Bihainim Pasin Bilong Bilip Bilong Ol
1 Aposel Pol i tok, bilip i olsem: ‘Yumi save gut tru, samting God i promis pinis long givim yumi na yumi wet long kisim, em bai yumi kisim tru. Maski ai bilong yumi i no lukim ol dispela samting, yumi save gut tru olsem, dispela olgeta samting i stap.’ Na em i tok moa, “man i no bilip long God, em i no inap bihainim laik bilong God.” (Hi 11:1, 6) Paul i tokim yumi long kamapim bilip, na bilip strong, na wok long kisim bilip.—2 Ko 4:13; Kl 2:7; 2 Ti 2:22.
2 Baibel i stori long planti man ol i gutpela piksa long pasin bilong bilip. Long Hibru sapta 11, Pol i kolim nem bilong planti man i gat strongpela bilip. Wanpela em Abel; em namba wan man i bin i dai long holimpas bilip. Noa i bilip na pasin bilong pret long God i kirapim em long mekim wok na bai famili bilong em i no ken bagarap. Abraham i bilip na bihainim tok. Moses i bilip, na em i stap olsem man i bin lukim God na em i stap strong. I gat planti bilipman moa, olsem na Pol i tok em i no gat taim long stori long ol. Ol i bin “wokabaut long pasin holi na bihainim olgeta pasin bilong God” na yumi amamas yumi ken kaunim stori bilong ol na strongim bilip bilong yumi!—2 Pi 3:11.
3 Jisas i kamapim dispela askim: “Taim Pikinini Bilong Man i kam, em bai i lukim ol manmeri i stap long graun ol i bilip, o nogat?” (Lu 18:8) Olsem wanem? Long nau i gat sampela man i stap olsem gutpela piksa long pasin bilong bilip? Yumi lukim ol man na meri, ol yangpela na lapun, i kamapim strongpela bilip long Jehova wankain olsem lain bilong God long taim bilong Baibel?
4 Ol Bilipman Long Nau: Namel long yumi i gat planti man i gat strongpela bilip! Pasin bilong bilip bilong ol wasman i go pas long lukautim kongrigesen, em inap tru long yumi bihainim. (Hi 13:7) Na i gat sampela bilipman moa. Long olgeta kongrigesen i gat sampela em longtaim pinis ol i bin stap gut long mekim wok bilong Jehova, maski bikpela hevi i bin painim ol.
5 Yumi laikim tru pasin bilong ol gutpela sista i bin sanap strong, maski planti yia pinis man bilong ol i bin birua long lotu bilong ol na givim hevi long ol. Ol papa o mama i no gat poroman, ol yet i save mekim bikpela long ol pikinini. Na i gat sampela lapun, em man bilong ol i dai pinis, na oltaim ol i save insait long ol wok bilong kongrigesen, maski ol i no gat famili bilong strongim ol. (Skelim wantaim Luk 2:37.) Yumi kirap nogut long pasin bilong bilip bilong ol brata na sista i gat bikpela sik. Planti ol i mekim yet wok bilong God, maski sampela samting i pasim rot long ol i mekim sampela wok moa insait long kongrigesen. Na i gat ol yangpela Witnes i bin strongim bel na kamapim bilip bilong ol, maski ol tisa o ol wanskul i bin birua long ol. Pasin bilong yumi long givim bel long God em i kamap strong moa taim yumi lukim ol gutpela painia i mekim yet dispela wok long olgeta wan wan yia, maski planti hevi i painim ol. Olsem Pol, yumi no gat taim long kamapim olgeta ekspiriens ol dispela brata na sista i bin kisim long wok bilong Kingdom na ol wok ol i bin mekim long kamapim bilip bilong ol!
6 Pasin bilong ol dispela bilipman i save strongim bel bilong yumi. (1 Te 3:7, 8) Gutpela sapos yumi bihainim pasin bilong bilip bilong ol, long wanem, Jehova “i save amamas long ol man i bihainim pasin tru.”—Snd 12:22.