Putim Tok i Go Daun Long Bel Bilong Sumatin Bilong Yu
1 Paslain long Jisas i go long heven, em i tokim ol disaipel bilong em long “bihainim” olgeta tok em i bin givim long ol. (Mt. 28:19, 20) Bilong man i ken “bihainim” ol tok bilong Krais, dispela tok i mas i go daun long bel bilong em. (Sng. 119:112) Olsem wanem yu inap kirapim bel bilong man yu stadi wantaim em long Baibel?
2 Beten Long Jehova i Ken Soim Rot Long Yu: Wok bilong kamapim ol disaipel em wok bilong God. Bilong dispela wok i ken kamap gutpela, Jehova i mas blesim wok bilong yumi, yumi no inap mekim long save na strong bilong yumi. (Ap. 16:14; 1 Ko. 3:7) Olsem na em i bikpela samting long yumi mas beten askim Jehova long helpim yumi long lainim ol narapela man long tok i tru.—Ais. 50:4.
3 Save Long Ol Samting Sumatin i Bilip Long En: Sapos yumi save long ol samting man i bilip long en, na bilong wanem ol i bilip long en, dispela inap helpim yumi long tingim ol tok yumi bai mekim bilong kirapim bel bilong em. Bilong wanem sumatin i laikim tru wanpela tok? Wanem samting i kirapim em long bilip long dispela tok? Kain save olsem inap helpim yumi long skelim na mekim ol tok.—Ap. 17:22, 23.
4 Kamapim Klia Ol Tok Bilong Baibel i Strongim Tok: Sumatin i mas klia gut long tok i tru yumi skulim em long en. (Ap. 17:24-31) Yumi mas soim em i gat wanem as na yumi bilip tru long ol gutpela samting bai kamap. (1 Pi. 3:15) Tasol oltaim yumi mas mekim long gutpela pasin na pasin isi.
5 Mekim Tok Piksa Bilong Strongim Tok: Ol tok piksa i save mekim na sumatin i no hatwok long kisim ol tok, na tu, ol tok piksa i save kirapim bel bilong em. Ol tok piksa i save stiaim tru tingting na bel bilong man. Planti taim Jisas i mekim ol tok piksa. (Mk. 4:33, 34) Bilong tok piksa i ken helpim man, tok piksa i mas stret wantaim tok yu kamapim, na em i mas stret wantaim i stap bilong sumatin.
6 Kolim Ol Helpim Man i Kisim Taim Em i Bilip Long Tok i Tru: Ol man i laik save ol bai kisim wanem kain helpim taim ol i bihainim ol samting ol i lainim. Helpim sumatin bilong yu long kisim insait bilong tok bilong Pol i stap long 2 Timoti 3:14-17.
7 Yu no ken bel hevi sapos sampela i no pilim ol tok yu skulim ol long en. I no olgeta man i gat gutpela bel. (Mt. 13:15) Tasol sampela man bai kamap bilipman. (Ap. 17:32-34) Hatwok yupela i save mekim bilong putim gutnius i go daun long bel bilong ol man i ken helpim tru planti manmeri moa long harim na “bihainim” tok bilong Jisas.