Yumi Mas ‘Was i Stap’
1 Tok bilong Jisas long Matyu 26:38-41 em i mekim klostu long taim em i laik mekim wanpela bikpela samting tru, winim olgeta samting em i bin mekim bipo. Na dispela samting bai i bikpela samting tu long olgeta manmeri, long wanem, ol inap lus. Ol disaipel bilong Jisas ol i mas ‘was i stap.’
2 Klostu nau, Jisas bai kam bilong kisim bek yumi na givim strafe long ol man nogut. Yumi ol Kristen i save was i stap yumi save taim i sot pinis, olsem na yumi no ken sindaun nating na wetim Jisas i kisim bek yumi, nogat. Yumi save, long olgeta taim yumi mas redi i stap. Yumi mas taitim bun na givim bel long mekim wok bilong Jehova. (1 Ti 4:10) Olsem wanem long yumi wan wan? Yumi save was i stap?
3 Skelim Yumi Yet: Jisas i mekim narapela strongpela tok, olsem: “Yupela lukaut gut.” (Lu 21:34, 35) Yumi mas was long yumi yet na bai yumi “no gat rong na i no gat asua . . . namel long ol lain manmeri bilong dispela graun.” (Fl 2:15) Olsem wanem? Long olgeta de yumi save bihainim ol pasin Kristen, na bihainim Jisas na ol lo bilong Baibel? Yumi mas klia long olgeta pasin nogut bilong dispela graun “i stap aninit long strong bilong Satan.” (1 Jo 5:19; Ro 13:11-14) Taim yumi skelim pasin bilong yumi yet wantaim tok bilong Baibel, yumi save was i stap olsem Jisas i tokim yumi long mekim, o olsem wanem?
4 Ol elda i mas redi oltaim na wok strong long mekim wok bilong ol insait long kongrigesen—ol i save, ol i mas tokim God long olgeta samting ol i bin mekim bilong lukautim ol sipsip. (Hi 13:17) Wanpela bikpela wok ol papa i mas mekim i olsem: Ol i mas helpim famili bilong ol long bihainim tok bilong Jehova. (Stt 18:19; Jos 24:15; skelim wantaim 1 Timoti 3:4, 5.) Na em bikpela samting long yumi olgeta i mas inapim dispela lo bilong Baibel long laikim tru ol narapela! Em mak bilong ol Kristen tru.—Jo 13:35.
5 Redi Oltaim Long Toksave Long Ol Narapela: Bilong was i stap yumi no ken was long yumi yet na em tasol. Nogat. Yumi gat wok long kamapim ol disaipel. (Mt 28:19, 20) Pasin bilong laikim ol narapela i mas kirapim yumi long toksave olsem bagarap i laik painim ol man bilong dispela graun, tasol ol inap abrusim na i stap laip. Olgeta Kristen i mas mekim dispela wok. Em bikpela hap wok lotu bilong yumi. (Ro 10:9, 10; 1 Ko 9:16) Planti taim yumi bungim ol man i les long harim tok, o ol i birua long dispela wok bilong helpim ol man long abrusim bagarap na i stap laip. Tasol maski planti man i sakim dispela toksave, yumi mas mekim yet. (Ese 33:8, 9) Yumi laikim tru God na ol man, na dispela i kirapim yumi long mekim olsem.
6 Yumi no ken les. Na yumi no ken larim ol samting bilong olgeta wan wan de i pulim nabaut tingting bilong yumi, na yumi no ken insait long ol kain kain amamas bilong dispela graun na bai ol dispela samting i pundaunim yumi. (Lu 21:34, 35) Dispela taim yumi stap long en em i sot pinis, winim olgeta taim bipo. Klostu nau bai Krais Jisas i givim strafe long ol man nogut. Ol man i save was i stap, na redi oltaim, ol tasol bai winim bagarap. Sapos yumi bihainim ol tok bilong Jisas na “abrusim olgeta dispela samting i laik kamap,” bai yumi amamas tru!—Lu 21:36.