Wok Kristen Bilong Autim Tok—Nambawan Bikpela Wok Bilong Yumi
1 Yumi olgeta i gat ol kain kain wok yumi mas mekim. Wok bilong lukautim famili long kaikai na klos samting em wanpela wok God i tok yumi mas mekim. (1 Ti. 5:8) Tasol ol wok yumi mekim bilong inapim dispela samting i no ken kamap nambawan na winim wok bilong autim tok bilong Kingdom na kamapim ol disaipel.—Mt. 24:14; 28:19, 20.
2 Jisas i stap olsem gutpela piksa yumi ken bihainim long “wok pastaim long painim Kingdom bilong God wantaim stretpela pasin bilong em.” (Mt. 6:33, Nupela Testamen na Ol Sam; 1 Pi. 2:21) Maski em i no gat planti samting bilong skin, em i bin givim bel tru long mekim laik bilong Papa bilong em. (Lu. 4:43; 9:58; Jo. 4:34) Em i wok strong long autim tok long olgeta taim rot i op. (Lu. 23:43; 1 Ti. 6:13) Em i tokim ol disaipel bilong em long ol tu i mas i gat wankain laik olsem em long wok bilong bungim kaikai.—Mt. 9:37, 38.
3 Bihainim Pasin Bilong Jisas Long Nau: Yumi inap bihainim pasin bilong Jisas taim yumi putim tingting i go long wok Kristen bilong autim tok, na yumi no tingting long kisim planti samting bilong skin. Sapos yumi gat kaikai na klos na ples slip samting, orait yumi ken bihainim tok bilong Baibel na no ken bungim planti kago bilong dispela graun. (Mt. 6:19, 20; 1 Ti. 6:8) I gutpela moa sapos yumi painim rot long mekim bikpela wok moa bilong autim tok! Sapos sampela hevi i painim yumi, yumi mas wok strong olsem Jisas i bin mekim, na yumi no ken larim ol hevi bilong olgeta de i pasim yumi long mekim bikpela wok bilong yumi long autim gutnius bilong Kingdom.—Lu. 8:14; 9:59-62.
4 Maski sampela man i gat planti wok bilong mekim, ol i putim wok autim tok i go pas long ol narapela samting. Wanpela brata husat i gat bikpela famili, na em i mekim bikpela wok skin, na em i elda long kongrigesen Kristen, em i tok: “Mi tingim wok autim tok i olsem wok tru bilong mi.” Wanpela painia sista i tok: “Wok painia em i gutpela wok tru, winim olgeta wok bilong skin.”
5 Maski yumi gat wanem kain sindaun, i gutpela yumi bihainim pasin bilong Jisas. Yumi inap mekim olsem long wanem rot? Yumi inap mekim olsem taim yumi putim wok Kristen bilong autim tok i stap nambawan bikpela wok bilong yumi.