Pe Bilong Baim Bek Man “Presen i Nambawan Tru” i Kam Long Papa
“Olgeta gutpela presen na olgeta presen i nambawan tru . . . i kam long Papa.”—JEMS 1:17.
OL SINGSING: 20, 15
1. Pe bilong baim bek man i opim rot long yumi inap kisim wanem ol blesing?
TAIM Jisas Krais i dai na givim laip bilong em olsem ofa bilong baim bek ol man, dispela i opim rot bilong ol man long kisim planti blesing. Dispela ofa bai helpim olgeta pikinini bilong Adam em ol i bihainim stretpela pasin, na ol inap kamap wanfamili bilong God. Pe bilong baim bek man i opim rot long yumi inap kisim laip oltaim na stap amamas. Na tu, ofa bilong Krais i opim rot na ol manmeri i bihainim tok bilong God, ol inap kisim gutpela sindaun long bihain. Dispela ofa i opim rot long sampela samting moa bai kamap. Jisas i redi long i dai na sambai long stretpela pasin bilong Jehova, na dispela bai stretim ol bikpela tok em ol lain long heven na graun i insait long en.—Hib. 1:8, 9.
2. (a) Long beten bilong Jisas, em i kolim wanem ol samting em ol lain long heven na graun i insait long en? (Lukim piksa long kirap bilong stadi.) (b) Long dispela stadi, bai yumi skelim wanem samting?
2 Inap olsem 2-pela yia paslain long Jisas i dai na givim laip bilong em olsem ofa bilong baim bek man, em i skulim ol disaipel long beten olsem: “Papa bilong mipela long heven, nem bilong yu i mas i stap holi. Kingdom bilong yu i mas i kam. Laik bilong yu i mas kamap long graun olsem em i save kamap long heven.” (Mat. 6:9, 10) Yumi ken skelim hau ofa bilong Krais long baim bek man i mekim holi nem bilong God, opim rot long Kingdom Bilong God i mekim wok bos, na kamapim samting God i tingting pinis long mekim. Dispela bai helpim yumi long pilim tru pe bilong baim bek man.
“NEM BILONG YU I MAS I STAP HOLI”
3. (a) Nem bilong Jehova i kamapim klia wanem ol samting? (b) Olsem wanem Satan i bagarapim nem holi bilong God?
3 Namba 1 samting Jisas i kolim long beten em long mekim holi nem bilong God. Nem bilong Jehova i kamapim klia olsem biknem bilong em i winim tru olgeta narapela biknem, na em i stap holi tru. Long narapela beten bilong Jisas, em i kolim Jehova olsem “Papa Holi.” (Jon 17:11) Jehova em i holi, olsem na olgeta lo na stiatok i kam long em i holi. Maski i olsem, long gaden Iden Satan i sutim tok giaman long rait bilong God long putim ol lo bilong stiaim ol man. Satan i bagarapim nem holi bilong God.—Stt. 3:1-5.
4. Olsem wanem Jisas i mekim holi nem bilong God?
4 Jisas i laikim tru nem bilong Jehova. (Jon 17:25, 26) Em i insait long wok bilong mekim holi nem bilong God. (Ritim Song 40:8-10.) Taim Jisas i stap long graun olsem man i gutpela olgeta, em i soim klia olsem i stret tru long Jehova i putim ol lo bilong stiaim ol manmeri. Maski Satan i stiaim ol man long givim bikpela pen long Jisas na kilim em i dai, Jisas i stap gut long God. Jisas i soim klia olsem man i gutpela olgeta, em inap bihainim gut ol stretpela lo bilong God.
5. Olsem wanem yumi inap mekim holi nem bilong God?
5 Olsem wanem yumi inap soim olsem yumi laikim tru nem bilong Jehova? Yumi inap mekim olsem long rot bilong ol pasin yumi bihainim. Jehova i laik bai yumi stap holi. (Ritim 1 Pita 1:15, 16.) Dispela i makim olsem yumi lotuim Jehova wanpela tasol na yumi givim bel olgeta long bihainim em. Maski ol birua i mekim nogut long yumi, yumi wok strong long bihainim ol stretpela lo na ol stiatok bilong em. Taim yumi bihainim stretpela pasin, yumi larim lait bilong yumi i stap ples klia na dispela i givim glori long nem bilong Jehova. (Mat. 5:14-16) Yumi stap olsem ol manmeri i holi, olsem na stretpela pasin bilong yumi i soim klia olsem ol lo bilong Jehova i gutpela, na tok bilong Satan i no tru. Yumi olgeta i save popaia, olsem na taim yumi mekim rong, yumi tanim bel na lusim ol pasin i bagarapim gutnem bilong Jehova.—Sng. 79:9.
6. Maski yumi gat sin, bilong wanem Jehova inap tingim yumi olsem ol stretpela manmeri?
6 Long rot bilong ofa bilong Krais, Jehova i fogivim sin bilong ol manmeri husat i bilip long dispela ofa. Taim ol manmeri i dediketim laip bilong ol long God, em i orait long ol inap lotuim em. Jehova i tok ol Kristen em i anointim, ol i bihainim stretpela pasin na stap olsem ol pikinini bilong em, na em i kolim ol manmeri bilong lain “arapela sipsip” olsem ol pren bilong em. (Jon 10:16; Rom 5:1, 2; Jems 2:21-25) Olsem na long nau tu, pe bilong baim bek man i opim rot long yumi inap stap olsem ol stretpela manmeri long ai bilong Papa bilong yumi na mekim holi nem bilong em.
“KINGDOM BILONG YU I MAS I KAM”
7. Pe bilong baim bek man i opim rot long yumi inap kisim wanem ol blesing taim Kingdom i bosim graun?
7 Long namba 2 hap long beten bilong Jisas, em i beten long God na i tok: “Kingdom bilong yu i mas i kam.” Olsem wanem pe bilong baim bek man i sapotim wok bilong Kingdom Bilong God? Pe bilong baim bek man i opim rot long 144,000 manmeri i ken mekim wok king na wok pris wantaim Krais long heven. (Rev. 5:9, 10; 14:1) Jisas na lain 144,000 bai mekim wok king long Kingdom Bilong God na ol bai yusim pe bilong baim bek man long givim ol blesing long ol manmeri insait long 1 tausen yia. Graun bai kamap ples paradais, na ol manmeri bai kamap gutpela olgeta, na ol bai stap wanbel wantaim lain famili bilong God long heven. (Rev. 5:13; 20:6) Jisas bai krungutim het bilong snek na pinisim olgeta pasin bikhet bilong Satan long heven na long graun.—Stt. 3:15.
8. (a) Olsem wanem Jisas i helpim ol disaipel long luksave olsem em i bikpela samting long ol i mas sapotim Kingdom Bilong God? (b) Olsem wanem yumi inap soim olsem yumi sapotim wok bilong Kingdom?
8 Taim Jisas i stap long graun, em i helpim ol disaipel long luksave olsem em i bikpela samting long ol i mas sapotim Kingdom Bilong God. Bihain tasol long Jisas i kisim baptais, em i “autim gutnius bilong Kingdom bilong God” long planti hap. (Luk 4:43) Taim Jisas i givim laspela tok long ol disaipel paslain long em i go long heven, em i tokim ol long stap witnes bilong em long “olgeta hap bilong graun.” (Apo. 1:6-8) Dispela wok bilong autim tok bilong Kingdom i opim rot long ol manmeri long olgeta hap bilong graun inap kisim save long pe bilong baim bek man na stap daun long Kingdom Bilong God. Long nau, yumi sapotim dispela Kingdom taim yumi helpim ol brata bilong Krais hia long graun long autim gutnius bilong Kingdom long olgeta hap.—Mat. 24:14; 25:40.
“LAIK BILONG YU I MAS KAMAP”
9. Bilong wanem yumi ken bilip olsem Jehova bai inapim samting em i tingting pinis long mekim bilong helpim ol manmeri?
9 Jisas i skulim ol disaipel long wanem samting taim em i tok: “Laik bilong yu i mas kamap”? Jehova em i Krieta. Taim em i tok long wanpela samting i mas kamap, dispela samting i save kamap tru. (Ais. 55:11) God i no inap larim pasin bikhet bilong Satan i pasim em long kamapim samting em i tingting pinis long mekim bilong helpim ol manmeri. Long pastaim tru, Jehova i laik bai ol pikinini bilong Adam na Iv i kamap planti na i go sindaun long olgeta hap bilong graun. (Stt. 1:28) Sapos Adam na Iv i no kamapim ol pikinini na ol i dai, laik bilong God bai lus nating. Olsem na bihain long Adam na Iv i mekim sin, Jehova i larim ol long kamapim ol pikinini. Pe bilong baim bek man i opim rot na olgeta manmeri i bilip long dispela ofa, ol inap kamap gutpela olgeta na stap laip oltaim. Jehova i laikim ol manmeri na em i laik bai ol manmeri husat i bihainim tok bilong em, ol i ken i stap laip oltaim.
10. Olsem wanem pe bilong baim bek man i helpim ol man i dai pinis?
10 Olsem wanem long planti bilion manmeri husat i dai paslain long ol i kisim save long Jehova na mekim wok bilong em? Pe bilong baim bek man i opim rot long ol inap kirap bek. God bai kirapim bek ol na ol bai kisim save long ol samting em i tingting pinis long mekim na ol inap kisim laip oltaim. (Apo. 24:15) Jehova i laik bai ol manmeri i stap laip, na em i no laik bai ol i dai. God em i as bilong laip, olsem na em i kamap Papa bilong ol manmeri husat i kirap bek. (Sng. 36:9) Olsem na i stret tru long Jisas i skulim yumi long beten na tok: “Papa bilong mipela long heven.” (Mat. 6:9) Jehova i makim Jisas long mekim bikpela wok bilong kirapim bek ol daiman. (Jon 6:40, 44) Long Paradais, Jisas bai truim tok bilong em olsem “kirap bek em mi yet na laip em mi yet.”—Jon 11:25.
11. God i laik bai “bikpela lain manmeri” i mekim wanem?
11 Jehova i save helpim olgeta kain manmeri. Jisas i tok: “Man o meri husat i bihainim laik bilong God, dispela man o meri em i brata na susa na mama bilong mi.” (Mak 3:35) God i laik bai “bikpela lain manmeri” bilong olgeta kantri na olgeta lain na olgeta tokples i lotuim em. Ol lain i bilip long pe bilong Krais long baim bek man na ol i mekim laik bilong God, ol bai singaut olsem: “God bilong mipela i sindaun long sia king, na Pikinini Sipsip, tupela i kisim bek mipela.”—Rev. 7:9, 10.
12. Olsem wanem beten bilong Bikpela i kamapim klia samting em Jehova i tingting pinis long mekim long helpim ol manmeri?
12 Ol samting Jisas i kolim taim em i skulim ol disaipel long beten i kamapim klia samting Jehova i tingting pinis long mekim long helpim ol manmeri i bihainim tok bilong em. Yumi laik mekim ol samting i stret wantaim dispela beten na wok strong long mekim holi nem bilong Jehova. (Ais. 8:13) Mining bilong nem bilong Jisas em “Jehova i Save Kisim Bek Ol Man,” na long rot bilong pe bilong baim bek man, God i kisim bek yumi na dispela i givim ona na glori long nem bilong Jehova. Kingdom Bilong God bai yusim pe bilong baim bek man long helpim ol manmeri i bihainim tok bilong God. Beten bilong Bikpela i helpim yumi long bilip olsem i no gat wanpela samting inap stopim God long kamapim laik bilong em.—Sng. 135:6; Ais. 46:9, 10.
PILIM TRU PE BILONG BAIM BEK MAN
13. Taim yumi kisim baptais, dispela i kamapim klia wanem samting?
13 Wanpela rot bilong soim olsem yumi pilim tru pe bilong baim bek man em olsem, yumi bilip long dispela pe na dediketim laip bilong yumi long Jehova na kisim baptais. Taim yumi baptais, yumi soim olsem “yumi bilong Jehova.” (Rom 14:8) I olsem yumi askim God long mekim maus bilong bel bilong yumi i stap klin. (1 Pita 3:21) Jehova i bekim askim bilong yumi taim em i yusim blut bilong Krais long mekim yumi i kamap klin. Yumi bilip tru olsem em bai givim yumi olgeta samting em i tok promis long en.—Rom 8:32.
Olsem wanem yumi inap soim olsem yumi tenkyu tru long ofa bilong baim bek man? (Lukim paragraf 13 na 14)
14. Bilong wanem yumi mas laikim ol narapela?
14 Wanem narapela rot bilong soim olsem yumi tenkyu tru long pe bilong baim bek ol man? Pasin laikim i stiaim olgeta samting Jehova i mekim, olsem na em i laik bai olgeta lain i lotuim em i larim pasin laikim i stiaim olgeta samting ol i mekim. (1 Jon 4:8-11) Taim yumi mekim olsem, dispela i soim olsem yumi laik kamap “pikinini bilong Papa i stap long heven.” (Mat. 5:43-48) Namba 1 lo em long laikim tru Jehova, na namba 2 em long laikim ol narapela. (Mat. 22:37-40) Nambawan rot bilong soim olsem yumi laikim tru ol narapela, em long autim gutnius bilong Kingdom Bilong God. Taim yumi soim pasin laikim long ol narapela, yumi kamapim klia glori bilong God. Pasin laikim bilong God “i kamap gutpela olgeta long yumi” taim yumi inapim lo bilong laikim ol narapela, na moa yet long laikim ol bratasista bilong yumi.—1 Jon 4:12, 20.
JEHOVA I “GIVIM NUPELA STRONG”
15. (a) Long nau yumi kisim wanem ol blesing long Jehova? (b) Yumi bai kisim wanem ol blesing long bihain?
15 Taim yumi bilip long pe bilong baim bek man, God bai fogivim tru ol sin bilong yumi. Baibel i tok “bai ol sin bilong [yumi] i tekewe.” (Ritim Aposel 3:19-21.) Olsem yumi stori pinis, pe bilong baim bek man i opim rot na Jehova i adoptim ol Kristen em i bin anointim na ol i kamap ol pikinini bilong em. (Rom 8:15-17) Jehova i raitim nem bilong yumi ol manmeri bilong lain “arapela sipsip” long setifiket bilong adoptim pikinini. Taim yumi kamap gutpela olgeta na winim laspela traim, Jehova bai amamas tru long sainim nem long dispela setifiket na adoptim yumi, na yumi bai kamap ol pikinini bilong em hia long graun. (Rom 8:20, 21; Rev. 20:7-9) Jehova i laikim tru ol gutpela pikinini bilong em, na pasin laikim bilong em i no inap pinis. Pe bilong baim bek man bai helpim yumi inap oltaim oltaim. (Hib. 9:12) I no gat wanpela man o wanpela samting bai inap long pinisim strong bilong dispela pe.
16. Olsem wanem pe bilong baim bek man i helpim yumi long i stap fri tru?
16 Taim ol manmeri i tanim bel tru na lusim ol pasin nogut, Satan i no gat strong long pasim ol long kamap wanfamili bilong Jehova. Jisas i kam long graun na i dai “wanpela taim tasol.” Em i givim pe wanpela taim tasol, na dispela pe i gat strong long helpim yumi inap oltaim oltaim. (Hib. 9:24-26) Dispela pe i pinisim tru sin yumi kisim long Adam. Yumi tenkyu tru olsem ofa bilong Krais i opim rot long yumi inap lusim kalabus bilong ol pasin nogut bilong graun, na yumi no pret moa long dai.—Hib. 2:14, 15.
17. Yu pilim olsem wanem long pasin laikim bilong Jehova?
17 Ol tok promis bilong God bai kamap tru. Jehova i putim ol lo bilong stiaim olgeta samting em i wokim na ol dispela lo i no popaia long inapim wok bilong ol. Olsem tasol, ol tok promis bilong Jehova i no inap popaia. God i no save senisim tingting bilong em. (Mal. 3:6) Jehova i givim laip long yumi, na em i givim sampela samting moa. Em i givim ol samting bilong soim olsem em i laikim tru yumi. “Yumi bin kisim save na bilip long pasin laikim God i mekim long yumi. God em i pasin laikim.” (1 Jon 4:16) Dispela graun bai kamap naispela ples paradais, na olgeta manmeri bai kamapim pasin laikim bilong God. Yumi ken bungim nek wantaim ol gutpela wokman bilong God long heven na tok: “Biknem na glori na savetingting na tenkyu na ona na pawa na strong, olgeta i stap long God bilong yumi inap oltaim oltaim. Amen.”—Rev. 7:12.