Mekim Yet Ol Wok Bilong Kingdom
1 Sampela taim long yia yumi gat rot long mekim kain kain samting. Long kain taim olsem, planti bilong yumi i laik mekim narapela kain samting na kisim malolo na amamas. Tasol yumi mas was gut, nogut yumi slek long mekim wok bilong Kingdom.—Fl 3:16.
2 Yumi amamas long wetim ol kibung distrik i kamap long Disemba na Janueri. Olsem wanem? Yu stretim rot pinis long i go? Paslain tru long kibung, gutpela sapos yu stretim rot bilong kisim PMV o sip o balus samting, na ples slip tu. Sapos long kongrigesen i gat wanpela brata o sista yumi mas helpim em long go long kibung, olsem wanem? Yu bin tingting long singautim em i kam wantaim yu na helpim em long kisim ples slip? Gutpela pasin sori yu mekim inap helpim yu yet wantaim dispela brata o sista.
3 Olsem wanem? Sapos yu save bai yu gat hap taim bilong malolo, olsem long taim i gat holide bilong skul, yu bin tingting long mekim bikpela wok moa long autim tok? Planti ol i save pinis, em gutpela taim bilong mekim wok painia haptaim. Planti taim dispela i bin opim rot bilong mekim sampela bikpela wok moa. Ol famili i ken autim tok wantaim na kisim gutpela amamas. Tasol maski yu mekim wok painia haptaim o nogat, yu ting yu inap lusim sampela aua moa long autim tok? Sapos ol pablisa i wok long stretim rot bilong ol, ating bai sampela moa inap autim tok long apinun olsem 5 klok samting na kisim ol gutpela samting i kamap long dispela wok.
4 Olsem wanem? Yumi inap helpim wanpela kongrigesen i hatwok long autim tok long olgeta hap bilong teritori bilong ol? Long taim bilong malolo, ating yu ken autim tok long as ples bilong yu, o sapos i gat wanpela liklik kongrigesen o wanpela grup long dispela hap, orait, yu ken wok wantaim ol. Ating long kongrigesen bilong yu i gat sampela i laik wok wantaim yu inap wanpela o tupela wik long wanpela hap i no gat planti Witnes i stap long en. Sapos grup bilong yu i liklik, ating sampela pablisa bilong narapela kongrigesen bai i amamas long go wantaim yu. Sapos yu no inap i go long sampela longwe hap, ating wasman sekit inap tokim yu long wanpela kongrigesen i stap klostu, ol bai amamas sapos yu helpim ol.
5 Olsem wanem? Yu tingting long i go limlimbur long wanpela hap? Sapos olsem, yu wok long stretim rot bilong i go long ol miting na autim tok wantaim ol brata sista long dispela hap? Sapos yu mekim olsem, dispela bai strongim yu na ol narapela wantaim. (Ro 1:11, 12) Na taim yu sindaun long PMV samting bilong i go long wanpela hap, yu redi long autim tok long man i sindaun klostu long yu? Yu mas kisim Baibel bilong yu na sampela magasin na buk samting i go wantaim yu. Taim yu malolo, makim hap taim tu bilong kaunim Baibel na ol magasin samting, na stadi long Baibel. Tru sampela taim yumi mas malolo long mekim wok bilong skin, tasol yumi no ken malolo long mekim wok bilong Jehova.
6 Ol elda i mas tingting gut na stretim gut ol wok bilong kongrigesen. Sapos sampela elda o wokman bai go malolo long wanpela hap, ol elda i mas stretim rot bilong ol narapela i ken lukautim wok bilong ol. Paslain tru long ol i go, ol i mas toksave long wasman siaman long wanem de ol bai go na wanem de ol bai kam bek. Long dispela rot bai wasman siaman inap stretim gut ol samting.
7 Tru tumas, taim yu mekim ol wok bilong Kingdom bai yu gat planti wok tru. Tasol i gat planti samting bilong pulim nabaut tingting bilong yumi na bai yumi no wok strong moa long wok bilong Kingdom. Olsem na wok strong long olgeta taim yu gat rot long mekim. Tingim wanem ol samting bilong spirit i olsem namba wan samting yu mas mekim, na no ken larim wanpela samting i pasim yu.—Fl 1:10.
[Ol Askim]
1. Yumi mas was gut long wanem samting?
2. Long olgeta yia, yumi wetim kibung distrik i kamap, na yumi ken mekim wanem?
3. Yumi ken mekim wanem na bai yumi inap mekim bikpela wok moa long autim tok?
4. Kolim sampela samting yumi ken mekim bilong helpim ol brata bilong yumi.
5. Taim yumi tingting long i go limlimbur long wanpela hap, yumi mas tingting long mekim wanem?
6. Sapos sampela elda o wokman bai go malolo long wanpela hap, pastaim ol i mas mekim wanem?