Wok Strong Long Autim Tok
1 Nau em taim bilong planti hevi nogut tru. Ol pait insait long wanpela kantri yet, ol bikpela pait namel long ol narapela narapela lain, ol bikpela bagarap olsem guria samting, na ol narapela pasin nogut tru i pulap long nau. Winim ol narapela taim bipo, ol man i mas harim gutnius. Tasol planti man i no tingim ol samting bilong spirit. Long sampela hap, i hatwok long bungim ol man long haus bilong ol na i hatwok moa long bungim ol man i amamas long harim tok o i gat laik long stadi long Baibel. Maski i olsem, em i bikpela samting long yumi wok strong long autim gutnius bilong Kingdom Bilong God.—Mt. 24:14.
2 Laikim Ol Man: Wok bilong yumi long autim tok i kamapim klia pasin bilong Jehova long laikim ol man. “Em i no laik bai wanpela man i lus. Em i laik bai olgeta man i mas tanim bel.” (2 Pi. 3:9; Ese. 33:11) Olsem na em i mekim dispela tok em Jisas i kamapim, “Olgeta lain man i mas harim man i autim gutnius pastaim.” (Mk. 13:10) God i tokim ol man long i kam long em na bai ol i abrusim bagarap taim em i givim strafe long lain bilong Satan long graun. (Jol. 2:28, 29, 32; Sef. 2:2, 3) Olsem wanem? Yumi tenkyu long Jehova i givim dispela wok long yumi?—1 Ti. 1:12, 13.
3 Ripot bilong olgeta hap i soim olsem long 2004 sevis yia, yumi bin mekim samting olsem 6,085,387 Baibel stadi long olgeta wan wan mun na inap olsem 5,000 nupela disaipel i kisim baptais long olgeta wan wan wik! Ol pablisa i bin painim sampela bilong ol dispela nupela lain i dediket long Jehova, long wanem, Jehova i blesim wok bilong ol long givim bel tru long autim tok long olgeta man long teritori bilong ol. Dispela i kamapim bikpela amamas insait long ol kongrigesen, na yumi amamas tru long wok wantaim God long dispela wok bilong helpim ol man long abrusim bagarap na ol i ken i stap laip!—1 Ko. 3:5, 6, 9.
4 Litimapim Nem Bilong God: Yumi wok strong long autim tok bambai yumi inap litimapim nem bilong Jehova na mekim holi nem bilong em long ai bilong olgeta man. (Hi. 13:15) Satan i bin giamanim “olgeta manmeri bilong graun” long ting olsem God i no inap stretim hevi bilong ol man, o em i no save tingim pen na hevi bilong ol man, o em i no stap. (KTH 12:9) Long rot bilong wok autim tok bilong yumi, yumi helpim tok i tru bilong gutpela Papa bilong yumi long heven. Yumi mas wok yet long litimapim nem bilong em long nau na i go inap oltaim oltaim.—Sng. 145:1, 2.