Helpim Ol Man Long “Bihainim Tru” Tok Bilong God
1 Pasin bilong bihainim tok em i bikpela samting bilong lotu tru long Jehova. (Lo 12:28; 1 Pi. 1:14-16) Klostu nau kot bilong God bai painim “ol man i no laik save long God na i no bihainim gutnius.” (2 Te. 1:8) Olsem wanem yumi ken helpim ol man long “bihainim tru” tok bilong God?—Ro. 6:17.
2 Strongim Bilip na Pasin Laikim: Long Baibel, pasin bilong bihainim tok i poroman wantaim pasin bilong bilip. Aposel Pol i tok God i laik bai ol man i ‘bilip na mekim ol pasin em i laikim.’ (Ro. 16:26) Hibru sapta 11 i stori long planti bilipman em ol i bihainim tok na mekim ol samting God i tokim ol long mekim. (Hi. 11:7, 8, 17) Tasol pasin bilong sakim tok i poroman wantaim pasin bilong i no gat bilip. (Jo. 3:36; Hi. 3:18, 19) Yumi mas kisim pasin bilong mekim gutpela wok long Baibel bambai yumi inap helpim ol man long kisim pasin bilong bilip i kirapim man long bihainim tok.—2 Ti. 2:15; Jem. 2:14, 17.
3 Pasin bilong bihainim tok i poroman tu wantaim pasin bilong laikim God. (Lo 5:10; 11:1, 22; 30:16) Namba 1 Jon 5:3 i tok: “Sapos yumi laikim tru God, orait yumi save bihainim ol lo bilong en. Na ol lo bilong en i no givim hevi long yumi.” Olsem wanem yumi ken helpim ol Baibel sumatin long kisim pasin bilong laikim Jehova? Long taim bilong stadi wok long painim rot bilong helpim ol long pilim tru ol pasin bilong Jehova. Stori long ol pasin bilong God em yu yet i pilim tru. Helpim sumatin long kisim pasin bilong pas gut wantaim Jehova. Pasin bilong laikim Jehova em i namba wan samting bilong kirapim ol sumatin—na yumi tu—long bihainim tru tok bilong em.—Mt. 22:37.
4 Pasin Bilong Yumi: Pasin bilong yumi em wanpela gutpela rot we yumi ken strongim ol narapela long bihainim gutnius. Olsem na yumi yet i mas wok strong long bihainim tru tok bilong God. (1 Kin. 3:9; Snd. 4:23) Wanem samting bai helpim yu long mekim olsem? Yu mas kisim ol kaikai bilong spirit long rot bilong mekim stadi bilong yu yet long Baibel na go long ol miting. (Sng. 1:1, 2; Hi. 10:24, 25) Poroman wantaim ol man i givim bel olgeta long lotu tru long God. (Snd. 13:20) Yu mas insait oltaim long wok autim tok na yu mas i gat laik tru long helpim ol man long teritori bilong yu. Beten askim Jehova long stiaim yu long kisim gutpela bel. (Sng. 86:11, NW ) Abrusim ol samting inap bagarapim bel bilong yu, olsem ol amamas i gat pait o pasin pamuk long en. Mekim ol samting i helpim yu long i go klostu long God na pas gut wantaim em.—Jem. 4:7, 8.
5 Jehova i bin tokim ol lain bilong em long bipo olsem sapos ol i bihainim tok bilong em, em bai givim ol gutpela samting long ol. (Lo 28:1, 2) Olsem tasol, long nau tu Jehova i save mekim gut long “ol manmeri i bihainim tok bilong em.” (Ap. 5:32) Olsem na long rot bilong tok yumi autim na pasin yumi mekim, yumi inap helpim ol narapela long bihainim tru tok bilong God.
[Askim Bilong Stadi]
1. Jehova i laik bai ol man i lotu long em, ol i mas mekim wanem?
2. Bilong wanem em i bikpela samting long helpim ol man long kisim strongpela bilip?
3. (a) Olsem wanem pasin bilong bihainim tok i poroman wantaim pasin laikim? (b) Olsem wanem yumi ken helpim ol Baibel sumatin long kisim pasin bilong laikim Jehova?
4. (a) Bilong wanem pasin bilong yumi i bikpela samting? (b) Yu mas mekim wanem bilong kisim pasin bilong bihainim tru tok bilong God?
5. Ol manmeri i save bihainim tok i kisim wanem blesing?
This article is repeated in km 8/10.