FRAN PES STORI | YU LAIK STADI LONG BAIBEL?

Baibel Stadi Kos Bilong Olgeta Man

Klostu olgeta man i save olsem ol Witnes Bilong Jehova i save autim tok long ol pablik ples. Tasol yu save olsem ol i save mekim ol Baibel stadi kos tu?

Wanpela man i mekim Baibel stadi kos long ples wok bilong en

Long 2014, winim 8 milion Witnes long 240 kantri i mekim klostu 9 milion na 500 tausen Baibel stadi kos long olgeta wan wan mun.a Tingim, namba bilong ol man i stadi long Baibel wantaim ol Witnes i winim populesen bilong klostu 140 kantri!

Bilong skulim ol man long tok bilong Baibel, long olgeta yia ol Witnes Bilong Jehova i prinim klostu 1.5 bilion Baibel na ol buk na nius. Na ol i wokim ol dispela buk na nius samting long klostu 700 tokples! Dispela wok bilong tanim ol buk na nius long ol narapela tokples i helpim planti man long stadi long Baibel long tokples bilong ol yet.

“Long skul mi no amamas long pasin bilong stadi, tasol dispela stadi i gutpela tru. Ol samting mi bin lainim i givim bel isi long mi!”—Katlego, Saut Afrika.

“Dispela stadi kos i bekim ol askim bilong mi na planti arapela askim.”—Bertha, Meksiko.

“Ol i mekim Baibel stadi long haus bilong mi long taim mi yet i makim. Dispela i gutpela samting tru!”—Eziquiel, Brasil.

“Sampela taim mipela i stadi olsem 15 i go 30 minit samting. Na long ol narapela taim stadi i longpela liklik. Mi yet inap makim hamas haptaim mi laik stadi.”—Viniana, Australia.

“Mi kirap nogut olsem dispela stadi kos i fri!”—Aimé, Benin.

“Baibel tisa bilong mi i gat gutpela pasin na em i save mekim pasin isi. Mitupela i kamap gutpela pren tru.”—Karen, Noten Aialan.

“Planti manmeri i stadi long Baibel, tasol ol i no kamap ol Witnes.”—Denton, Inglan.

OL ASKIM PLANTI MAN I GAT LONG BAIBEL STADI KOS BILONG MIPELA

Yupela i bihainim wanem pasin long mekim ol stadi?

Mipela i save makim ol bikpela tok bilong Baibel, na skelim ol skripsa i stret wantaim dispela tok. Baibel i bekim ol kain askim olsem: God em i husat? Em i gat wanem ol pasin? God i gat nem? Em i stap long we? Yumi inap i go klostu long God? Bilong kisim bekim bilong ol dispela askim, em i bikpela samting long save long ol skripsa bilong Baibel.

Bilong helpim ol man long painim ol bekim, planti taim mipela i yusim buk Tru Tru Baibel i Tok Wanem?b Dispela buk i gat 224 pes, na ol i bin wokim bilong helpim ol man long kisim save long ol bikpela tok bilong Baibel. Dispela buk i stori long God, Jisas Krais, pasin bilong beten, as na ol man i karim pen na hevi, kirap bek, na planti arapela samting.

Yupela i save mekim stadi long wanem taim na ples?

Mipela i save stadi wantaim ol man long taim na ples i stret long ol.

Yupela i stadi wantaim ol man inap hamas aua?

Planti man i makim wanpela aua long olgeta wik bilong stadi long Baibel. Tasol dispela i no makim olsem mipela i stadi wantaim olgeta man inap wanpela aua, nogat. Sampela man i makim inap olsem 10 o 15 minit long olgeta wik bilong stadi.

I gat pe bilong Baibel stadi kos?

Nogat. Dispela Baibel stadi kos na ol buk na nius i fri. Na dispela i stret wantaim stiatok bilong Jisas long ol disaipel bilong em. Em i tok: “Yupela i kisim fri, olsem na yupela i mas givim fri.”—Matyu 10:8.

Dispela stadi kos bai pinis long wanem taim?

Yu yet i ken makim hamas haptaim yu laik stadi. Buk Tru Tru Baibel i Tok Wanem? i gat 19 sapta. Yu ken makim sampela sapta yu laikim na mekim stadi inap long mak bilong yu.

Sapos mi stadi, dispela i makim olsem mi mas kamap wanpela Witnes Bilong Jehova?

Nogat. Mipela i rispektim tingting bilong olgeta man. Bihain long ol man i stadi long Baibel, ol yet i ken makim olsem ol i laik kamap Witnes Bilong Jehova o nogat.

Mi inap kisim sampela save moa long we?

Web-sait bilong mipela em jw.org/tpi i stori gut long ol wok na bilip bilong ol Witnes Bilong Jehova.

Olsem wanem mi inap askim long Baibel stadi kos?

Yu ken pulimapim fom long www.jw.org/tpi.
Yu ken raitim pas i go long atres i stret long yu. Ol atres i stap long pes 2 bilong dispela nius.
Sapos yu laik bungim ol Witnes Bilong Jehova long ples yu stap long en, lukim telefon buk na kisim ol fon namba aninit long nem “Jehovah’s Witnesses.”

a Ol Witnes i save stadi long Baibel wantaim wan wan man, na tu, ol i save mekim stadi long ol liklik grup.

b Ol Witnes Bilong Jehova i wokim dispela buk. Ol i prinim winim 230 milion kopi bilong dispela buk long winim 260 tokples.

BILONG HELPIM OL FAMILI

“Taim meri bilong mi i kirap stadi long Baibel, mi lukim pasin bilong em i wok long senis na i stap bilong famili bilong mipela i kamap gutpela. Olsem na mi kirap stadi na bai mi tu i ken kisim save long ol samting em i lain long en. Save mi kisim i helpim mi long senisim pasin bilong mi. Pasin bilong stadi long Baibel i helpim famili bilong mipela long pas gut wantaim.”—Eziquiel.

“Taim mi kirap stadi long Baibel, mi lusim pasin bilong kisim drak na dring planti, na tu, mi wok strong long daunim pasin bilong belhat. Na haus bilong mi i stap klin na mi putim ol samting long ples stret bilong ol. Mi amamas long helpim famili bilong mi na mipela i wok gut wantaim. Nau mi stap amamas tru.”—Karen.

“Sampela man i no amamas olsem mi wok long stadi long Baibel. Tasol man bilong mi i sapotim disisen bilong mi long stadi. Em i tok: ‘No ken tingim tok ol man i mekim. Mi luksave olsem yu kisim ol gutpela pasin, na dispela i bikpela samting. I gutpela yu mekim yet stadi bilong yu.’ Long nau, famili bilong mipela i stap amamas tru!”—Viniana.