Risen na Baibel i Abrusim Bagarap

Long nau Baibel i stap yet, olsem na yu inap kisim wanpela kopi na ritim. Na taim yu kisim wanpela Baibel we ol i trensletim gut, yu inap bilip tru olsem ol tok bilong en i stret wantaim ol rait bilong bipo na dispela inap helpim yu tru.a Tasol i gat wanem risen na Baibel i stap yet maski ol man i birua long Baibel, ol i senisim sampela tok bilong en, ol samting olsem wara na binatang i laik bagarapim, na ol rait bilong en i stap longpela taim tru? Wanem samting i mekim na dispela buk i narakain tru?

Planti sumatin bilong Baibel i kisim wankain save olsem aposel Pol, em i tok: “God em i as bilong olgeta tok i stap long Rait Holi.” (2 Timoti 3:16) Ol i bilip olsem Baibel i stap yet long nau bikos em i Tok Bilong God na God i lukautim dispela buk i kam inap long nau. Faizal, em yumi stori long en long kirap bilong atikol, i laik save sapos God i as bilong ol tok bilong Baibel, olsem na em i kirap stadi long Baibel. Em i kirap nogut long ol samting em i kisim save long en. Em i luksave olsem Baibel i no as bilong planti bilip em Kristendom i skulim ol man long en. Na tu, em i pilim tru ol tok em i lainim long Baibel long samting God i tingting pinis long mekim long dispela graun.

Faizal i tok: “Nau mi bilip olsem Baibel em presen i kam long God. Tingim, God i gat bikpela strong long wokim yunives, olsem na em i gat strong long givim yumi wanpela buk na lukautim ol tok bilong en. God i gat olgeta strong na i no gat wanpela samting inap pasim em! Mi husat na bai mi tok Em i no gat strong?”—Aisaia 40:8.