Samting Ol i Lukim na Harim Bai Kirapim Tru Tingting
1. Wanem narapela samting inap kirapim tingting bilong ol man i kam long Memorial? Stori long dispela.
1 Yumi bin wok strong tru long singautim ol man long kam bung wantaim yumi long Memorial. Tok ol i harim bai kirapim tru tingting bilong ol, tasol i gat narapela samting tu. Olsem: Wanpela meri i bin kam long Memorial i stori long samting em i lukim—em i lukim pasin pren i stap namel long ol bratasista na tu haus ol i mekim Memorial long en i klin na i luk nais tru. Dispela i kamapim klia olsem tok i kamap long Memorial na pasin yumi olgeta i mekim bai autim tok long ol man i kam long dispela spesel bung.—Efe. 4:16.
2. Yumi olgeta i ken mekim wanem na bai pasin bilong yumi i autim tok long ol nupela man?
2 Mekim Gutpela Pasin Long Ol Nupela Man: Taim yumi smail na tok gude long ol nupela man i kam long Memorial, dispela pasin bai autim tok long ol. (Jon 13:35) Maski sapos yu no inap toktok long olgeta man, yu inap toktok wantaim lain i sindaun klostu long yu. (Hib. 13:1, 2) Lukluk raun na skelim sapos i gat sampela nupela man em ol i no save long wanpela long dispela bung. Ating ol i bin kisim invatesen long kam. Yu ken askim ol, “Em fes taim bilong yu long kam?” Tokim ol long sindaun wantaim yu na toksave long ol olsem sapos ol i gat sampela askim orait ol i ken kamapim na yu bai bekim. Sapos kongrigesen bilong yu i mas lusim ples bung hariap, long wanem, narapela kongrigesen i mas yusim dispela ples bung, orait ating yu ken tok: “Mi laik save long yu gat wanem tingting long dispela bung. I gat rot long mi inap bungim yu gen?”
3. Yumi ken mekim wanem bilong welkamim ol pablisa i lusim wok autim tok?
3 Welkamim Pablisa i Lusim Wok Autim Tok: Ol pablisa i lusim wok autim tok na ol man em ol i save kam tasol long ol Memorial long olgeta yia, ol tu bai kam long Memorial. Welkamim ol na tokim ol olsem yu amamas long lukim ol. (Rom 15:7) Bihain liklik long Memorial, ol elda i ken go lukim ol long haus bilong ol na kirapim ol long kam bung gen wantaim kongrigesen. Mipela i beten olsem tok i kamap long Memorial na ‘gutpela pasin bilong yumi’ i ken kirapim ol man i kam long dispela bung long litimapim nem bilong God.—1 Pita 2:12.