Wok Autim Tok i Inapim Wanem Ol Samting?
1 Baibel i tok ol Kristen i amamas long mekim wok bilong Jehova, ol i kain olsem wanpela lain ami i winim pait na mats i go. (2 Ko. 2:14-16, Nupela Testamen na Ol Sam) Taim yumi autim save bilong God, dispela i olsem gutpela ofa yumi givim long Jehova. Tok bilong gutnius i pulim sampela man; sampela ol i sakim. Tasol taim ol man i les long putim yau, dispela i no makim olsem wok bilong yumi i lus nating, nogat. Yumi ken stori nau long ol samting em wok autim tok i inapim.
2 Litimapim Nem Bilong Jehova: Satan i sutim tok olsem ol man i mekim wok bilong Jehova, long wanem, ol i laik helpim ol yet. (Jop 1:9-11) Wok autim tok i givim rot long yumi ken kamapim klia olsem yumi givim bel tru long God. Planti pablisa i wok yet long autim tok na kamapim ol disaipel maski ol yet i gat sampela bikpela hevi o ol man i les long harim tok. Dispela pasin bilong ol long karim hevi na stap gut long Jehova i save mekim em i belgut!— Snd. 27:11.
3 Na tu, wok autim tok i insait long wok bilong kamapim samting em God i tingting pinis long mekim. Jehova i tok long samting bai kamap taim bagarap i painim graun bilong Satan, olsem: “Bai ol i save gut olsem, mi yet mi Bikpela.” (Ese. 39:7) Ol lain man i mas save long dispela samting, na bilong mekim olsem, ol wokman bilong God i mas wok yet long tokaut long nem bilong God na ol samting em i tingting pinis long mekim. Ol i mas tokaut long dispela samting “long ol manmeri bilong olgeta lain man na bilong olgeta kantri na bilong olgeta tok ples na bilong olgeta kain skin.”—KTH 14:6, 7.
4 As Bilong Kot: Wok bilong autim gutnius i stap olsem as bilong mekim kot. Aposel Pol i tok olsem Krais Jisas bai mekim save long “ol man i no laik save long God na i no bihainim gutnius bilong Jisas, Bikpela bilong yumi.” (2 Te. 1:8, 9) God bai tingim pasin ol man i mekim taim ol i harim gutnius, na em bai skelim ol long dispela samting. Dispela i makim olsem ol wokman bilong God i gat bikpela wok tru bilong mekim! Sapos yumi no laik i gat asua long blut bilong ol man i dai, orait yumi no ken surik long tokaut long tok bilong Kingdom, em dispela tok inap helpim ol man long abrusim bagarap.—Ap. 20:26, 27.
5 Ol wok yumi mekim bilong helpim ol man long mekim samting na bai God i orait long ol, dispela i kamapim klia pasin marimari bilong Jehova. (1 Ti. 2:3, 4) Sindaun bilong ol man i save senis oltaim, olsem na yumi go yet bilong kirapim ol long i kam long Jehova taim i gat haptaim i stap yet. Taim yumi mekim olsem, yumi kamapim klia “bikpela marimari” bilong God bilong yumi, em man husat “i no laik bai wanpela man i lus. Em i laik bai olgeta man i mas tanim bel.”—Lu. 1:77, 78; 2 Pi. 3:9.
6 Helpim Yumi Yet: Taim yumi wok strong long mekim wok bilong Jehova, dispela i save lukautim yumi. Em i helpim yumi long “tingim gut de bilong Jehova” na yumi no larim ol pasin nogut bilong graun i bagarapim yumi. (2 Pi. 3:11-14, NW; Ta. 2:11, 12) Yumi save olsem hatwok yumi mekim long wok autim tok, em i no inap lus nating, olsem na i gutpela yumi ‘stap strong, na i no ken surik liklik, na oltaim yumi mas wok strong long mekim wok bilong Bikpela.’—1 Ko. 15:58.
[Askim Bilong Stadi]
1. Jehova i ting olsem wanem long wok bilong yumi long autim tok? Ol man i mekim wanem taim yumi autim tok long ol?
2. Wok autim tok i givim rot long yumi inap kamapim klia wanem samting?
3. Bilong wanem em i bikpela samting long yumi mas wok yet long tokaut long nem bilong God na ol samting em i tingting pinis long mekim?
4. Olsem wanem wok autim tok i stap olsem as bilong kot?
5. Olsem wanem wok autim tok i kamapim klia pasin marimari bilong God?
6. Taim yumi wok strong long mekim wok bilong Jehova, dispela i helpim yumi olsem wanem?