Putim Tok i Go Daun Long Bel Bilong Ol Manmeri i No Gat Lotu

1. Long nau, wanem senis i kamap long sampela hap bilong graun?

INAP planti tausen yia, ol manmeri long olgeta hap bilong graun i gat sampela bilip long lotu. Tasol long nau, bikpela senis i kamap long tingting bilong ol manmeri. Planti manmeri moa i lusim bilip bilong ol long lotu. Long sampela kantri, winim 50 pesen bilong ol manmeri i tok ol i no gat lotu.b—Mat. 24:12.

2. Wanem ol samting i mekim na planti manmeri i lusim lotu?

² Wai na planti manmeri moa i tok ol i no gat lotu?c Sampela i tingting moa long painim amamas o ol i tingting planti. (Luk 8:14) Sampela i lusim lotu na ol i no bilip moa long God. Sampela i bilip long God, tasol ol i pilim olsem lotu em samting bilong ol tumbuna na i no stret long ol manmeri bilong nau na i no stret wantaim save bilong saiens na save bilong ol man. Ating ol i harim ol pren, ol tisa, na nius i tok laip i kamap nating, tasol ol i no kisim stretpela save bilong kirapim ol long bilip long God. Sampela i lusim lotu bikos ol i les pinis long pasin bilong ol pris pasto long laikim tumas mani na biknem. Long sampela hap, ol gavman i putim tambu long wok lotu.

3. Dispela atikol bai helpim yumi olsem wanem?

³ Jisas i laik bai yumi “kamapim ol disaipel long olgeta lain man.” (Mat. 28:19) Hau bai yumi inap helpim ol manmeri husat i no gat lotu na bai ol inap laikim God na kamap ol disaipel bilong Krais? Yumi mas luksave olsem ples we man i kamap bikpela long en inap stiaim tingting em i holim long tok yumi autim. Kain olsem, ol manmeri bilong Yurop i no inap mekim wankain pasin olsem ol manmeri bilong Esia. Long Yurop, ol manmeri i gat sampela save long Baibel na ol i save olsem God i bin wokim olgeta samting. Long Esia, sampela manmeri i gat liklik save tasol long tok bilong Baibel na planti bilong ol i no save liklik long tok bilong en, na ol i no bilip long Krieta. Dispela atikol bai helpim yumi long putim tok i go daun long bel bilong olgeta manmeri yumi bungim long wok autim tok, maski ol i bilong kain kain ples.

HOLIM STRETPELA TINGTING

4. Wai na yumi mas holim stretpela tingting?

⁴ Holim Stretpela Tingting. Long olgeta yia, ol manmeri i no gat lotu i save kamap Witnes Bilong Jehova. Planti bilong ol i gat lo bilong ol yet na ol i heitim tru pasin giaman bilong ol lotu. Sampela narapela i no gat ol lo bilong stiaim ol, na planti manmeri i gat ol pasin nogut em ol i laik lusim. Yumi ken bilip tru olsem Jehova bai helpim yumi long painim ol manmeri “em bel bilong ol i gutpela long kisim laip oltaim.”—Apo. 13:48; 1 Tim. 2:3, 4.

5. Wanem samting i save kirapim ol manmeri long putim yau long tok bilong yumi?

⁵ Bihainim Savetingting na Gutpela Pasin. Taim yumi autim tok, wei bilong mekim tok i save kirapim ol manmeri long putim yau, na i no ol tok yumi mekim. Taim yumi tingim ol, bihainim savetingting, na soim gutpela pasin, dispela bai kirapim ol long putim yau. Yumi no fosim ol long putim yau long tok bilong yumi, nogat. Yumi traim long pilim tingting ol i holim long lotu. Sampela i no amamas long stori long lotu wantaim man ol i no save long en. Sampela i pilim olsem i no stret long askim man long kamapim tingting em i holim long God. Sampela narapela i sem long ol man i lukim ol i ritim Baibel wantaim wanpela Witnes Bilong Jehova. Ol manmeri i gat kain kain tingting, olsem na yumi mas pilim tingting bilong ol.—2 Tim. 2:24.

6. (a) Olsem wanem aposel Pol i senisim wei bilong autim tok na bai i stret long ol manmeri bilong kain kain lain? (b) Olsem wanem yumi inap bihainim eksampel bilong em?

⁶ Yumi ken mekim wanem sapos man i no amamas taim yumi kolim kain tok olsem “Baibel,” “kriesen,” “God,” o “lotu”? Yumi ken bihainim eksampel bilong aposel Pol na senisim wei bilong yumi long toktok wantaim ol. Taim Pol i toktok long lain Juda, em i kamapim stret tok bilong ol Skripsa. Tasol taim em i stap long Areopagus na toktok long ol saveman bilong lain Grik, em i no kolim stret tok bilong ol Skripsa. (Apo. 17:2, 3, 22-31) Hau bai yumi inap bihainim eksampel bilong Pol? Sapos yu bungim man i no bilip long Baibel, mobeta yu no ken kolim stret tok bilong Baibel taim yu toktok wantaim em. Sapos yu lukim olsem man i no amamas long ol narapela i lukim em i ritim Baibel wantaim yu, orait yusim narapela rot long soim tok bilong Baibel—ating yu ken yusim fon o teblet.

7. Sapos yumi laik bihainim eksampel bilong Pol olsem 1 Korin 9:20-23 i kamapim, yumi ken mekim wanem?

⁷ Pilim Tingting na Putim Yau. Yumi mas traim long luksave long ol samting i stiaim tingting bilong ol manmeri. (Prov. 20:5) Tingim gen eksampel bilong Pol. Em i kamap bikpela wantaim lain Juda. Em i senisim wei bilong autim tok taim em i toktok wantaim ol manmeri bilong ol narapela lain em ol i no save liklik long Jehova na ol tok bilong ol Skripsa. Yumi ken mekim sampela wok painimaut long ol pablikesen bilong yumi o toktok wantaim ol narapela pablisa long kongrigesen bambai yumi inap lain long pilim tingting bilong ol manmeri long teritori bilong yumi.—Ritim 1 Korin 9:20-23.

8. Wanem wanpela rot bilong kirapim tok taim yu laik stori long Baibel?

⁸ Yumi laik painim “man i gutpela inap long [yumi] go lukim em.” (Mat. 10:11) Sapos yumi laik helpim em, orait yumi mas askim em long kamapim tingting bilong em, na yumi mas putim gut yau taim em i toktok. Wanpela brata long Inglan i askim ol manmeri long kamapim tingting bilong ol long hau ol marit inap stap amamas, lukautim gut ol pikinini, na stap amamas yet maski ol man i rongim ol. Em i save putim yau long ol, na bihain em i save tok, “Yu ting wanem long dispela skultok ol i raitim klostu 2 tausen yia i go pinis?” Em i no save kolim “Baibel,” nogat, em i save yusim fon long soim skripsa.

PUTIM TOK I GO DAUN LONG BEL

9. Olsem wanem yumi inap helpim ol manmeri husat i no save amamas long narapela i toktok wantaim ol long God?

⁹ Taim yumi bungim ol man husat i no laik stori long lotu, yumi inap putim tok i go daun long bel bilong ol taim yumi stori long samting ol i tingting planti long en. Planti manmeri i laikim ol samting God i bin wokim. Olsem na yumi ken tok: “Ating yu save olsem ol saientis i stadi long ol samting i stap pinis long graun na ol i bihainim disain bilong en long wokim ol narapela samting. Kain olsem, ol i stadi long yau na ol i wokim maikrofon, na ol i stadi long ai na ol i wokim kamera. Taim yu tingim ol samting i stap pinis long graun, yu ting olgeta dispela samting i kamap long rot bilong wanpela kain strong, wanpela man, o narapela samting?” Yumi mas putim gut yau, na bihain yumi ken tok: “Ol saveman i stadi long yau na ai, olsem na ating yumi laik save long man ol i wok long kisim skul long en. Mi kirap nogut long tok bilong wanpela saveman bilong bipo: ‘Olsem wanem? Man i bin wokim yau, em i no inap harim toktok, a? Na olsem wanem? Man i bin wokim ai, em i no inap lukim ol samting, a? . . . Em dispela man tasol i save givim save long ol manmeri!’ Sampela saientis i bilipim dispela tok.” (Sng. 94:9, 10) Yumi ken soim wanpela vidio bilong jw.org aninit long het tok “Interviews and Experiences” long lain vidio bilong “Viewpoints on the Origin of Life.” (Lukim PUBLICATIONS > VIDEOS.) O yumi ken givim buklet Was Life Created? o buklet The Origin of Life—Five Questions Worth Asking.

10. Olsem wanem yumi inap kirapim tok wantaim man husat i no save amamas long narapela i stori wantaim em long God?

¹⁰ Ol manmeri i laik tru long kisim gutpela sindaun long bihain. Tasol planti man i pret olsem graun bai bagarap na ol manmeri i no inap stap moa long en. Wanpela wasman raun long Nowe i tok ol manmeri husat i no laik bai narapela i stori wantaim ol long God, ol i save amamas long stori long ol samting i kamap long graun. Em i save tok gude long man na bihain em i save tok: “Yu ting wanem long laip bilong yumi long bihain? Yu ting husat tru bai helpim yumi, ol lida bilong wok politik, ol saientis, o narapela man?” Em i save putim gut yau long bekim bilong ol na bihain em i save ritim o kolim stret tok bilong wanpela skripsa we i stori long gutpela sindaun yumi bai kisim long bihain. Sampela manmeri i save kirap nogut long lukim tok promis bilong Baibel olsem graun bai stap oltaim na ol gutpela manmeri bai stap oltaim long en.—Sng. 37:29; Ekl. 1:4.

11. (a) Wai na yumi mas yusim kain kain wei bilong autim tok? (b) Hau bai yumi inap bihainim eksampel bilong Pol olsem Rom 1:14-16 i kamapim?

¹¹ Yumi mas yusim kain kain wei bilong autim tok bikos ol manmeri i gat narapela narapela tingting. Tok yumi autim bai i stret long laik bilong wanpela man, na bai i no stret long laik bilong narapela man. Sampela manmeri i pilim orait long yumi stori wantaim ol long God o Baibel, tasol ol narapela i no laikim dispela pasin. Yumi gat wok long painim rot bilong stori wantaim olgeta kain manmeri. (Ritim Rom 1:14-16.) Yumi tingim olsem Jehova tasol i save mekim sid bilong tok i tru i gro insait long bel bilong ol manmeri husat i holim stretpela tingting.—1 Kor. 3:6, 7.

AUTIM TOK I TRU LONG LAIN ESIA

12. Yumi inap mekim wanem bilong helpim ol manmeri long Esia em ol i no tingim olsem i gat Man i bin wokim yumi?

¹² Long olgeta hap bilong graun, planti pablisa i bungim ol manmeri bilong ol kantri long Esia, na sampela i kam long ol ples we gavman i putim tambu long wok lotu. Long planti kantri bilong Esia, planti manmeri i no tingting na skelim olsem i gat Man i bin wokim yumi. Sampela manmeri i gat 2-pela tingting na ol i redi long mekim Baibel stadi, tasol sampela manmeri i no laik mekim olsem. Olsem wanem yumi inap helpim ol? Sampela pablisa i luksave olsem i gutpela long stori tasol wantaim man, na soim olsem ol i tingim em tru. Taim ol i lukim olsem i stret, ol i save stori long hau laip bilong ol yet i kamap gutpela moa taim ol i bihainim wanpela stiatok bilong Baibel.

13. Wanem samting inap kirapim laik bilong ol manmeri long kisim save long tok bilong Baibel? (Lukim fran pes piksa.)

¹³ Savetingting bilong Baibel i save kirapim tru tingting bilong ol kain manmeri olsem. (Ekl. 7:12) Long New York, wanpela sista i save visitim ol manmeri i mekim tokples Saina. Dispela sista i tok: “Mi soim olsem mi tingim tru ol manmeri na mi putim yau long ol. Sapos mi save olsem ol i kam nupela, mi save askim olsem: ‘Yupela i pilim olsem wanem long i kam stap long hia? Yupela i painim pinis wok mani? Ol manmeri long hia i soim gutpela pasin long yupela?’” Sampela taim dispela i opim rot long soim tok bilong Baibel long man. Sapos i stret long mekim, dispela sista i save tok moa olsem: “Yu ting wanem rot i gutpela long helpim ol manmeri long pas gut wantaim ol narapela? Inap mi soim yu wanpela savetok bilong Baibel? ‘Taim man i statim pait, i olsem em i opim bikpela dua bilong larim wara i kam aut; paslain long tok pait i go bikpela, yu mas kirap i go.’ Yu ting dispela tok inap helpim yumi long stap gut wantaim ol narapela?” (Prov. 17:14) Dispela kain pasin bilong toktok inap helpim yumi long luksave long ol manmeri husat bai amamas long yumi visitim ol gen.

14. Olsem wanem wanpela brata long Esia i save helpim ol manmeri husat i tok ol i no bilip long God?

¹⁴ Olsem wanem long ol manmeri i tok ol i no bilip long God? Wanpela brata i gat ekspiriens long autim tok long ol kain manmeri olsem long Esia na em i tok: “Taim ol man i tok, ‘Mi no bilip long God,’ tok bilong ol i makim olsem ol i no bilip long pasin bilong lotuim ol god bilong ol tumbuna. Mi save wanbel long tok bilong ol na tok olsem ol man yet i wokim planti god. Mi save ritim Jeremaia 16:20: ‘Ating man inap wokim ol god, a? Nogat tru. Ol samting em i wokim, ol i no god tru.’ Bihain mi save askim: ‘Olsem wanem yumi inap luksave olsem god tru i narapela kain long ol god ol man yet i wokim?’ Mi save putim gut yau, na bihain mi save ritim Aisaia 41:23: ‘Tokim mipela long samting bai kamap long bihain, na bai mipela inap save olsem yupela i god.’ Mi save soim eksampel long hau Jehova i bin truim wanpela tok profet long bipo.”

15. Yumi inap kisim wanem skul long eksampel bilong brata long Is Esia?

¹⁵ Wanpela brata long Is Esia i save bihainim wankain pasin taim em i mekim ol gobek. Em i tok: “Mi save soim ol skripsa i kamapim klia savetok bilong Baibel, na ol tok profet i kamap tru pinis, na ol lo i stiaim ol samting i kamap long graun na long ples antap. Mi save stiaim ol long luksave olsem i gat Man i bin wokim yumi na em i stap laip na em i gat savetingting. Taim man i bilip olsem i gat God i stap, mi save soim em ol tok bilong Baibel we i stori long Jehova.”

16. (a) Olsem Hibru 11:6 i kamapim, wai na ol Baibel sumatin i mas bilip long God na tok bilong Baibel? (b) Olsem wanem yumi inap helpim ol long mekim olsem?

¹⁶ Taim yumi mekim Baibel stadi wantaim ol manmeri husat i no bilip long God, oltaim yumi mas strongim bilip bilong ol olsem i gat God i stap. (Ritim Hibru 11:6.) Yumi mas helpim ol long bilip long tok bilong Baibel. Ating planti taim yumi mas kolim gen sampela tok i tru. Long olgeta taim yumi stadi wantaim ol, yumi mas stori gen long evidens i soim klia olsem Baibel em Tok Bilong God. Ating yumi ken stori long ol tok promis bilong Baibel we i kamap tru, olsem wanem tok bilong Baibel i stret wantaim save bilong saiens na histori, na olsem wanem Baibel i pulap long savetingting.

17. Sapos yumi soim pasin laikim, dispela inap helpim ol manmeri olsem wanem?

¹⁷ Yumi helpim ol manmeri long kamap disaipel bilong Krais taim yumi soim pasin laikim long ol, maski ol i bilip long God o nogat. (1 Kor. 13:1) Taim yumi skulim ol, yumi laik helpim ol long luksave olsem God i laikim yumi olgeta na em i laik bai yumi tu i laikim em. Em tru olsem planti manmeri i no bilip long God, tasol long olgeta yia, planti tausen bilong ol i kisim baptais bikos ol i kisim pasin bilong laikim God. Olsem na yumi mas holim stretpela tingting, na soim pasin laikim na tingim tru olgeta kain manmeri. Putim yau long ol. Traim long pilim tingting bilong ol. Soim gutpela pasin we inap kirapim ol long kamap disaipel bilong Krais.