1919—Wan Handret Yia I Go Pinis

Dispela triti i kirapim nupela oganaisesen, em Lig ov Nesen. Wok bilong en i bilong “strongim olgeta kantri long wok bung wantaim na kamapim bel isi na gutpela sindaun long olgeta hap bilong graun.” Planti lotu bilong lain Kristendom i sapotim dispela Lig. Wanpela grup long Amerika (Federal Council of the Churches of Christ) i kolim dispela Lig olsem “piksa bilong Kingdom Bilong God long graun.” Dispela grup i sapotim dispela Lig na salim sampela mausman bilong ol i go long konferens i kamap long Paris. Wanpela bilong ol dispela mausman i tok dispela konferens “i kirapim wanpela nupela haptaim long histori bilong dispela graun.”

Wanpela nupela haptaim i kirap, tasol em i no kamap long rot bilong ol man i bung long konferens bilong kamapim bel isi. Long 1919, wanpela nupela haptaim i kamap long sait bilong wok autim tok taim Jehova i strongim lain bilong em long mekim bikpela wok moa bilong autim tok. Tasol pastaim, wanpela bikpela senis i mas kamap long ol Sumatin Bilong Baibel.

BIKPELA DISISEN

Ol i makim Sarere, Janueri 4, 1919, olsem det bilong mekim eleksen bilong makim ol nupela dairekta bilong Watch Tower Bible and Tract Society. Long dispela taim, Joseph F. Rutherford i stap olsem lida bilong lain bilong Jehova, tasol em i stap kalabus long Atlanta, Jojia, long Amerika wantaim 7-pela moa brata. Ol brata i mas mekim disisen olsem ol bai makim gen ol brata i stap long kalabus long mekim wok dairekta, o ol bai makim ol nupela dairekta.

Taim Brata Rutherford i stap long kalabus, em i wari na tingting planti long wanem samting bai kamap long oganaisesen. Em i save olsem sampela brata i laik makim narapela long kamap presiden. Olsem na em i raitim pas i go long ol brata long taim bilong eleksen na tokim ol long makim Evander J. Coward long kamap presiden. Rutherford i kolim Coward olsem “man bilong stap isi,” “skelim gut ol samting,” na “man i stap gut long Bikpela.” Tasol planti brata i gat narapela tingting; ol i laik wet na mekim eleksen bihain long 6-pela mun. Ol lain bilong ligol tim i sapotim ol brata i kalabus, na ol i wanbel long dispela tingting. Tasol sampela brata i no wanbel.

Tasol rot i op long ol inap stretim dispela hevi. Richard H. Barber i tok, i olsem man i ‘kapsaitim oil long wara nogut.’ Wanpela brata long dispela miting i tok: “Mi no loya, olsem na mi no save long hau mi inap mekim ol samting i stret wantaim lo, tasol mi save long hau mi inap stap gut long narapela. God i laik yumi mas stap gut long ol narapela. Nambawan gutpela rot em long mekim eleksen na makim gen Brata Rutherford olsem presiden.”—Sng. 18:25.

A. H. Macmillan em wankalabus bilong Brata Rutherford, na em i tok long neks de, Brata Rutherford i nok long wol bilong rum gad bilong em na tok, “Putim han bilong yu kam ausait.” Brata Rutherford i givim em wanpela telegram. Macmillan i lukim sotpela tok tasol na em i save long mining bilong en. Dispela tok em olsem: “RUTHERFORD WISE VAN BARBER ANDERSON BULLY NA SPILL PRESIDEN FES TRIPELA OFISA LAIKIM YUPELA OLGETA.” Dispela i minim olsem ol i makim gen olgeta olpela dairekta long mekim yet dispela wok, na Joseph Rutherford na William Van Amburgh i stap gen olsem ol ofisa. Olsem na Brata Rutherford bai mekim yet wok presiden.

LUSIM KALABUS!

Taim ol 8-pela brata i stap long kalabus, ol Sumatin Bilong Baibel i mekim petisen bilong askim gavman long larim ol brata i lusim kalabus. Ol bratasista i kirapim 700,000 manmeri long sainim dispela petisen. Long Trinde, Mas 26, 1919, paslain long ol i givim petisen long gavman, Brata Rutherford na ol narapela brata i lusim kalabus.

Brata Rutherford i mekim dispela tok long ol lain i welkamim em: “Mi bilip olsem dispela hevi i redim yumi long karim ol bikpela hevi moa. . . . Pait yupela i mekim i no bilong helpim ol brata bilong yupela long lusim kalabus, nogat. Dispela em i no risen bilong pait yupela i mekim. . . . Pait yupela i mekim em bilong sapotim Tok i Tru, na ol lain i insait long dispela pait i kisim gutpela blesing.”

Ol samting i kamap long kot i soim olsem Jehova i stiaim ol samting. Long Me 14, 1919, kot ol i apil long en i tok: “Ol lain i kamap long kot long dispela keis i no bin . . . kisim stretpela kot em ol i gat rait long kisim, olsem na mipela i dismisim dispela keis.” Ol brata i go kalabus bikos gavman i tok ol i mekim bikpela rong, na dispela disisen inap stap long rekod bilong ol sapos ol i no bin mekim wanpela samting bilong stretim o sapos ol i kalabus inap sotpela taim tasol. Kot i no sutim tok gen long ol brata. Olsem na Jas Rutherford i holim yet namba bilong em long sapotim lain bilong Jehova long Suprim Kot bilong Amerika, na em i mekim olsem inap planti yia bihain.

TINGTING STRONG LONG AUTIM TOK

Brata Macmillan i tok: “Mipela no inap sindaun na lukluk tasol na wetim Bikpela long kisim mipela i go long heven. Mipela i luksave olsem mipela i mas mekim sampela samting long painimaut laik tru bilong Bikpela.”

Tasol ol brata long hetkota i no inap kirap tasol long mekim gen wok ol i bin mekim inap planti yia pinis. Bilong wanem? Taim ol i stap kalabus, ol birua i bagarapim olgeta plet bilong prinim ol pablikesen. Dispela i mekim ol brata i bel hevi, na sampela i tingting olsem ating ol bai no gat wok moa long mekim wok autim tok.

Olsem wanem? Ol manmeri i laik harim yet tok bilong Kingdom em ol Sumatin Bilong Baibel i save autim? Brata Rutherford i laik painimaut, olsem na em i tingting long mekim wanpela pablik tok. Ol bai invaitim olgeta manmeri. Brata Macmillan i tok: “Sapos i no gat man i kam long dispela miting, mipela bai save olsem wok autim tok em pinis nau.”

Brata Rutherford i sik nogut tru, tasol long Sande, Me 4, 1919, em i mekim pablik tok “The Hope for Distressed Humanity” long Los Angeles, California. Inap olsem 3,500 manmeri i kam harim dispela tok, tasol sampela handret manmeri i no inap stap na harim dispela tok bikos i no gat spes. Neks de, narapela 1,500 manmeri i kam harim tok. Ol brata i kisim bekim bilong ol—ol manmeri i laik tru long harim tok bilong Kingdom!

Ol bratasista i kirap long autim tok, na ol Witnes Bilong Jehova i bihainim wankain pasin bilong autim tok i kam inap long nau.

WOK BAI KAMAP BIKPELA

The Watch Tower bilong Ogas 1, 1919, i kamapim toksave olsem long Septemba, wanpela kibung bai kamap long Cedar Point, Ohio. Long dispela taim, wanpela yangpela Sumatin Bilong Baibel long Missouri, em Clarence B. Beaty i tok: “Olgeta manmeri i pilim olsem ol i mas go long dispela kibung.” Winim 6,000 bratasista i go long dispela bung—ol brata i no bin ting olsem bikpela lain manmeri olsem bai kam bung. Na tu, winim 200 manmeri i kisim baptais long Raunwara Erie.

Septemba 5, 1919, em namba 5 de bilong kibung, na Brata Rutherford i mekim “Tok i Go Long Ol Wanwok” na em i tokaut long nupela magasin, The Golden Age.a Dispela magasin bai “stori long bikpela nius bilong nau, eksplenim mining bilong tok bilong Baibel long wai na ol bikpela hevi i kamap.”

Ol i kirapim olgeta Sumatin Bilong Baibel long strongim bel na yusim dispela nupela pablikesen long autim tok. Wanpela pas i stori long wei bilong mekim dispela wok na i tok: “Olgeta lain i baptais i mas tingim olsem em i gutpela blesing tru long mekim wok, na mekim gutpela wok bilong autim tok long planti manmeri moa taim rot i op.” Planti manmeri i amamas long mekim dispela wok! Long Disemba, ol bratasista i kisim winim 50,000 sabskripsen bilong nupela magasin.

Long pinis bilong 1919, ol manmeri bilong Jehova i oganaisim gen wok bilong ol na ol i kisim nupela strong. Na tu, truim i kamap long sampela bikpela tok profet i stori long ol samting bai kamap long haptaim bilong las de. Truim i kamap long tok profet bilong Malakai 3:1-4 long testim na stretim ol manmeri bilong God. Ol manmeri bilong Jehova i lusim kalabus bilong “Bikpela Babilon,” na Jisas i makim “gutpela wokboi i gat savetingting.”b (Rev. 18:2, 4; Mat. 24:45) Nau ol Sumatin Bilong Baibel i redi long mekim wok em Jehova i laik bai ol i mas mekim.