No Ken Larim Pasin Laikim Bilong Yu i Lusim Strong Bilong En

1, 2. (a) Namba 1 truim bilong tok bilong Jisas long Matyu 24:12 i kamap long husat lain? (b) Olsem wanem Buk Aposel i soim olsem planti Kristen long pastaim i wok yet long soim pasin laikim? (Lukim piksa long kirap bilong stadi.)

JISAS i tok, “pasin laikim bilong planti manmeri bai i no strong olsem long bipo,” na em wanpela sain bilong soim olsem “pinis bilong dispela taim i kamap pinis.” (Mat. 24:3, 12) Long taim bilong ol aposel, ol Juda husat i tok olsem ol i manmeri bilong God, ol i larim pasin laikim bilong ol i lusim strong bilong en.

² Planti Kristen long dispela taim i bisi tru long “autim gutnius long Krais” na soim klia olsem ol i laikim God, ol wanbilip, na ol man i no wanbilip. (Apo. 2:44-47; 5:42) Tasol sampela Kristen i larim pasin laikim bilong ol i lusim strong bilong en.

3. Wanem samting i mekim na pasin laikim bilong sampela Kristen i no strong moa?

³ Jisas Krais i tokim ol Kristen long Efesus olsem: “Mi gat tok long [yupela] long dispela samting, [yupela i] lusim pinis pasin laikim em [yupela] bin gat long pastaim.” (Rev. 2:4) Wanem samting i kirapim ol Kristen long lusim pasin laikim ol i gat long pastaim? Ating ol Kristen i larim ol laik nogut i stiaim ol. (Efe. 2:2, 3) Wankain olsem planti biktaun long nau, pasin nogut i pulap tru long taun Efesus. Efesus em taun bilong ol maniman, na ol manmeri i tingting tasol long kisim mani kago, insait long ol amamas, na kisim gutpela sindaun. Ol manmeri i tingim ol yet tasol na ol i no daunim laik bilong ol yet na soim pasin laikim long ol narapela. Na tu, ol i no sem long mekim pasin nogut na ol pasin pamuk i nogut tru.

4. (a) Olsem wanem pasin laikim i no strong moa long taim bilong yumi? (b) Yumi bai skelim wanem ol samting long dispela stadi?

⁴ Tok profet bilong Jisas long pasin laikim bai pinis i stret tu long taim bilong yumi. Long nau, ol manmeri i no laikim God moa. Planti milion manmeri i givim baksait long God, ol i bilip olsem oganaisesen bilong ol man bai stretim ol hevi. Olsem na ol lain i no lotuim God Jehova, pasin laikim bilong ol i wok long pinis. Wankain olsem samting i kamap long ol Kristen long Efesus, sapos ol Kristen long nau i no was gut, pasin laikim bilong ol bai i no strong moa olsem pastaim. Long dispela stadi, yumi bai stori long traim inap kamap long pasin bilong yumi long (1) laikim Jehova, (2) laikim tok bilong Baibel, (3) na laikim ol bratasista.

LAIKIM TRU JEHOVA

5. Bilong wanem yumi mas i gat pasin bilong laikim God?

⁵ Long wankain de we Jisas i tok lukaut olsem pasin laikim bilong ol manmeri bai i no strong moa, em i tokaut klia long nambawan bikpela pasin laikim em ol manmeri i mas i gat. Em i tok: “‘Yu mas laikim Jehova, God bilong yu. Yu mas laikim em long bel olgeta bilong yu, na long laip olgeta bilong yu, na long tingting olgeta bilong yu.’ Dispela em namba 1 lo na i winim ol arapela lo.” (Mat. 22:37, 38) Tru tumas, taim yumi laikim tru Jehova, dispela bai helpim yumi long bihainim ol lo bilong em, sanap strong na karim hevi, na heitim pasin nogut. (Ritim Song 97:10.) Tasol Satan na ol manmeri bilong dispela graun i wok strong long daunim pasin bilong yumi long laikim God.

6. Ol manmeri i lusim pasin bilong laikim God na ol i laikim wanem ol samting?

⁶ Ol manmeri long nau i no holim stretpela tingting long pasin laikim. Ol i no laikim Krieta, nogat, ol i “laikim ol yet tasol.” (2 Tim. 3:2) Dispela graun bilong Satan i strongim “laik nogut bilong bel na pasin bilong aigris na pasin bilong hambak long mani kago.” (1 Jon 2:16) Aposel Pol i givim tok lukaut long ol Kristen long pasin bilong tingim laik bilong bodi. Em i tok: “Sapos tingting bilong man i stap long ol laik bilong bodi, orait dispela man bai dai. . . . Long wanem, sapos tingting bilong man i stap long ol laik bilong bodi, dispela i mekim man i kamap birua bilong God.” (Rom 8:6, 7) Ol lain husat i lusim bikpela haptaim long kisim planti mani kago, o inapim laik bilong mekim pasin pamuk, ol i karim bikpela hevi na dispela i bagarapim tru bel na tingting bilong ol.—1 Kor. 6:18; 1 Tim. 6:9, 10.

7. Wanem hevi inap painim ol Kristen long nau sapos ol i no was gut?

⁷ Long sampela kantri, ol man i bilip long evolusen, na ol man i bilip olsem i no gat God, o i hatwok long save long Em. Ol i kamapim ol tingting i pasim ol manmeri long laikim God na bilip long em. Ol i kirapim planti manmeri long kisim tingting olsem ol man i no gat gutpela tingting na ol longlong man tasol i save bilip olsem i gat Krieta. Na tu, ol manmeri i rispektim ol saientis, na dispela i pulim ol long givim baksait long Krieta. (Rom 1:25) Sapos yumi putim yau long ol kain tok olsem, isi isi yumi inap lusim Jehova, na pasin laikim bilong yumi bai i no strong moa olsem bipo.—Hib. 3:12.

8. (a) Planti wokman bilong Jehova i bungim wanem ol hevi? (b) Olsem wanem tok bilong Song 136 inap strongim yumi?

⁸ Sapos yumi larim bel hevi i daunim yumi, dispela tu inap mekim na bilip na pasin bilong yumi long laikim God bai i no strong moa. Satan i kontrolim dispela graun, olsem na sampela samting inap mekim yumi bel hevi. (1 Jon 5:19) Ating yumi karim hevi bilong i go lapun, bikpela sik, o hevi bilong mani i putim presa long yumi. O ating yumi pilim olsem yumi no gat strong na save long mekim wanpela wok, na ol samting i no kamap olsem yumi bin tingim, o yumi mekim popaia. Tasol yumi no ken larim dispela kain tingting o filings i kirapim yumi long ting olsem Jehova i no tingim yumi. Yumi mas tingim tingim ol tok Jehova i mekim bilong soim olsem em i laikim tru yumi. Song 136:23 i tok: “Taim ol birua i winim yumi, em i tingting yet long yumi. Oltaim oltaim em i save laikim yumi moa yet.” Tru tumas, oltaim Jehova i save laikim ol wokman bilong em. Olsem na yumi ken bilip tru olsem em i save harim “beten bilong [yumi]” na helpim yumi.—Song 116:1; 136:24-26.

9. Wanem samting i strongim Pol long holim yet pasin bilong laikim God?

⁹ Wankain olsem man bilong raitim song, Pol i tingim tingim pasin bilong Jehova long sapotim em, na dispela i strongim em. Pol i tok: “Jehova em i helpim bilong mi. Mi no inap pret. Ol man bai mekim wanem long mi?” (Hib. 13:6) Pol i bilip olsem Jehova bai helpim em, na dispela i strongim em long karim ol hevi. Em i no larim ol hevi i daunim em. Taim Pol i stap kalabus, em i raitim sampela pas bilong strongim ol Kristen. (Efe. 4:1; Fili. 1:7; File. 1) Maski planti hevi i painim Pol, em i no lusim pasin bilong laikim God. Wanem samting i strongim em? Oltaim em i kisim helpim long “God bilong mekim isi bel bilong ol man long olgeta kain taim.” (2 Kor. 1:3, 4) Olsem wanem yumi inap bihainim pasin bilong Pol na strongim yet pasin bilong yumi long laikim Jehova?

10. Yumi inap mekim wanem bilong strongim pasin bilong yumi long laikim Jehova?

¹⁰ Pol yet i kolim wanpela rot bilong strongim pasin bilong laikim Jehova. Em i tokim ol wanbilip: “Yupela i mas beten oltaim.” Bihain em i tok moa: “Oltaim holim strong pasin bilong beten.” (Rom 12:12; 1 Tes. 5:17) Beten em nambawan bikpela samting yumi mas mekim bilong pas gut wantaim God. (Sng. 86:3) Taim yumi lusim sampela haptaim long tokim Jehova long ol tingting tru i stap long bel bilong yumi, yumi bai i go klostu long Papa bilong yumi long heven, em Man bilong “harim beten.” (Sng. 65:2) Na tu, taim yumi luksave olsem Jehova i bekim beten bilong yumi, pasin bilong yumi long laikim em bai kamap strong moa. Yumi luksave olsem “ol manmeri i save bel tru na i singaut long [God], em i save stap klostu long ol.” (Sng. 145:18) Taim yumi bilip olsem Jehova i save sambai long yumi, dispela bai helpim yumi long sanap strong na karim ol hevi.

LAIKIM TRU TOK BILONG BAIBEL

11, 12. Olsem wanem yumi inap kisim pasin bilong laikim tru tok bilong Baibel?

¹¹ Yumi ol Kristen i laikim tok i tru. Tok Bilong God em as bilong tok i tru. Jisas i beten long Papa na i tok: “Tok bilong yu em i tok i tru.” (Jon 17:17) Olsem na taim yumi kisim stretpela save long Tok Bilong God, dispela i kirapim yumi long laikim tok i tru. (Kol. 1:10) Tasol yumi mas mekim sampela samting moa. Man i raitim ol tok bilong Buk Song sapta 119 i tokim yumi long ol samting yumi mas mekim bilong soim olsem yumi laikim tru tok bilong Baibel. (Ritim Song 119:97-100.) Olsem wanem? Yumi save lusim sampela haptaim long tingim tingim ol tok bilong Baibel long de olgeta? Yumi bai laikim moa yet tok bilong Baibel sapos yumi tingim tingim hau ol dispela tok i helpim yumi taim yumi bihainim long laip bilong yumi.

¹² Man bilong raitim song i tok moa: “Hani i save swit long maus bilong mi, tasol tok bilong yu i swit moa yet.” (Sng. 119:103) Olsem tasol, oganaisesen bilong God i redim ol tok bilong Baibel i swit tumas, na yumi inap kisim save long ol dispela tok. Wankain olsem yumi save larim kaikai i stap longpela taim liklik long maus bilong pilim swit bilong en, yumi ken tingim bek ol “tok i swit long yau” na yusim ol dispela tok long helpim ol narapela.—Sav. 12:10.

13. (a) Wanem samting i helpim Jeremaia long laikim tru ol tok bilong Rait Holi? (b) Jeremaia i laikim tru ol tok bilong Rait Holi na dispela i mekim wanem long em?

¹³ Profet Jeremaia i laikim tru ol tok bilong Rait Holi. Tok Bilong God i mekim sampela samting long bel bilong Jeremaia. Em i tok: “Yu bin givim tok bilong yu long mi na mi kisim, olsem man i kisim kaikai. Na dispela tok bilong yu i mekim mi i amamas na belgut tru, long wanem, mi bilong yu, God Bikpela I Gat Olgeta Strong.” (Jer. 15:16) Jeremaia i tingim tingim ol gutpela tok bilong God, na i olsem em i kaikai na daunim ol dispela tok. Long dispela rot, em i amamas tru olsem nem bilong God i stap long em. Olsem wanem? Pasin bilong laikim tru tok bilong Baibel i kirapim yumi long amamas olsem nem bilong God i stap long yumi, na yumi autim tok bilong Kingdom long dispela haptaim bilong las de?

14. Olsem wanem yumi inap strongim pasin bilong yumi long laikim tru ol tok bilong Baibel?

¹⁴ Taim yumi ritim Baibel na ol pablikesen bilong Baibel, dispela inap helpim yumi long laikim tru ol tok bilong Baibel. Tasol yumi ken mekim wanem ol samting moa? Taim yumi go oltaim long ol miting, dispela inap strongim pasin bilong yumi long laikim tru tok bilong Baibel. Long olgeta wan wan wik, yumi yusim Wastaua long stadi long ol tok bilong Baibel, na dispela em nambawan rot bilong yumi long kisim skul. Yumi mas redim gut Wastaua stadi na bai yumi inap kliagut long samting yumi stadi long en. Yumi ken skelim olgeta wan wan skripsa i stap long hap bilong stadi long Wastaua. Long nau, yumi inap daunlodim Wastaua long jw.org Web-sait o yumi inap lukim long JW Library long planti tokples. Sampela stail bilong ol dispela program inap helpim yumi long lukim kwik ol tok bilong ol skripsa i stap long ol stadi atikol. Maski yumi yusim wanem rot long redim ol stadi, taim yumi ritim gut ol skripsa na tingim tingim ol tok bilong en, dispela bai strongim pasin bilong yumi long laikim tru ol tok bilong Baibel.—Ritim Song 1:2.

LAIKIM TRU OL BRATASISTA

15, 16. (a) Olsem Jon 13:34, 35 i tok, yumi gat wok long mekim wanem? (b) Olsem wanem pasin bilong yumi long laikim ol bratasista i soim olsem yumi laikim tru God na tok bilong Baibel?

¹⁵ Long nait paslain long Jisas i dai, em i tokim ol disaipel: “Mi givim nupela lo long yupela, olsem narapela i mas laikim narapela. Yupela i mas laikim narapela narapela olsem mi bin laikim yupela. Sapos pasin laikim i stap namel long yupela, orait olgeta bai save olsem yupela i disaipel bilong mi.”—Jon 13:34, 35.

¹⁶ Taim yumi laikim ol bratasista, dispela i soim olsem yumi laikim Jehova. Yumi no inap laikim Jehova na heitim ol narapela, nogat. Aposel Jon i tok: “Man i no laikim brata bilong em, husat em i bin lukim, em i no inap laikim God em i no bin lukim.” (1 Jon 4:20) Na tu, pasin bilong laikim Jehova na ol bratasista i soim olsem yumi laikim ol tok bilong Baibel. Long wanem, pasin bilong laikim ol tok bilong Baibel bai kirapim yumi long givim bel long bihainim tok bilong Baibel long laikim God na ol bratasista.—1 Pita 1:22; 1 Jon 4:21.

17. Olsem wanem yumi inap soim pasin laikim long ol narapela?

¹⁷ Ritim 1 Tesalonaika 4:9, 10. Olsem wanem yumi inap soim pasin laikim insait long kongrigesen? Ol bratasista i gat kar i ken helpim wanpela lapun brata o sista na bringim em i go long miting. Yumi ken helpim wanpela wido meri long stretim ol samting i bagarap long haus. (Jems 1:27) Sapos sampela bratasista i bel hevi o sampela hevi i painim ol, orait yumi ken putim yau long ol, strongim ol, na mekim gut bel bilong ol, maski ol i yangpela o lapun. (Snd. 12:25; Kol. 4:11) Taim yumi mekim ol tok na pasin i soim olsem yumi tingim tru “ol wanbilip,” dispela i soim olsem yumi laikim tru ol bratasista.—Gal. 6:10.

18. Wanem samting bai helpim yumi long stretim ol liklik hevi i kamap namel long yumi na ol wanbilip?

¹⁸ Baibel i tok profet olsem long “taim bilong las de,” ol manmeri bai gridi na tingim ol yet tasol. (2 Tim. 3:1, 2) Olsem na yumi ol Kristen i mas mekim ol samting bilong strongim pasin bilong laikim tru God, ol tok bilong Baibel, na laikim tru narapela narapela. Sampela taim liklik kros inap kamap namel long yumi na ol wanbilip. Tasol sapos yumi bihainim pasin laikim na stretim olgeta kain hevi i kamap, dispela bai helpim olgeta insait long kongrigesen! (Efe. 4:32; Kol. 3:14) Olsem na yumi no ken larim pasin laikim bilong yumi i lusim strong bilong en! Yumi mas wok yet long laikim tru Jehova, ol tok bilong Baibel, na ol bratasista.