Wok Autim Tok i Soim Olsem Yumi Laikim God
1. Pasin bilong laikim God i kirapim Jisas long mekim wanem?
1 Pasin laikim i kirapim Jisas long mekim wok autim tok. Olgeta samting long wok autim tok bilong Jisas i kamapim klia pasin bilong em long laikim God. Jisas i tok: “Mi laik bai ol manmeri bilong graun i save, mi laikim tru Papa, na mi save mekim olgeta samting Papa i tokim mi long mekim.” (Jo. 14:31) Yumi ol man bilong bihainim lek mak bilong Jisas, olsem na yumi tu i gat gutpela wok bilong kamapim klia olsem yumi laikim God taim yumi autim tok.—Mt. 22:37; Ef. 5:1, 2.
2. Pasin bilong laikim Jehova i mekim wanem long wok autim tok bilong yumi?
2 “Nem Bilong Yu i Mas i Stap Holi”: Taim rot i op long yumi mekim gutpela wok long autim tok na tokim ol man long Jehova na Kingdom bilong em, yumi soim olsem yumi laikim God, na long dispela rot yumi helpim wok bilong mekim nem bilong em i stap holi. (Sng. 83:18; Ese. 36:23; Mt. 6:9) Olsem wok autim tok bilong Jisas i bin kamapim, long olgeta taim yumi autim tok yumi kamapim klia olsem yumi laik bai nem bilong Jehova i stap holi na laik bilong em i mas kamap.—Mt. 26:39.
3. Olsem wanem pasin bilong laikim Jehova i helpim yumi long sanap strong na winim ol hevi?
3 Pasin Laikim i Kirapim Yumi Long Winim Ol Hevi: Pasin bilong laikim Jehova i helpim yumi long winim olgeta kain hevi. (1 Ko. 13:4, 7) I gat sampela hevi i bin painim Jisas na dispela inap pasim wok autim tok bilong em. Tasol taim ol hevi i painim em, pasin bilong em long laikim tru God na laik bilong em long mekim laik bilong Jehova, dispela i bin helpim em long sanap strong na winim ol hevi. (Mk. 3:21; 1 Pi. 2:18-23) Yumi tu i gat planti hevi, tasol pasin bilong yumi long laikim God inap helpim yumi long winim ol dispela hevi. Taim yumi bihainim gutpela pasin bilong Jisas, yumi ken bilip olsem yumi inap mekim gut wok bilong yumi long autim tok. Maski famili i birua long yumi, o sik i painim yumi, o yumi lapun, o ol man i les long harim tok bilong yumi, dispela i no inap pasim yumi long kamapim pasin bilong yumi long laikim Jehova taim yumi mekim gut wok bilong yumi long autim tok.
4. Pasin bilong laikim Jehova i opim rot long yumi mekim wanem gutpela wok?
4 Pasin laikim i gat strong, na yumi gat dispela gutpela wok bilong kamapim klia olsem yumi laikim tru God long bel olgeta taim yumi mekim wok autim tok. (1 Ko. 13:13) Yumi kam klostu tru long dispela taim we Jehova bai mekim nem bilong em i kamap holi, olsem na pasin laikim bilong yupela “i ken kamap strong moa.”—Fl. 1:9; Mt. 22:36-38.