai i gro i go antap long heven. Na em i harim wanpela ensel bilong God i tok long ol i mas katim dispela diwai, tasol ol i no ken kamautim as bilong en. Bihain long “7-pela yia,” dispela diwai bai gro gen.c Na yumi bin stori tu long as na dispela tok profet i gat 2-pela truim. Yu inap tingim namba 1 truim bilong en i bin kamap long wanem taim?

Jon: Yes, mi tingim. Namba 1 truim em long taim Nebukatnesar i kamap longlong inap 7-pela yia.

Cameron: Em nau. Nebukatnesar i stap olsem longlong man inap 7-pela yia, olsem na em i no mekim wok king insait long dispela haptaim. Tasol bikpela truim bilong dispela tok profet i makim wok bos bilong God, ol man bai sakim wok bos bilong Em inap sampela haptaim. Dispela haptaim i kirap long 607 B.C.E. taim Jerusalem i bagarap. Na tu, kirap long dispela taim God Jehova i no makim ol man long graun long stap olsem ol king bilong bosim lain bilong em. Tasol bihain long 7-pela yia i pinis, God bai makim wanpela nupela Hetman husat bai mekim wok king long heven na bosim lain bilong em long graun. So taim dispela 7-pela yia i pinis, Kingdom Bilong God long heven bai kirap mekim wok bos. Yumi stori pinis long kirap bilong dispela 7-pela yia. Olsem na sapos yumi save long longpela bilong dispela haptaim, bai yumi inap save long yia Kingdom Bilong God i kirap mekim bos. Yu klia long dispela tok?

Jon: Yes, dispela liklik riviu i helpim mi na nau mi tingim ol samting yumi bin stori long en.

Cameron: Em gutpela. Orait nau yumi ken stori long dispela 7-pela yia i makim hamas yia stret. Mi mekim sampela wok painimaut bilong helpim mi long tingim gen ol bikpela tok bilong dispela tok profet.

Jon: Gutpela, yu ken stori long dispela.

SEVENPELA YIA I PINIS, TAIM BILONG LAS DE I KIRAP

Cameron: Long namba 1 truim bilong tok profet we i makim Nebukatnesar, dispela 7-pela yia i makim stret 7-pela yia. Tasol long bikpela truim bilong dispela tok profet we i makim Kingdom Bilong God, dispela 7-pela yia i no makim stret 7-pela yia, nogat, em i makim wanpela haptaim we i longpela liklik.

Jon: Bilong wanem yu tok olsem?

Cameron: Tingim, dispela 7-pela yia i kirap taim Jerusalem i bagarap long 607 B.C.E. Sapos kirap long 607 B.C.E, yumi kaunim 7-pela yia i go bek, bai yumi kamap long 600 B.C.E. Tasol long dispela yia, i no gat wanpela samting i stori long Kingdom Bilong God. Na tu, olsem las taim yumi stori, planti handret yia paslain long Jisas i kam long graun, em i tokaut olsem dispela 7-pela yia i no pinis yet.

Jon: Yes, nau mi tingim.

Cameron: Olsem na dispela 7-pela yia i no makim stret 7-pela yia, nogat, em i makim wanpela longpela haptaim.

Jon: So hamas yia stret i insait long dispela haptaim?

Cameron: Long Baibel, buk Revelesen i mekim wankain tok olsem i stap long buk Daniel, olsem na Revelesen i helpim yumi long save long longpela bilong dispela 7-pela yia. Em i kamapim klia olsem 3 na hap yia em 1,260 de.d So 1,260 de taims 2 em 2,520 de. Dispela tok em klia?

Jon: Mi klia nau. Tasol olsem wanem dispela tok inap helpim yumi long save olsem Kingdom Bilong God i kirap mekim wok bos long yia 1914?

Cameron: Orait, yumi ken stori long olsem wanem dispela tok long buk Revelesen i helpim yumi long save long dispela. Sampela taim long ol tok profet bilong Baibel, wanpela de i makim wanpela yia.e Sapos yumi bihainim dispela pasin bilong kaunim olsem wanpela de i makim wanpela yia, dispela 7-pela yia i makim 2, 520 yia. So taim yumi kirap long 607 B.C.E. na kaunim 2,520 yia na i go, bai yumi kamap long yia 1914.f Dispela i helpim yumi long save olsem dispela 7-pela yia i pinis long yia 1914, na kirap long dispela yia Jisas i mekim wok King long Kingdom Bilong God. Na tu, kirap long 1914, ol bikpela hevi i kamap na dispela i truim tok profet bilong Baibel long ol samting bai kamap long las de.

Jon: Wanem ol samting bai kamap?

Cameron: Yumi ken ritim tok bilong Jisas long Matyu 24:7. Jisas i stori olsem taim em i mekim wok king long heven, ol dispela hevi bai kamap. Em i tok: “Wanpela kantri bai pait long narapela kantri na wanpela kingdom bai pait long narapela kingdom. Na bai i gat taim bilong ol bikpela hangre na ol guria bai kamap long narapela narapela hap.” Jisas i tok bai i gat ol guria na bikpela hangre long taim bilong las de. Inap planti yia nau, yumi lukim ol dispela samting i kamap long olgeta hap bilong graun.

Jon: Em tru.

Cameron: Na tu, Jisas i tok taim em i stap King long Kingdom Bilong God, ol kingdom o gavman bai pait long narapela narapela. Na buk Revelesen i stori olsem long taim bilong las de, ol kantri bai pait long narapela narapela na dispela bai givim hevi long olgeta man long graun.g Yu inap tingim Wol Woa 1 i kamap long wanem yia?

Jon: Long yia 1914, em dispela yia Jisas i kirap mekim wok king! Mi no bin save long dispela.

Cameron: Taim yumi skelim tok profet bilong dispela 7-pela yia, na ol narapela tok profet i stori long las de, yumi inap luksave olsem Kingdom Bilong God i kirap mekim wok bos long yia 1914. Ol Witnes Bilong Jehova i bilip long dispela, na tu, ol i bilip olsem taim bilong las de i kirap long yia 1914.h

Jon: Em planti samting long tingim.

Cameron: Olsem yumi stori pinis, pastaim mi yet i hatwok long kliagut long olgeta dispela tok. Tasol mi bilip olsem stadi bilong yumi i helpim yu long luksave olsem maski Baibel i no kolim yia 1914, Baibel i as bilong bilip bilong ol Witnes Bilong Jehova.

Jon: Mi save amamas long dispela pasin bilong yupela long ritim ol skripsa bilong Baibel long strongim ol tok yupela i mekim. Na yupela i no kamapim tingting bilong yupela yet. Tasol bilong wanem God i no kolim stret yia 1914 long Baibel na bai yumi ken save olsem Jisas i kirap mekim wok king long heven?

Cameron: Em gutpela askim. I gat planti samting em Baibel i no kolim stret. Taim mi kam bek, bai yumi stori long as na God i kamapim ol tok bilong Baibel long pasin we yumi mas wok hat long painim tok i tru. Em orait yumi stori long dispela long narapela taim?

Jon: Em orait.