Wanem Samting i Ken Helpim Yumi Long Sanap Strong Long Bilip?
1 Kirap long taim yumi bung wantaim oganaisesen bilong Jehova, yumi wok long kamap strong long spirit na dispela i as bilong amamas bilong yumi! Tasol bilong sanap strong yet long bilip, yumi mas wok oltaim long kamap strong moa long ol samting bilong spirit. (Kl 2:6, 7) Planti i kamap strong long ol samting bilong spirit, tasol sampela i lusim tok i tru, long wanem, ol i no “sanap strong long bilip.” (1 Ko 16:13) Yumi ken mekim wanem na bai dispela samting i no ken kamap?
2 Oltaim Mekim Wok Bilong Spirit: Wok gut wantaim oganaisesen bilong Jehova long mekim ol samting bilong spirit. Long dispela oganaisesen Jehova i save givim planti samting bilong spirit long yumi. Ol miting bilong kongrigesen, ol kibung sekit, na ol kibung distrik i kirapim yumi long kamap strong moa long spirit na long sanap strong, tasol yumi mas go olgeta taim long ol dispela miting bambai yumi ken kisim ol gutpela samting. (Hi 10:24, 25) Pasin bilong kaunim Baibel long olgeta de, na ol Wastaua na Kirap!, na ol buk i kamapim ol strongpela tok bilong Baibel, ol dispela samting bai helpim yumi long kamap strong long spirit. (Hi 5:14) Putim ol mak bilong spirit na wok strong long winim, em tu bai helpim yu inap oltaim.—Fl 3:16.
3 Kisim Helpim Long Ol Strongpela Brata: Wok long save gut long ol strongpela brata sista long kongrigesen. Kisim save long ol elda, long wanem, ol i namba wan lain bilong strongim yumi. (1 Te 2:11, 12) Amamas long kisim ol tok bilong stretim yumi o sampela tingting ol i givim long yumi bilong helpim yumi. (Ef 4:11-16) Ol wokman tu i gat laik long helpim ol narapela long sanap strong long bilip, olsem na yumi ken go long ol dispela brata bilong ol i ken strongim yumi.
4 Olsem wanem? Yu laik bai wanpela i helpim yu long wok bilong autim tok? Toktok long ol elda, na tokim ol yu laik bai wanpela i helpim yu. Ating bai ol i makim yu tu long insait long dispela program bilong Ol Painia i Helpim Ol Narapela. Olsem wanem? Yu kisim baptais nupela? Stadi long buk Lo na mekim wok long save yu kisim long en bai kirapim yu long wok long kamap strong. Olsem wanem? Yu wanpela papa o mama? Wok oltaim long strongim ol pikinini bilong yu long ol samting bilong spirit.—Ef 6:4.
5 Taim yumi holimpas bilip na sanap strong, yumi pas gut wantaim Jehova na ol brata bilong yumi. Dispela i helpim yumi long sanap strong long ol traim bilong Satan na i strongim bilip bilong yumi long wetim ol gutpela samting bilong oltaim oltaim long bihain.—1 Pi 5:9, 10.