Yu Save Long Dispela?

Wanem wok bilong ol bosboi long taim bipo?

LONG taim bilong ol man i raitim Baibel, ol bosboi i save lukautim ol samting long haus bilong narapela man. Sampela taim, tok Hibru na tok Grik ol i tanim olsem “bosboi” inap makim wasman bilong haus.

Taim Josep, pikinini man bilong Jekop, i stap wokboi nating long Isip, Josep i kamap bosboi long haus bilong bosman bilong em. Bosman bilong em, man Isip, i “larim olgeta samting bilong em long han bilong Josep.” (Stt. 39:2-6) Bihain, Josep i kamap gavana bilong Isip, na em i makim wanpela bosboi long lukautim ol samting long haus bilong em.—Stt. 44:4.

Long taim bilong Jisas, ol papagraun i save stap long ol taun longwe long fam bilong ol. Olsem na ol papagraun i save makim ol bosboi long lukautim ol wok em ol wokman i mekim long fam bilong ol.

Husat inap mekim wok olsem wanpela bosboi? Long taim bilong ol aposel, Columella, wanpela man Rom i save raitim buk, i tok taim bosman i laik makim wanpela bosboi long lukautim ol samting long haus bilong em, em i mas makim “man i save gut long mekim wok.” Dispela man “i save olsem em i holim namba bilong mekim wok bos, tasol em i no lesman, na tu, em i no man bilong mekim hatpela pasin.” Columella i tok moa olsem: “Narapela bikpela samting em olsem, dispela man i no ken ting olsem em i save long ol samting em i no save long en, na em i mas i gat laik long lainim ol nupela samting.”

Baibel i yusim stori bilong bosboi olsem tok piksa bilong makim sampela wok i kamap insait long kongrigesen Kristen. Eksampel: Aposel Pita i kirapim ol Kristen long tingim olsem ol i mas yusim save God i givim long ol long “helpim ol arapela,” na stap olsem “ol gutpela bosboi bilong . . . bikpela pasin helpim bilong God.”—1 Pita 4:10.

Jisas i yusim eksampel bilong bosboi long tok piksa i stap long Luk 16:1-8. Na tu, long tok profet bilong em long sain bilong em i kam i stap olsem King, Jisas i tokim ol disaipel olsem em bai makim wanpela lain long i stap olsem “gutpela wokboi i gat savetingting,” o “gutpela bosboi.” Nambawan wok bilong dispela bosboi em olsem, oltaim em bai givim kaikai bilong strongim bilip bilong ol disaipel bilong Krais long taim bilong pinis. (Mat. 24:45-47; Luk 12:42) Yumi tenkyu tru olsem yumi inap kisim ol pablikesen bilong strongim bilip bilong yumi em gutpela bosboi i redim na tilim long olgeta hap bilong graun.