Wastaua INTENET LAIBRERI
Wastaua
INTENET LAIBRERI
Tok Pisin
  • BAIBEL
  • Ol PABLIKESEN
  • Ol MITING
  • wp19 no. 1 p. 4-5
  • Wanem Nem Bilong God?

No gat vidio bilong dispela seksen.

Sori, popaia kamap long lodim vidio.

  • Wanem Nem Bilong God?
  • Wastaua i Tokaut Long Kingdom Bilong Jehova (Bilong Pablik)—2019
  • Ol Liklik Het Tok
  • Wankain Infomesen
  • NEM BILONG GOD I BIKPELA SAMTING
  • MINING BILONG DISPELA NEM
  • Nem Bilong God
    2017 Kirap!
  • Bilong Wanem Yumi Mas Yusim Nem Bilong God?
    Wastaua i Tokaut Long Kingdom Bilong Jehova—2012
  • Onarim Nem Bilong Jehova
    Wastaua i Tokaut Long Kingdom Bilong Jehova—2013
  • Nem Bilong God—Wok Ol i Mekim Long En na Mining Bilong En
    Tru Tru Baibel i Tok Wanem?
Lukim Moa
Wastaua i Tokaut Long Kingdom Bilong Jehova (Bilong Pablik)—2019
wp19 no. 1 p. 4-5

Wanem Nem Bilong God?

Taim yu laik save long wanpela, namba 1 samting yu bai askim, “Wanem nem bilong yu?” Sapos yu givim dispela askim long God, em bai tok wanem?

“Mi Jehova. Dispela em nem bilong mi.”—Aisaia 42:8.

Dispela nem i nupela long yu? Ating i olsem, bikos planti lain bilong trensletim Baibel i yusim nem bilong God wan wan taim tasol. Planti taim ol i rausim na putim dispela biknem “BIKPELA.” Maski i olsem, nem bilong God i stap klostu 7,000 taim long tokples em ol i bin raitim Baibel long en long pastaim. Dispela nem i gat 4-pela leta Hibru, i makim YHWH o JHVH, na kirap long bipo yet ol i bin tanim olsem “Jehovah” long tok Inglis.

Nem bilong God long rait Hibru long ol Olpela Rait Bilong Detsi

Dead Sea Psalms Scroll First century C.E., HEBREW

Nem bilong God long Baibel long tok Inglis em Tyndale i trensletim

Tyndale’s translation 1530, ENGLISH

Nem bilong God long tok Spen long Reina-Valera vesen bilong Baibel

Reina-Valera version 1602, SPANISH

Nem bilong God long tok Saina long Union Version bilong Baibel

Union Version 1919, CHINESE

Nem bilong God i stap long olgeta hap bilong ol rait Hibru na long planti rait ol i bin trensletim

NEM BILONG GOD I BIKPELA SAMTING

Dispela nem i bikpela samting long God yet. I no gat wanpela man i givim nem long God; em i makim dispela nem bilong em yet. Jehova i tok: “Dispela em i nem bilong mi inap oltaim oltaim, na ol lain pipol i kamap bihain bihain i mas tingim mi long dispela nem.” (Kisim Bek 3:15) Long Baibel, nem bilong God i stap planti taim moa winim ol biknem bilong em, olsem God i Gat Olgeta Strong, Papa, Bikpela, o God, na i stap planti taim moa winim ol narapela nem, olsem Abraham, Moses, Devit, o Jisas. Na tu, em laik bilong Jehova long olgeta man i mas save long nem bilong em. Baibel i tok: “Ol manmeri i ken save olsem yu, nem bilong yu, Jehova, yu wanpela tasol yu God Antap Tru na yu bosim olgeta hap bilong graun.”—Buk Song 83:18.

Dispela nem i bikpela samting long Jisas. Long beten em planti man i kolim Papa Bilong Mipela o Beten Bilong Bikpela, Jisas i skulim ol disaipel long beten long God olsem: “Nem bilong yu i mas i stap holi.” (Matyu 6:9) Jisas yet i beten long God olsem: “Papa, litimapim nem bilong yu.” (Jon 12:28) Jisas i tingim wok bilong litimapim nem bilong God i namba wan samting long laip bilong em, dispela em risen na long beten em i tok: “Mi bin kamapim nem bilong yu long ol na mi bai kamapim moa yet.”—Jon 17:26.

Dispela nem i bikpela samting long ol man i save long God. Ol lain bilong God long bipo i kliagut olsem nem bilong God bai banisim na kisim bek ol. “Nem bilong Jehova i olsem wanpela strongpela taua. Ol stretpela man i save ron i go insait long en na em i banisim ol.” (Provep 18:10) “Olgeta manmeri i singaut long nem bilong Jehova, em bai kisim bek ol.” (Joel 2:32) Baibel i soim olsem nem bilong God i tokaut long ol man i lotuim em. “Olgeta manmeri bai wokabaut long nem bilong god bilong ol yet, tasol mipela bai wokabaut long nem bilong Jehova, God bilong mipela, inap oltaim oltaim.”—Maika 4:5; Aposel 15:14.

MINING BILONG DISPELA NEM

Dispela nem i makim God wanpela tasol. Planti saveman i tok nem Jehova i makim “Em i Mekim i Kamap.” Jehova God i kamapim mining bilong nem bilong em taim em i kolim ol dispela tok long Moses bilong makim em yet: “Mi Bai Kamap Wanem Wanem Kain Mi Laikim.” (Kisim Bek 3:14) Nem bilong God i no kamapim klia tasol wok bilong em olsem Krieta bilong olgeta samting na ol i stap, nogat. Nem bilong em i kamapim klia strong na save bilong em long mekim em yet, na tu, ol samting em i wokim i kamap wanem wanem kain bilong inapim ol samting em i tingting pinis long kamapim. Ol biknem inap kamapim namba, wok bos, na strong bilong God, na nem bilong em, Jehova, dispela nem tasol i makim em i husat, na em bai kamap wanem wanem kain.

Nem bilong God i soim olsem em i laikim yumi. Mining bilong nem bilong God i kamapim klia olsem oltaim em i laikim ol samting em i wokim, na yumi ol man tu. Na tu, God i kamapim nem bilong em long yumi na dispela i soim olsem em i laik bai yumi save long em. Paslain long yumi askim long nem bilong em, em yet i go pas long tokim yumi. Em i klia tru, God i laik bai yumi tingim em olsem Man i stap tru na yumi inap i go klostu long em, na i no olsem wanpela god yumi no inap i go klostu long em na em i stap longwe tru.—Buk Song 73:28.

Taim yumi yusim nem bilong God dispela i soim olsem yumi laikim em. Yumi ken tok piksa olsem, ating yu tokim wanpela em yu laik kamap pren bilong em olsem em i mas singautim yu long nem tru bilong yu. Bai yu pilim olsem wanem sapos em i no laik kolim nem bilong yu? Ating bihain bai yu tingting olsem em i laik tru long kamap pren bilong yu o nogat. Dispela i wankain long God. Jehova i tokim yumi long nem bilong em, na em i kirapim yumi long yusim. Taim yumi mekim olsem, yumi soim Jehova olsem yumi laik i go klostu long em. Em yet i luksave tu long “ol man i tingim tingim [o, “laikim tumas,” futnot] nem bilong em”!—Malakai 3:16.

Namba 1 samting long kisim save long God, em yumi mas save long nem bilong em. Na tu, yumi mas kisim save long Man i holim dispela nem. Yumi mas save long em i wanem kain man tru.

WANEM NEM BILONG GOD? Nem bilong God em Jehova. Dispela nem i makim God wanpela tasol olsem Man husat inap kamapim ol samting em i tingting pinis long mekim

GOD I KAMAP OLSEM WANEM?

Em wanpela askim planti i laik save long bekim bilong en. Ating yu tu i bin tingting long dispela askim. Yumi ken tok: Sapos i gat wanpela samting o wanpela man i bin wokim yunives na olgeta samting i stap long en, orait God i kamap olsem wanem?

Ol saientis i wanbel olsem dispela yunives i gat kirap bilong en. Fes ves bilong Baibel i wanbel long dispela tingting, em i tok: “Taim God i stat long wokim ol samting, em i wokim ples antap na graun.”—Stat 1:1.

Yunives i no inap wokim em yet; na em i no inap kamap nating. Samting i no bin stap i no inap kamapim wanpela samting. Sapos no gat wanpela samting i stap paslain long yunives i kamap, ating yunives bai no inap stap long nau. Tru, i hatwok long yumi kliagut long hau wanpela samting i no gat kirap bilong en na i save stap olsem tasol, em i bin mekim kamap dispela yunives. Jehova God, em wanpela strongpela spirit na i gat savetingting, em As Bilong Olgeta Samting i Kamap.—Jon 4:24.

Baibel i tok long God olsem: “Taim ol maunten i no kamap yet na taim yu no bin wokim yet graun na olgeta samting i stap long en, oltaim oltaim yu stap God.” (Buk Song 90:2) Olsem na, God i bin i stap olsem tasol na i no gat kirap bilong en. Bihain, “God i stat long wokim ol samting,” em i wokim dispela yunives.—Revelesen 4:11.

    Tok Pisin Pablikesen (1983-2025)
    Log Aut
    Log In
    • Tok Pisin
    • Serim
    • Preferens
    • Copyright © 2025 Watch Tower Bible and Tract Society of Pennsylvania
    • Ol Lo Bilong Yusim
    • Privacy Policy
    • Ol Praivesi Seting
    • JW.ORG
    • Log In
    Serim