Mipela Inap Helpim Ol Olsem Wanem?
1 Ol Witnes Bilong Jehova i save mekim dispela askim, “Mipela inap helpim ol olsem wanem?,” taim ol i harim tok long wanpela bikpela bagarap i kamap long sampela hap bilong graun. Stori i stap long Aposel 11:27-30 i soim olsem ol Kristen bilong pastaim i bin givim mani long ol brata i stap long Judia, long wanem, taim bilong bikpela hangre i kamap long Judia.
2 Nau long taim bilong yumi, ol lo bilong oganaisesen i orait long yumi inap yusim mani bilong helpim ol manmeri i bin kisim hevi long sampela bikpela bagarap.
3 Olsem: Long las yia, planti bratasista i givim mani bilong helpim ol manmeri i bin kisim bagarap long sunami i kamap long Saut Esia. Dispela pasin ol i mekim bilong givim mani em i gutpela tru.
4 Tasol taim yumi givim mani, yumi no ken makim olsem em i bilong helpim ol man i kisim hevi long wanpela kain bagarap, nogat. I gutpela moa sapos yumi givim dispela mani olsem kontribiusen bilong helpim wok long olgeta hap. Olgeta mani yumi givim olsem kontribiusen bilong helpim wok long olgeta hap, em i bilong helpim ol man i kisim hevi long ol bikpela bagarap, na tu, em bilong helpim lain brata Kristen long ol samting bilong spirit. Sapos i gat sampela as na wanpela i laik makim olsem kontribiusen bilong em i bilong helpim ol man i kisim hevi long wanpela kain bagarap, mipela bai kisim dispela kontribiusen na yusim bilong helpim ol man i kisim hevi long wanem wanem bagarap i kamap. Tasol i gutpela sapos yumi no makim wanem wok ol i ken mekim long kontribiusen bilong yumi.
5 Taim yumi givim ol kontribiusen i go bilong helpim wok long olgeta hap, dispela bai mekim na i gat planti mani moa bilong yusim long helpim olgeta samting long wok bilong Kingdom, na i no wet tasol long wanpela bagarap i kamap bihain na nau ol i ken yusim dispela mani. Dispela i stret wantaim as tingting i stap long Efesus 4:16, olsem yumi wok wantaim bilong helpim ‘bodi long kamap bikpela na strongpela.’