Mekim Wok Long Ol Liklik Nius Bilong Kirapim Tok
1 Ating yu wanbel olsem sapos man i laik autim gut tok, em yet i mas kirap pastaim long toktok, a? Olsem na samting yumi stori long en i mas kirapim laik bilong man long harim tok na insait long tok bilong yu. Tasol olsem wanem yumi ken mekim gut dispela?
2 Planti pablisa i kisim save pinis olsem taim ol i kamapim liklik tok ol bin redim gut na tilim liklik nius em Baibel i as bilong en, ol i ken kirapim tok wantaim man. Ol het-tok bilong ol liklik nius i stret tru long ol man, na ol piksa i gat kala kala long en i save pulim ai bilong man. Liklik nius i no givim tingting long man olsem i gat planti tok i stap bilong kaunim, nogat. Tasol sotpela tok bilong en em inap long pulim tingting bilong man na yumi ken mekim wok long en bilong kirapim Baibel-stadi.
3 Wanpela Witnes i bin pilim olsem: “Long nau ol man i tingting tasol long wok, olsem na planti taim ol i no laik lusim bikpela hap taim long kaunim buk samting, tasol liklik nius em inap stret bilong givim wanpela bikpela tok long ol, na ol tok bilong en i no longpela na man bai i les long kaunim, nogat. Mi bin kaunim planti bilong ol liklik nius, na mi kisim save long tok i tru.” Maski tok i stap long nius i sotpela, Tok Bilong God em nius i stori long en em i gat bikpela strong.—Hi 4:12.
4 Fopela Rot i No Hatwok: Planti pablisa i amamas long bihainim wanpela rot i no hatwok bilong kirapim tok. (1) Soim man long tupela o tripela liklik nius, na tokim em long makim wanpela liklik nius em i laikim. (2) Taim em i makim pinis wanpela, yu ken givim wanpela askim long em yu bin redim gut na i kamapim wanpela bikpela tok i stap long nius. (3) Bilong bekim askim, yu ken kaunim wanpela paragraf o wanpela skripsa insait long liklik nius i bekim stret dispela askim. (4) Sapos man i amamas long bekim tok, stori yet long ol tok insait long liklik nius o kamapim tok bilong wanpela stadi long buklet Yumi Mas Mekim Wanem? o bilong wanpela sapta long buk Save, em ol tok i stori stret long dispela askim. Taim yu mekim olsem, ating yu inap kirapim wanpela Baibel-stadi. Ol dispela tok daunbilo bai helpim yu long redim sampela tok yu ken kamapim long 4-pela bilong ol liklik nius.
5 Het-tok bilong liklik nius “Husat Tru i Bosim Dispela Graun?” ating yu ken kamapim olsem wanpela askim.
◼ Sapos man yu toktok wantaim em i bekim tok olsem “God” o “Mi no save,” kaunim namba wan na namba 2 sentens long pes 2, na namba wan paragraf long pes 3. Kamapim tok bilong 1 Jon 5:19 na Kamapim Tok Hait 12:9. Maski man i bilip olsem Satan i stap o nogat, o em i save long Satan i bosim graun o nogat, bilong helpim yu long stori moa, yu ken kamapim sampela tok aninit long liklik het-tok “Ol Hevi i Kamap i Givim Save Long Yumi.” Sapos yu lukim olsem em i laik harim tok, orait tokim em yu laik stori long Satan i kamap olsem wanem, na kamapim ol tok long pes 3 na 4 bilong liklik nius.
6 Liklik nius “I Gat Gutpela Samting Bai Painim Ol Man i Dai Pinis?,” inap kirapim laik bilong man long harim tok. Yu ken kirapim tok long rot bilong wanpela askim, olsem:
◼ “Yu ting yumi inap lukim gen ol famili bilong yumi em ol i dai pinis?” Taim man i bekim tok pinis, kamapim tok long paragraf wan long pes 4 long nius na kaunim Jon 5:28, 29. Orait nau yu ken tok dispela nius bai helpim em long save long ol tok i stap aninit long namba wan liklik het-tok long nius. Tokim em yu laik stori wantaim em long en.
7 “Amamas Wantaim Famili Bilong Yu,” em liklik nius i gat ol tok bilong helpim ol famili long olgeta hap. Taim yu mekim wok long en, yu ken tok:
◼ “Ating yu wanbel olsem ol bikpela hevi tru i save painim ol famili long nau. Yu ting famili i ken mekim wanem bilong strongim pasin bilong pas gut wantaim?” Taim man i bekim tok pinis, stiaim tingting bilong em i go long ol tok i stap long namba wan paragraf long pes 6. Kolim wanpela skripsa ol i kamapim tok bilong en long pes 4 na 5, na stori long insait bilong en. Tokim em yu laik stadi wantaim em long Baibel, nogat pe.
8 Liklik nius “I Gat Wanem As na Yu Inap Bilip Tru Long Baibel?,” bai i stret long dispela tok hia:
◼ “Planti man i harim stori bilong Kein na Abel—dispela stori i stap long namba wan buk bilong Baibel. Buk Stat i stori tu long meri bilong Kein. Olsem wanem? Sampela taim yu bin tingting, Kein i kisim we meri bilong em?” Stori long tok i stap long laspela paragraf long pes 2 bilong bekim dispela askim. Tokim em olsem liklik nius i kamapim tu ol bikpela tok bilong Baibel long wanem samting bai kamap bihain. Bilong stori moa, kamapim ol tok kirap long paragraf 3 long pes 5, na mekim wok long ol skripsa i helpim dispela tok.
9 Wok bilong tilim ol liklik nius em i gutpela rot tru bilong autim gutnius. Long wanem, i no gat hatwok long karim ol i go long wanem wanem hap yu go long en. Yu ken mekim gut wok long ol taim yu autim tok long ol haus na long kain kain taim na ples. Ol liklik nius i save mekim bikpela wok bilong inapim wok autim tok bilong yumi. Yumi mas kisim ol narapela narapela liklik nius, na mekim gut wok long ol bilong kirapim tok wantaim ol man.—Kl 4:17.