Bilip i Kirapim Yumi Long Mekim Ol Gutpela Wok
1 Bilip i bin kirapim Noa, Moses, na Rahap long mekim sampela samting. Noa i wokim bot. Moses i sakim ol gutpela samting bilong haus king bilong Fero, em ol dispela samting i bilong i stap sotpela taim tasol. Rahap i haitim ol man bilong lukstil na em i bihainim tok bilong ol, na long dispela rot em i helpim ol wanhaus bilong em long abrusim bagarap. (Hi. 11:7, 24-26, 31) Bilip bilong yumi i kirapim yumi long mekim wanem ol gutpela wok long nau?
2 Autim Tok: Bilip i save kirapim yumi long tokaut long gutpela God bilong yumi na ol samting em i bin mekim bilong yumi ken i stap amamas inap oltaim oltaim. (2 Ko. 4:13) Ating sampela taim yumi pret liklik long autim tok. Tasol taim yumi putim ‘Bikpela i stap klostu long yumi,’ dispela i save strongim yumi na i daunim pret. (Sng. 16:8) Orait nau, bilip i save kirapim yumi long autim gutnius long ol wanblut, ol man i sindaun klostu long yumi, ol wanwok, wanskul, na long ol narapela man, long olgeta taim rot i op long yumi ken mekim olsem.—Ro. 1:14-16.
3 Bung Wantaim: Pasin bilong bung wantaim long olgeta taim dispela tu i wanpela gutpela wok em bilip i save kamapim. Olsem wanem yumi ken tok olsem? Long wanem, pasin bilong yumi long bung wantaim i soim olsem yumi bilip olsem Jisas i stap wantaim yumi long rot bilong spirit holi bilong God taim yumi bung long ol miting Kristen. (Mt. 18:20) Pasin bilong yumi long bung wantaim i kamapim klia olsem, yumi laik tru long “harim gut dispela tok Holi Spirit i autim long ol sios.” (KTH 3:6) Yumi tingim gut ol tok yumi harim long ol miting, long wanem, long ai bilong bilip yumi luksave olsem man i skulim yumi em Nambawan Tisa bilong yumi, Jehova.—Ais. 30:20.
4 Ol Samting Yumi Mekim: Yumi gat strongpela bilip long ol samting bai kamap, maski long ai yumi no inap lukim ol dispela samting, na dispela i save kirapim yumi long putim ol samting bilong spirit i stap namba wan long laip bilong yumi. (Hi. 11:1) Bilong mekim olsem planti taim yumi mas lusim ol samting bilong skin. Olsem: Rot i op long wanpela elda long kisim bikpela namba long wok mani bilong em, tasol em i no laik kisim, long wanem, dispela bai pasim em long i go long olgeta miting, em bai no stap wantaim famili bilong em, na em bai lusim wok painia. Yumi tu i mas bilip tru long tok promis bilong Baibel olsem Jehova bai lukautim ol man i “wok pastaim long painim kingdom bilong God wantaim stretpela pasin bilong em.”—Mt. 6:33, Nupela Testamen na Ol Sam.
5 Ol man i save lukim ol bikpela samting em bilip i kamapim long i stap bilong yumi. Tru tumas, long olgeta hap bilong graun ol man i save long strongpela bilip bilong yumi. (Ro. 1:8) Olsem na yumi olgeta i mas mekim ol gutpela wok i kamapim olsem bilip bilong yumi i gat strong.—Jems 2:26.