Sediul Bilong Famili—Ol Miting Bilong Kongrigesen
1 Sapos yu wanpela papa o mama Kristen, yu laik bai ol pikinini bilong yu i laikim tru Jehova na lotu long em taim ol i go bikpela, na bihain kisim laip oltaim long nupela taim God i tok promis long en. Olsem wanem yu ken helpim ol long putim lotu bilong Jehova i stap namba wan samting long laip bilong ol? Wanpela bikpela rot em pasin bilong yu. (Snd. 20:7) Wanpela sista i tingim pasin bilong mama bilong em husat i wanpela Witnes, na em i tok: “Mipela i save olsem mipela bai go long ol miting na mipela i no gat tupela tingting long en.” Dispela i bin pas strong long tingting bilong em.
2 Olsem wanem? Famili bilong yu i kliagut long as na i gat ol miting bilong kongrigesen? Ol tok yumi kisim long ol dispela miting i save strongim yumi long mekim yet laik bilong God, na taim yumi bung wantaim ol brata bilong yumi dispela em i gutpela rot bilong strongim yumi. (Ais. 54:13; Ro. 1:11, 12) Tasol nambawan as na yumi gat ol dispela miting em long litimapim nem bilong Jehova “namel long ol manmeri i bung bilong lotu.” (Sng. 26:12) Ol miting Kristen i givim rot long yumi bilong soim olsem yumi laikim tru Jehova na lotuim em.
3 “Lukaut Gut Long Wokabaut Bilong Yupela”: Pasin bilong tingim olsem ol miting i holi bai kirapim yumi long ‘lukaut gut long wokabaut bilong yumi’ na bai yumi no kisim pasin bilong lusim ol miting na mekim ol samting i no bikpela samting. (Ef. 5:15, 16; Hi. 10:24, 25) Taim yu wokim sediul bilong famili, yu ken makim ol taim bilong ol miting bilong kongrigesen. No ken larim ol narapela samting i kisim ples bilong ol. Na mekim pasin bilong i go long ol miting i stap olsem bikpela samting long famili bilong yu.
4 Taim yumi ritim stori bilong ol hevi ol brata bilong yumi i mas karim bambai ol i ken go long ol miting na kibung, yumi save pilim tru ol dispela stori, a? Tru, ating yu no gat ol dispela bikpela hevi long i go long ol miting, tasol ating yu tu i gat sampela hevi yu mas karim. Satan i wok strong long pasim ol lain bilong God long lotuim Jehova. Maski i olsem, yu ken bilip tru olsem ol pikinini bai luksave long hatwok bilong yupela famili long wok strong long go long ol miting bilong kongrigesen. Tru tumas, taim yu go oltaim long ol miting, yu bai givim wanpela gutpela presen bilong spirit long ol pikinini em ol bai i no inap lusim tingting long en.